Meerelo a Arumiwi 7

Waakula wa Extevawu

1Vano musogoleli a anamakutha ahimukohaga Extevawu, wiira: <<Nda dhinawogiwa, ebaribari?>>

2Oliye ahaakulaga, wiira: <<Alobwana, addibila ni abaabi, mvuruwane! Mulugu a nthithimiho ahimooneyela babiihu Abarahamu agali oMesopotamiya, ahinamage oHarani. 3Mulugu omwaaddela, wiira: <Ohiye elabo yaawo, emudhi yaawo, odhe elabo eyene gineeriimi guutoonyihedhe>.#7.3 Wambeela 12.1.

4<<Vano ahivenyaga elabo ya aKalideya, omaga oHarani. Wewule, babe agakwile, Mulugu ahimutamihedha Abarahamu elabo ela eliinyu. 5Kaavahiwe elabo, naari mburo wowaakwana nnyalo, mbwenye ahimuroromeliha omvaha elabo ela wi ekale yaaye ni ya anamabaliwelamo aaye, naari ahannave mwaana. 6Mulugu ahimwaaddela wi anaaye a musogolo yaakale anaweendda mu elabo ya amohi. Yiiriwe adhaari, erabulihiwe ofiyedha yaaka mazana mannayi (400). 7Mulugu ahiira: <Miyo gineere othonga nlogo nddo nnaarabulihe wona adhaari, dhavira nda anaawo enoodha ekumemo, egeebedhege mburo olena>.#7.7 Wambeela 15.13-14. 8Vano Mulugu ahimvaha Abarahamu nipangano nowiineliwa: Mowindo Abarahamu ahimbala Ezaaki, omwiinela vigavirile malabo matanu ni maraaru. Ezaaki ahimbala Yakobo. Vano Yakobo ahaabala makolo eehu kumi ni meenddi.

9<<Vano makolo eehu ale yahimuguliha Zhuuze wEgubuddu, mwaha wa nrima, mbwenye Mulugu aali ni oliye. 10Ahimvulumusa mwa dhoorusa dhaaye dhaatedhene, omvaha mahala ni tthottho, Farawo, mwene a wEgubuddu, aganonile nde, ahifiyedha omvaha osogoleli wa wEgubuddu ni vaade vaaye vaatevene.

11<<Vano wahidha dala elabo yaatene ya wEgubuddu ni oKanani, wahikala goyi yuulubale, makolo eehu kayanna yooja. 12Yakobo ageewile wi elabo ya wEgubuddu ohukala tirigu, ahaarumawo makolo eehu olenddo wowambeela. 13Olenddo wa nabiili, Zhuuze ahiinoniha wa addibile. Vano nihimo na Zhuuze nahinoniwa wa Farawo. 14Zhuuze ahirumiha omwiithana babe, Yakobo ni amudhi aaye aatene, yaali athu makumi matanu ni meenddi ni atanu (75). 15Yakobo ahikitela wEgubuddu, okwela wewo teto ni abaabi eehu. 16Yahithukuliwawo, odhowiwana oXikemu, oheliwa munsiyeni Abarahamu naguliliiye wa ahima a Hamori oXikemu ni korowa.

17<<Waaddamelaga mudhidhi wowi Mulugu aakwanelihe ororomeliha waaye walibeliiye wa Abarahamu,#7.17 Yoororomeliha Ela yaali yowi Mulugu eere waavenyiha muudhaarini wEgubuddu. Moone Wambeela 15.13-14. nlogo neehu naheenjedhedheya vajinji wEgubuddu. 18Vano mwene mmohiwa ahaamunonile Zhuuze, ahambeela osogolela wEgubuddu. 19Mwene ole oonyengetha nlogo neehu, wawoonihaga goyi makolo eehu, owaawaddihedha waathathila aniiwa a manyenya wi ekwege.

20<<Mudhidhi olene wabaliwe Mozezi, Mulugu ahuubuwela wi aali mwaana ooriya vajinji. Aleliwe vaade va babe mweeri miraaru.#7.20 Okuma 2.2. 21Mozezi vathathiliwiiye, mwaana-mwihiyana a Farawo omuddodda, omulela wona mwaana aaye-aaye. 22Mozezi asuuzihiwe ni ononelamo waatewene wa aEgubuddu, aali muthu awoga ni wiirana mwa owodha.

23<<Mozezi aakwanihaga yaaka makumi mannayi, ahimaruwela waweeddela addibile, aEzarayeli. 24Agamoonile muthu oonihiwaga goyi, ahimuthiithihedhaga, odhana othongi, woompa mwEgubuddu. 25Oliye oobuwela wi addibile yeere wiiwelelamo wi Mulugu afuna aavulumuse odheela mwa oliye, mbwenye kayeewelelemo. 26Nlabo nooharela Mozezi ahawaaddamelaga aEzarayeli abiili yawanaga. Ahixixa wiirana murenddele, eeraga: <Alobwana, muli oddibila; munawanela ddi?> 27Mbwenye ole amuddwadhaga mukwaaye ahimutukumaga Mozezi, wiira: <Wuusakule okala musogoleli ni onithonga hiyo baani? 28Onafuna teto ogipe wona ompeliiwe mwEgubuddu ndilo?>#7.28 Okuma 2.14. 29Mozezi ageewile dhedho ahithawelaga oMidiyani, okala wewo wona mwanaweendda, ahaabalawo anaalobwana abiili.

30<<Dhigavirile yaaka makumi mannayi mwiiddeddereni mwa Mwaango Sinayi, mungero ahimooneyela Mozezi vanlumini na munddo vanikupuni. 31Mbwenye Mozezi agoonile ahitikinaga ni nde dhooniligiiye, aaddamelagavo ahiiwaga ndhu na Nabwiya: 32<Miyo gili Mulugu a ababo, Mulugu a Abarahamu, Mulugu a Ezaaki ni Mulugu a Yakobo>.#7.32 Okuma 3.6. Mozezi agurumelaga, kaandaga osugwa. 33Vano Nabwiya ahiiraga: <Okurule sapatho mmanyaloni mwaawo, mwaha niburo viliiwe thi noweela. 34Gihoona orabula wa mulogo waaga wEgubuddu, gihiiwa wuundda weewa, gihikita wi gawoobole. Odhe dhiinova, guurume wEgubuddu>.#7.34 Okuma 3.5, 7-8, 10.

35<<Mozezi di oyene aEzarayeli yamukooddiliiwa, yiiraga: <Wuuvahile okala musogoleli ni onithonga hiyo baani?>#7.35 Okuma 2.14. Oliye ahirumiwa ni Mulugu wi akale mpogo ni namoobola odheela mwa mungero ole amooneyele vanikupuni. 36Oliye ahaavenyihawo aEzarayeli wEgubuddu eerihedhaga dhootikiniha ni dhitoonyihedho mwiilaboni mule, ni mu Nyaza Yoofiila, mwiiddeddereni mwa yaaka makumi mannayi.

37<<Mozezi di oyene awogile ni aEzarayeli: <Mulugu oneere omvenyiha namavuhulela mmohi wa nyo, ooligana ni miyo, oosakuliwa vaari va addibilinyu>.#7.37 Deteronomiyo 18.15. 38Di Mozezi aali vamutugumanoni mwiiddeddereni ni mungero awogiiyena oMwaangoni Sinayi ni makolo eehu, aakelile madhu a egumi wi anifiyihedhe hiyo, 39oyene makolo eehu yamukooddiliiwa omwiiwelela, emvaanya efunaga owelela wEgubuddu; 40voomwaaddela Aroni wi: <Anisasanyedhele amilugu oonisogolela, vowi Mozezi ole onivenyihile wEgubuddu, kannonile emwiireyele!> 41Mudhidhi olene yahimusasanya mulugu oosemiwa ooligana ni ng'ombe. Yahidheelana mikutho, yahithabela mabasa yasasanyiliiwa. 42Mbwenye Mulugu ahaarabela, waapeleka weebedha nduwa, mweeri ni ttendderi mooligana ni dhedho dhilebiwe muniivuru na anamavuhulela:

<We, nyuba ya Ezarayeli,

wagipelekela miyo mikutho ni dhoovaha mwa

yaaka makumi mannayi nde mwiiddeddereni?

43Moohiyaniha, wathukula musasa wa Moloki,

ni ttendderi, mulugu aawo Refani,

vamohi ni dhoofwanafwaniha

dhisasanyedhiiwe wi weebedhege!

Mowindo ginowuukwaranyihedha oBabilooniya>.#7.43 Amosi 5.25-27.

44<<Vaari va makolo eehu mwiiddeddereni vahikala musasa wa onamoona. Wasasanyiwe mooligana ni makalelo ayene Mulugu yamulamuleliiye Mozezi. 45Egaakelile musasa wa onamoona makolo eehu ni Zhozuwe, yahidhowana vathukuliiwa dhilabo dha malogo, ayene Mulugu yawiigariliiye vameentoni veewa. Musasa ola wahilogelave elabo elene ofiyedha mudhidhi wa Davidi, 46oyene aakelile mahala vameentoni va Mulugu, omuloba wi amurumeedhihe ommagela vookala Mulugu a Yakobo. 47Mbwenye Salomawu dammagele nyuba.

48<<Naari dhigalive ndo, Amudhulu-dhulu kanakala nyuba yoomagiwa ni madada a athu. Wona muwogele namavuhulela:

49<Nabwiya dinawoga.

Odhulu bu mpanddo waaga wa omwene,

elabo ya vati foonyingala manyalo aaga.

Muneere mugimagele nyuba yowi avi,

naari mburo woovumavo wowi avi?

50Kahuwo madada aaga esasanyile

dhego dhaatedhene dhedhi?>#7.50 Ezaya 66.1-2.

51<<Nyo, addiyamaru, oohiineliwa murima ni mabaru,#7.51 Oohiineliwa murima ni mabaru dhinatapulela oovaadda mirima, oothiyana obaruni. Extevawu awaagana ale yeethukulela ni wiineliwa, emvaanyaga Mulugu. nyo munovaanyave Muneba Woweela, munaligana ni makolo eenyu! 52Namavuhulela aharabulihiwe ni makolo eenyu baani? Aliwa yahaapa ale yawoga dha odha wa Owogoowa, oyene nyo mwasadduwiliinyu mukala aliba ompeleka ni ompa. 53Nyo muli ale mwaakelile Malamulo odheela mwa angero mbwenye kamwawiiwelele>>.

Opiwa wa Extevawu ni mabwe

54AZhudewu egeewile ndo yahitakaleliwaga, yootakuna meeno wa oliye. 55Mbwenye Extevawu, oodhaaliwa ni Muneba Woweela, ahisugwaga odhulu, woona nthithimiho na Mulugu, Yesu ageemelile omoononi wooja wa Mulugu. 56Nuwindo, ahiiraga: <<Ginowoona odhulu ogafuguwe, Mwaana a Muthu, ageemelile omoononi wooja wa Mulugu>>.

57Aliwa yahithiyelaga obaruni, okuwa ni ndhu nootaama, vamohi yahimulupelaga Extevawu, 58egamvokedhe ode wa nluwa yahambeela omvonya ni mabwe. Anamoona#7.58 Anamoona Ala enaagiwana alene yamvonyaga Extevawu ni mabwe. yahihiyaga dhoowara dheewa mmadani mwa mulobwana mmohi, eeriwa Sawuli. 59Vamvonyigiiwa ni mabwe, Extevawu oolobelaga, eeraga: <<Nabwiya Yesu, akelani muneba waaga>>. 60Nuwindo, ahitongwaga ni makokoro okuwa moolibiha, wiira: <<Nabwiya, muhaweelengele aliwa yoothega ela>>. Agawogile nda, okwa.

Currently Selected:

Meerelo a Arumiwi 7: tke

Highlight

Copy