Meerelo a Arumiwi 3

Oyilihiwa wa muthu abaliwe ni meddo dhookwadhene

1Nlabo nimohi Peduru ni Zhuwawu egwelaga edhowaga nyuba ya Mulugu mudhidhi wa malobelo (wora thaaru dha ciguwo). 2Athu amohiwa yoomuthukulelesa vamulago va nyuba ya Mulugu mulobwana ookwa meddo mbaliwelo. Malabo maatene yoomukaraatihesa vevale, vamulago weeriiwa Mulago Wooriya wi oliye aalobege korowa ale yavolowa mu nyuba ele. 3Oliye agawoonile Peduru ni Zhuwawu evolowaga nyuba ya Mulugu ahaalobaga korowa. 4Aliwa yahimusugwesesa, vano Peduru ahiiraga: <<Onisugwe hiyo!>> 5Oliye ahaasugwaga ajejihedhaga waakela yego wa aliwa.

6Mbwenye Peduru ahiiraga: <<Kaginna parata naari oro mbwenye ginniimina, ginowuuvaha. Mu ndina na Yesu Kirixtu, muNazarethi, weedde!>> 7Vevale Peduru ahimwihiddeelaga ndada na moono wooja, omwiimesa. Mowaaguva manyalo aaye, dhipothokoro dhaaye dhahilibaga. 8Ahivenyaga mwa kopolo, wiimela, wambeela weedda. Vano ahivolowaga vamohi ni aliwa mu nyuba ya Mulugu, eeddaga, alupaga, amutamaalaga Mulugu.

9Athu aatene vamooniligiiwa eeddaga amutamaalaga Mulugu, 10yahimudidelaga wi duuleene akaraatesa alobaga korowa va Mulago Wooriya wa nyuba ya Mulugu. Aatene yahirurumuwaga, otikinaga ebaribareene ni dhedho dhamwiireyele.

Olaleya wa Peduru mu nyuba ya Mulugu

11Ooyilihiwa ole ahimuwadeelelaga Peduru ni Zhuwawu, vano athu yatikinaga, yahaathamagelaga aliwa omburoni weethaniwa Nikodde na Salomawu. 12Yoonaga nde, Peduru ahiiraga: <<AEzarayeli, mwaha bwaddi munatikina nda? Mwaha bwaddi munanisugweliinyu wona omweeddihile muthu ola di hiyo ni kopolo dheehu, naari thagaraga dheehu? 13Mulugu a Abarahamu, a Ezaaki ni a Yakobo, Mulugu a makolo eehu, ohumuthithimiha mwiimeleli aaye Yesu, oyene ampelekiliinyu wi apiwe, mwahimukoodda vameentoni va Pilatu, naari athongileve wi Yesu atapuliwe. 14Mbwenye nyo omukoodda Yesu, Oweela murima Apama. Oloba wi mutapuleliwe namapa. 15Nyo mwahimpa Namavaha egumi, oyene Mulugu ohumvenyiha muukwani. Hiyo nili anamoona a dhedho! 16Mwaha woororomela ndina na Yesu, ndina nenddo thiirihile wi mulobwana ola munamooniinyu, omunoniliinyu ayile. Odheela mwa nroromelo mwa oliye thimvahile egumi yowaakwana wona mwaatene munamooneliinyu.

17<<Amudhaaga, dhiinova miyo gihinona wi nyo ni asogoleli eenyu mwiirilena dhedhi mwaha woohunonelamo. 18Mbwenye Mulugu ohaakwaneliha odheela mwa mukalelo wa dhedho dhawogiliiye ni anamavuhulela aatene wi Kirixtu onoodha arabulihiwe. 19Mutthwaruwe mirima dheenyu, muwelele wa Mulugu wi dhithimihiwe dhoothega dheenyu, 20mowindo midhidhi dhoovuma dhinoodha vameentoni va Nabwiya teto oorumihedheni Kirixtu, oyene oosakuleliiyeni, oli Yesu. 21Eli yoofuneya wi oliye akale odhulu ofiyedha waakwanele mudhidhi oyene Mulugu oneeriiye awomihedhe dhaatedhene. Eli wona mwawogeliiye odheela mwa anamavuhulela aaye oweela mirima. 22Vowi Mozezi ahiira: <Nabwiya Mulugu oneere omusakula mmohi vaari va emudhi yeenyu wi akale namavuhulela eenyu wona miyo; mmwiiwelelege mwa dhaatedhene dhinowaaddeligiiyeni.#3.22 Deteronomiyo 18.15. 23Oyene ohunamwiiwelelege namavuhulela ole onoodha abwanyuliwe mowindo avenyihiwe va mulogo waaye>.#3.23 Deteronomiyo 18.19.

24<<Anamavuhulela aatene, wambeela Samuweli, ofiyedha yadha mundduli, yahiwoga, yoolaleya dha malabo alena. 25Nyo muli ahima a anamavuhulela, ahima a nipangano Mulugu neeriliiyena ni abaabi eenyu awogaga ni Abarahamu, eeraga: <Odheela mwa anamabaliwelamo#3.25 Anamabaliwelamo Naari wi: namabaliwelamo. aawo malogo maatene a elabo ya vati enoodha ereelihiwe>.#3.25 Wambeela 22.18. 26Mulugu agamvenyihile muukwani Mwiimeleli aaye, ambeele omuruma wa nyo wi ooreeliheni, ootthwaruwihagani dhoothega dheenyu>>.

Currently Selected:

Meerelo a Arumiwi 3: tke

Highlight

Copy