Meerelo a Arumiwi 4

Othongiwa wa Peduru ni Zhuwawu

1Peduru ni Zhuwawu ewogagave ni athu, yahidha anamakutha amohi ni mpogo a anamaang'anela a nyuba ya Mulugu ni aSaduseyi. 2Aliwa yaali ootakaleliwa mwaha wi arumiwi abiili ala yowaasuuziha athu ni olaleyela wi mwa Yesu muhukala ovenyihiwa muukwani. 3Mowindo yahaahidda Peduru ni Zhuwawu vowi wahiriba yahaafugela ofiyedha bebehi. 4Mbwenye athu ajinji yeewile madhu ale yahiroromela. Wiinjiva wa alobwana yaroromele yaali vakukuuve macikwi matanu (5.000).

5Ode ogasile apogo a aZhudewu, asogoleli eewa ni anamasuuziha a malamulo yahitugumanaga oZheruzalemi. 6Yaaligi vevale Annasi, musogoleli a anamakutha ni Kayifa, Zhuwawu, Alixandere ni amohi yaali a emudhi ya musogoleli a anamakutha. 7Yahidhoweliwa waadhana vameentoni veewa Peduru ni Zhuwawu, wambeela waakoha: <<Owodha baani naari ndina nawani muneeriinyuna dhego dhi?>>

8Peduru, agadhaaliwe Muneba Woweela, ahawaakula, wiira: <<Nyo apogo ni asogoleli, 9munanikoha hiyo peeno dha mayilihelo a muthu ooragala ola. 10Munone nyo mwaatene, munone teto aEzarayeli mwaatene wi mwa ndina na Yesu Kirixtu muNazarethi, oyene amukomeliinyu, Mulugu amvenyiha muukwani, mwa ndina naaye thimuyilihe muthu ola wiimelile vameentoni veenyu. 11Yesu ola,

<thi nibwe nakooddiliinyu, nyo anamamaga nyuba,

ndda nihisadduwa okala nibwe noohiddeela nyuba>.#4.11 Masaalimu 118.22.

12Kalivo mmohi naari onavulumusa. Vowi elabo ya vati, kanilivo ndina nimohi nivahiwe vaari va athu wi nivulumusiwena>>.

13Apogo ale yahitikiniheya vowoona oliba murima wa Peduru ni Zhuwawu teto voonona wi yaali athu yahasuuzile malamulo, odidela wi yakalesa ni Yesu. 14Vano vomoona muthu ole ayilihiwe ageemelile vakukuuve ni Peduru ni Zhuwawu, kayaandile waavaanya. 15Mowindo yahaalamula wi evenyevo vamutugumanoni, ohala ekohanaga aliweeneve, 16yiiraga: <<Nawiirele ddi alobwana ala? Vowi aatene enakala mu Zheruzalemi ehinona wi ehiirana etoonyihedho yootikiniha vameentoni va nlogo, kannaande ovaanya. 17Mbwenye vowoova wi bili ela enamwadheyele mwaatemwene, naawaraalihe, mowawoopopiha wi ehiwelele owoga ni muthu mu ndina na Yesu>>.

18Egeere ndo yahaawiithana waalamula, wiira: <<Ehidhe eromola naari osuuziha dha ndina na Yesu>>. 19Mbwenye Peduru ni Zhuwawu yahawaakulaga, wiira: <<Othonga wa Mulugu oni avi, eli pama wuwiiwelelani nyo naari omwiiwelela oliye? Muthonge. 20Kadhinaandeya wi hiyo nihiye owoga dhego dhooniliihu, dhiiwiliihu>>.

21Egawoopopihile mookwaranya yahaahiya wi edhowege, kayaandile wawooniha goyi mwaha wa nlogo, vowi noomuthithimiha Mulugu mwaha wa nde dheereyile. 22Muthu oyo ayilihiwe ni etoonyihedho yootikiniha ele, anna yaaka dhookwaranya makumi mannayi.

Olobela wa oororomela

23Peduru ni Zhuwawu egatapuliwe yahiwelela wa akwiiwa, wawaaddela dhaatedhene dhawogiliiwa apogo a anamakutha ni asogoleli a aZhudewu. 24Egeewile dhedhi yahigweliha madhu eewa wa Mulugu ni murima mmohive, yiiraga: <<Kingi di nyo, mpaddusile odhulu ni elabo ya vati, nyaza ni dhaatedhene dhili mwemo, 25nyo mwahiwoga mwa Muneba Woweela odheela mwa mwiimeleli eenyu, babiihu Davidi mwiiraga:

<Mwaha bwaddi malogo enatakaleliwiiwa

ni malogo eneenyuuwela ebeweene?

26Mamwene a elabo enovenyedha, anamathonga ehitugumanela,

omvenyedha Nabwiya, omvenyedha oosakuliwa aaye>.#4.26 Masaalimu 2.1-2.

27Ebaribareene Heroddi ni Pontiyo Pilatu, vamohi ni athu oode ni aEzarayeli yahitugumana muluwani mu, omvenyedha mwiimeleli eenyu oweela murima Yesu, amusakuliinyu. 28Aliwa ehiirana dhaatedhene nde kopolo dheenyu ni owodha weenyu wasasanyedhiliinyu wale wi dhiireye. 29Vano Nabwiya, moone woopopihiwa weehu, munikamihedhe amwiimeleli eenyu niwogege madhu eenyu mooliba murima, 30mutadeele madada eenyu wi athu eyilege, dhiireyege dhitoonyihedho dhootikiniha, odheela mu ndina na mwiimeleli eenyu oosakuliwa>>.

31Egamalile olobela, mburo olene watugumanigiiwa wahithikeyaga. Aatene yahidhaaliwa Muneba Woweela, wambeela olaleya madhu a Mulugu mooliba murima.

Omohi wa oororomela

32Nikuru naatenene na oororomela naali na murima mmohive ni moobuwelelo mamohive. Kaalivo muthu eera: <<Nda dhinniimina saaga-saaga>>, mbwenye kadda muthu ooveleela dhaaye wi dhikale dha athu aatene. 33Arumiwi yowiirela onamoona ni kopolo dhuulubale wi Nabwiya Yesu ahivenyihiwa muukwani, mahala yaali ni aliwa aatene. 34Vaari veewa kavaali muthu ootuweliwa yego, mwaha wi ale yanna mudda naari nyuba yooguliha odhana korowadha, 35oveleela wa arumiwi, vano yoomugawela kadda muthu mooligana ni ohaleeliwa waaye.

36Wahikala muthu mmohi a nlogo na aLeevi a oXiperi, eeriwa Zhuuze, oyene arumiwi yamuthwiliiwa ndina na Baranabe, nnatapulela <<mwaana oolibiha murima>>. 37Ahiguliha mudda wanniiyena, odhana korowadha, oveleela wa arumiwi.

Currently Selected:

Meerelo a Arumiwi 4: tke

Highlight

Copy