Meerelo a Arumiwi 5

Ananiya ni Safira

1Aali mulobwana mmohi eethaniwa Ananiya, ahikalana mwihiyanaaye eethaniwa Safira. Aliwa yahiguliha mudda weewa. 2Mowiiwanana ni mwihiyanaaye ahilogoha epaddi emohi ya korowa nde wi dhikale dhaaye, dhahalile yahidhana, oveleela mmadani mwa arumiwi.

3Mbwenye Peduru ahimukohaga, wiira: <<We Ananiya, orumeedhele ddi wi murima waawo odhaaliwe ni Sathana, ofiyedha onyengetha Muneba Woweela ologoha korowa dhimohi dha mudda waawo wi dhikale dhaawo? 4Mudda oyo ohunagulihe kawaali waawo? Ki ogagulihile korowadha kadhaali muuthongini mwaawo? Ki wuubuwele addi wiira eyene mmurimani mwaawo? We kawaarathele athu mbwenye oxixile omurathele Mulugu!>>

5Vevo Ananiya veewiligiiye madhu ayo ahitongwa, okwela vevo. Athu yeewile dhedho yahoova vajinji. 6Nuwindo, azombwe yahivenyaga, okuneela mwiili waaye, othukulela ode, ologohiwa.

7Dhigavirile wora thaaru, ahivolowa mwihiyanaaye ahinonile yapadduwile. 8Peduru ahimukoha: <<Ogaaddele mutheengo wagulihiliinyu mudda, buulena?>>

Oliye ahaakula: <<Ee, buuyene>>.

9Peduru ahiiraga: <<Mwaha bwaddi mwiiwananela onyengetha Muneba wa Nabwiya? Woone! Vamusiwoni vo manyalo a athu yagele omulogoha mamuno, eneere teto wuuthukulela ode>>.

10Mudhidhi olene ahitongwaga, okwela vamanyaloni va Peduru. Vano azombwe yahivolowa, omfwanya agakwile, omuthukulela ode omulogoha vamohi ni mamune. 11Woova wuulubale wahaadheela athu aatene a gerezha ni athu aatene yeewile dhoopadduwa ndo.

Dhitoonyihedho ni dhootikiniha

12Arumiwi yowiirana dhitoonyihedho ni dhootikiniha dhijinji vaari va athu. Yootugumana ni murima mmohive muKodde mwa Salomawu. 13Kaalivo aliba murima wi atugumanege ni aliwa, mbwenye athu aatene yowaatthettheela. 14Yowiinjiva mookwaranya oororomela yamuroromela Nabwiya, anamwinji alobwana ni ahiyana. 15Athu yowaadhana aredda murampani, waakaraatihaga mmakamani ni mmoolilini wi Peduru aaviraga murinti waaye waafwanyege amohi. 16Yootugumana teto athu ajinji ookumela maluwa owaaddamana ni Zheruzalemi, yowaadhana aredda eewa ni ale yarabulihiwa ni mineba dhabure; athu aatene yooyilihiwa.

Oharahariwa wa arumiwi

17Musogoleli a anamakutha ahivenyaga, vamohi ni akwaaye aatene (a nikuru na aSaduseyi), odhaaliwa nrima, 18yahaahidda arumiwi waafugela mukaambura yoononeya. 19Omahiyuni mungero a Nabwiya, ahifugula misiwo dha kaambura, waakumihedha ode, wawaaddela, 20wiira: <<Dhowani nyuba ya Mulugu, mweemele, mwawaaddelege athu dha madhu maatene a Egumi Ela>>. 21Egeewile dhedho, yahivolowaga nyuba ya Mulugu bebehi, wambeela osuuziha.

Musogoleli a anamakutha agafiyile ni akwaaye ale ahiithaniha mutugumano wa Nikuru nuulubale, ela sowi nikuru na apogo a aZhudewu. Vano yahaarumaga athu wi edhowe okaambura yaadhena arumiwi ale. 22Mbwenye athu ale egafiyilewo kayaafwanyilewo, egawelilewo, yahawaaddela. 23Wiira: <<Nifwanyile kaambura egali yoofugiwene, ebaribareene anamaang'anela egeemelile vamisiwo mbwenye nigafugulile dhisewo, kanimfwanyilemo muthu>>. 24Vevo mpogo a anamaang'anela a nyuba ya Mulugu ni apogo a anamakutha egeewile madhu alena yahihaleeliheya, wuubuwelelaga, wiira: <<Ki epadduwile ddi?>>

25Ahifiya muthu mmohi, wiira: <<Moone, alobwana ale yaafugeliinyu mukaambura, yiimelile vathaddo va nyuba ya Mulugu, enaasuuziha athu>>. 26Vevo anamaang'anela ni mpogo eewa yahidhowaga waathukula arumiwi ale, mbwenye kayaathukule mwa kopolo naari, vowi yawoova athu wi enaavonye ni mabwe.

27Egaafiyilena yahawiimelihaga vameentoni va Nikuru nuulubale na apogo a aZhudewu. Vano musogoleli a anamakutha ahaakohaga, 28wiira: <<Hiyo kanokooddihileni wi kamusuuzihege ndina na Yesu? Mbwenye moone, nyo muhudhaaliha mu Zheruzalemi mwaatemwene ni dhoosuuziha dheenyu, munafuna onidheelana muladdu wa mwazi wa muthu ola>>.

29Peduru ni arumiwi amohi yahaakulaga, wiira: <<Enofuneya omwiiwelela Mulugu ohiya omwiiwelela muthu! 30Mulugu a makolo eehu ahimvenyiha muukwani Yesu oyene mwampiliinyu, mmukomela vamuraddini. 31Mulugu ohumugweliha wi akale Kingi ni Mvulumusi, omukaraatiha omoononi waaye wooja wi avahege otthwaruwa ni oleveleliwa dhoothega aEzarayeli. 32Hiyo nili anamoona a dhoopadduwa dhedhi teto Muneba Woweela, oyene Mulugu waavahiliiye ale enamwiiwelela>>.

33Egeewile ndo yahitakaleliwaga, ofunaga waapa. 34Mbwenye mFarizi mmohi, eeriwa Gamaliyeli, namasuuziha a malamulo, ariihiwa ni athu aatene, ahiimelaga va Nikuru nuulubale na apogo a aZhudewu, ahilamulaga wi arumiwi ale ekumihiwemo mudhidhi vang'ono. 35Oliye ahiiraga: <<Alobwana, aEzarayeli, muubuwelele pama dhinafuniinyu wawiirela athu ala. 36Malabo amundduli ahikumelela muthu mmohi eeriwa Tewudasi, axixile wiivuwiha, athu owaakwana mazana mannayi (400) yahimurumeedha. Oliye ahipiwa, aatene yamuhara yahibalaleya, omaala. 37Dhigeereye ndo, malabo oolebela ahikumelela mmohi muGalileya, eeriwa Zhuda asogolela nikuru nimohi nowiinyuwela. Oliye teto ahipiwa, aatene yamuhara yahibalaleya. 38Mowindo va mwaha olena miyo ginowuubebeedhani mwaahiye alobwana ala mwa murenddele. Akala dhoofuna naari dhowiira dheewa dhinakumela mwa muthu dhinomala. 39Mbwenye akala dhinakumela wa Mulugu, nyo kamunaakwaniha omariha. Pole-pole, munaadhe muwanege ni Mulugu>>.

40Aliwa yahirumeedhela dhoowoga dha Gamaliyeli. Yahawiithanaga arumiwi ale, waawaxula, waahiiha wi ehiwogege ndina na Yesu. Vano yahaahiya odhowaga.

41Arumiwi yahivenyavo va Nikuru nuulubale na apogo a aZhudewu ni ohagalala, mwaha wowi Mulugu ahaweelengela okala oofwaneelela onyemuliwa mwaha wa ndina na Yesu. 42Mbwenye malabo maatene mu nyuba ya Mulugu ni mmavade kayahiyile osuuziha ni olaleya Muselu Wapama wi Yesu di Kirixtu.

Currently Selected:

Meerelo a Arumiwi 5: tke

Highlight

Copy