Meerelo a Arumiwi 9

Otthwaruwa wa Sawuli

1Sawuli, owawoopopihave anamasuuza a Nabwiya, ofunaga waapa. Ahidhowaga wa musogoleli a anamakutha, 2omuloba makaarata oodhowana nyuba dha matugumano dha oDamasiku, eera wi aafwanyawo oohara Dila amohiwa, alobwana naari ahiyana, aadhowena oomagiweene oZheruzalemi. 3Voolenddoni waaye, aaddamelaga oDamasiku, mowaaguva waara wookumela odhulu wahimwaapeelelaga. 4Agatongwele vati ahiiwa ndhu niiraga: <<Sawuli, Sawuli, onagiharaharela ddi?>>

5Sawuli ahikohaga, wiira: <<Muli aani, Nabwiya?>>

Oliye ahaakulaga, wiira: <<Di miyo, Yesu, oyene we onamuharahariiwe. 6Ovenye, ovolowe muluwani, onowaaddeliwa yoofwaneelela wiirana>>.

7Alobwana yaaligi ni Sawuli voolenddoni yahiimelaga, kuhaandaga owoga; yahiiwaga ndhu mbwenye kayamoonaga muthu. 8Sawuli ahiimelaga. Agakunuule meento, kaakwanihaga woona elabo. Nuwindo, alobwana ale yahimwihiddeelaga moono, omveleela oDamasiku. 9Ahimala malabo maraaru ahoonaga, kaaja yego naari ong'wa.

10ODamasiku wahikala namasuuza mmohi eethaniwa Ananiya. Nabwiya ahimwiithanaga moorohani#9.10 Oroha wula oneereya muthu agali meento.: <<Ananiya!>>

Oliye ahaakulaga, wiira: <<Gili va, Nabwiya>>.#9.10 Nabwiya Va onaagiwana di Yesu. Moone Meerelo a Arumiwi 9.17.

11Nabwiya ahimwaaddela, wiira: <<Ovenye odhowe rampa oneeriwa Owogoowa. Vaade va Zhuda wamukohedhele mulobwana a oTarusu oneethaniwa Sawuli; vowi onolobela. 12Ahimoonaga mulobwana mmohi eethaniwa Ananiya avolowaga, ahimuhelaga madada aaye wi awelihedhiwe woona waaye>>.

13Ananiya ahimwaakula, wiira: <<Nabwiya, ginowiiwesa wa ajinji dha muthu oyene, dhootakala dhinawiireliiye oweela mirima eenyu oZheruzalemi. 14Odhiile wuno ni owodha ovahiwiiye ni apogo a anamakutha wi aamage athu aatene enooharani yuulobelelagani!>>

15Mbwenye Nabwiya ahiira: <<Dhowa! Ola muthu gimusakuliimi wi alaleyele ndina naaga wa athu oode,#9.15 Athu oode enaagiwana ale ehili aZhudewu. wa mamwene ni wa nlogo na Ezarayeli. 16Gineere gimoonihe monnuwelo a goyi eneeriiye akanne mwaha wa ndina naaga>>.

17Ananiya ahidhowaga, ovolowa mba, omuhela madada Sawuli, wiira: <<Ddibila Sawuli, Nabwiya Yesu owooneyele odila wewo wadhiiwe, ohugiruma wi owelele woona teto odhaaliwe ni Muneba Woweela>>. 18Mowaaguva dhego dhakalagahi manguru dhahimoraga mmeentoni mwa Sawuli, ahambeela woona. Ahivenya, obathiziwa, 19agajile, kopolo dhaaye dhahiwelelagamo. Sawuli ahikala oDamasiku malabo majinjeene ni anamasuuza.

Dhoolaleya dhowambeela dha Sawuli

20Mowaaguva ahambeela olaleya mu nyuba dha matugumano, eeraga: <<Yesu di Mwaana a Mulugu>>. 21Aatene yeewaga yootikina, yookohana, yiiraga: <<Ola kahuwo olene afunesa wanoonga ale yamuhara ni omweebedha Yesu a oZheruzalemi? Kadheele waahidda athu owinda aadhowegena oomagiweene wa apogo a anamakutha?>> 22Mbwenye Sawuli oweenjedhedheya ononelamo, ofiyedha waaviriganiha aZhudewu yakala oDamasiku, vowawooniha wi Yesu dili Kirixtu.

23Vigavirile malabo majinji, aZhudewu yahiiwananela wi empe Sawuli, 24mbwenye Sawuli ahaaddeliwa dhamusasanyedheliisu. Mahiyu ni mutana yowiing'anela va mulago wa nluwa wi empe. 25Mbwenye omahiyuni anamasuuza aaye yahimuhelaga mmuddangani omaga ni mingoyi, omukitihedha ode wa ncinga nuulubale.

Wunnuwa wa gerezha

26Sawuli agafiyile oZheruzalemi, ahisayela otugumana ni anamasuuza, mbwenye aatene yoomoova mwaha wi kayarumeedha wi di namasuuza. 27Vevale Baranabe#9.27 Baranabe enatapulela mwaana oolibiha. ahimuthukulaga omudhowana wa arumiwi, wawaaddela mwemo Nabwiya mooneyeliiye wa Sawuli mundila, mwemo Nabwiya mwawogeliiye ni oliye teto mwemo oDamasiku Sawuli mwalaleyeliiye moohoova mu ndina na Yesu. 28Mowindala Sawuli ookala ni aliwa muZheruzalemi, oolaleya moohoova mu ndina na Nabwiya. 29Oowoga ni orunihana ni aZhudewu yawoga eGerego, mbwenye aliwa yoosayela ompa. 30Addibila#9.30 Addibila enaagiwana addibila mwa Yesu Kirixtu. vanoniliiwa yahimudhowana oSezareya, omurumiha oTarusu.#9.30 Tarusu yaali elabo yabaliwe Pawulo. Yakala oAziya Mung'onong'ono. 31Mudhidhi olene gerezha yahikanna murenddele oZhudeya waatewene, oGalileya ni oSamariya. Gerezha yooliba, yoweedda moomoova Nabwiya, yeeddaga moowaraalihiwa ni Muneba Woweela, mowindala gerezha yowunnuwa.

Oyilihiwa wa muthu ookwa meddo

32Peduru eddeeddaga wula ni wula, ahikitaga ofiya teto wa oweela yakala nluwa na oLida. 33Wewule ahimfwanyaga muthu mmohi eethaniwa Eneya, akonaantile voolilini yaaka tanu ni thaaru, vowi aali ookwa meddo. 34Peduru ahiiraga: <<Eneya, Yesu oli Kirixtu onowuuyiliha! Venya, okune olili waawo>>. Mowaaguva ahivenyaga. 35Aatene yakala oLida oSarona egamoonile yahirugunuwela wa Nabwiya.

Ovenyihiwa wa Dorika muukwani

36Nluwa na oZhope wahikala namasuuza mmohi ndina naaye eeriwa Tabita (ndina nddo mu ewogelo ya eGerego nnatapulela Dorika). Owiiresa dhapama, owaakamihedhesa oorabula. 37Malabo alene ahibulela, okwa, mwiili waaye wahihabihiwaga, oheliwa suubi a odhulu.#9.37 Suubi a odhulu Mmurudda nde nyuba dhiwa dhakanna dhipaddi biili, vati ni odhulu. 38Lida akala waaddamela oZhope, vano anamasuuza veewiligiiwa wi Peduru aali oLida, yahaarumaga alobwana abiili wi yamulobe: <<Ahiribeliwe, adhe wuno>>. 39Peduru ahivenya, odhowa ni aliwa. Vafiyiligiiye, yahimugwelihaga suubi a odhulu. Amaamukwele aatene yahimwaapeelelaga, yuunddaga, emoonihaga mikanjo#9.39 Mukanjo yaali yoowara ya athu aatene alobwana ni ahiyana, ode wiwa wookala yookuneelana. ni dhoowara dhimohi Dorika dhasasanyiliiye akalaga ni aliwa. 40Peduru ahilamulaga wi aatene ekumewo osuubini wule. Nuwindo, ahikokoraga, olobela; orugunuwela muruthu ole, wiira: <<Tabita, kavenya!>> Oliye okunuula meento, vano agamoonile Peduru, ahivenyaga, okaraati. 41Peduru ahimwihiddeelaga ndada, omvenyiha. Vano ahawiithanaga oororomela ni amaamukwele, ahaapelekelaga Tabita agali mugumi. 42Dhoopadduwa nda dhahinoneya oZhope waatewene, ajinji yahimuroromela Nabwiya. 43Peduru ahikala oZhope wewule malabo majinji, vaade va Simawu, oyene asasanya makupa.

Currently Selected:

Meerelo a Arumiwi 9: tke

Highlight

Copy