Meerelo a Arumiwi 6

Osakuliwa wa maddiyakoni atanu ni abiili

1Malabo alene anamasuuza yeenjedhedheyaga, aZhudewu yawoga eGerego yowawaaba aZhudewu yawoga eHeberi, vowi amaamukwele eewa kayapwathiwa vamagawelo dhooja. 2Vevale arumiwi kumi ni abiili ale yahaatugumanya anamasuuza aatene, wiira: <<Kadhinakala pama ohiya olaleya madhu a Mulugu wi nawiimelelege athu vooja. 3Amudhi, mwaasakule vaari veenyu alobwana atanu ni abiili a bili yapama, oodhaaliwa Muneba, atthottho. Naavahe aliwa mabasa ayene, 4vano hiyo nikalele ntidi olobela ni ohidda mabasa a madhu a Mulugu>>. 5Dhoowoga nda dhahaadhivela anamwinji aatene. Yahimusakula Extevawu, muthu oodhaaliwa nroromelo ni Muneba Woweela, yahimusakula teto Filipi, Porokoro, Nikanoro, Timoni, Paramenasi ni Nikolawu avolowile mu eZhudewu, aali a oAntiyokiya. 6Yahaaveleela wa arumiwi, aliwa olobela, waahela madada.#6.6 Waahela madada waali waasakulela mabasa, teto dhatoonyihedha wi Mulugu eere waavaha owodha woohiddana mabasa ale.

7Vano madhu a Mulugu yoomwadheya. Anamasuuza yoweenjedhedheya vajinji mu Zheruzalemi; teto anamakutha ajinji yahirumeedha Muselu Wapama.

Omagiwa wa Extevawu

8Extevawu, oodhaaliwa mahala ni owodha, owiirana dhootikiniha ni dhitoonyihedho dhuulubale vaari va athu. 9Mbwenye yahivenya amohi a mburo weethaniwa Nyuba ya Matugumano Yowooboliwa. Yaali a oSirene, a oAlixandiriya, a oSilisiya ni a oAziya. Athu ala yoovaanyihana ni Extevawu. 10Mbwenye kayaakwanihile omvaanya dhawogiiye, vowi awoga ni tthottho dha Muneba Woweela.

11Vano yahaanyingala alobwana amohi wi yeerege: <<Nihimwiiwa awogaga madhu oonyemula, amunyemulaga Mozezi ni Mulugu>>. 12Mowindo yahitatamula nlogo, asogoleli a mutugumano ni anamasuuziha a malamulo. Vano yahifiya, ommaga Extevawu, omudhowana oNikuruni nuulubale na apogo a aZhudewu. 13Yahiveleela onamoona wooratha, yoowogaga, yiiraga: <<Mulobwana ola kanahiya owoga dhoonyemula mburo woweela ola teto ononyemula Malamulo. 14Nihimwiiwa oliye awogaga, eeraga: <Yesu oyo muNazarethi, onoodha abwanyule mburo ola ni ocenja dhoolemeelela dhedho Mozezi dhinivahiliiye> >>.

15Aatene yakaraatilege Nikuru nuulubale na apogo a aZhudewu yahoonaga kove yaaye efwanafwanaga ni kove ya mungero.

Currently Selected:

Meerelo a Arumiwi 6: tke

Highlight

Copy