Meerelo a Arumiwi 2

Wambeeleya wa gerezha nlabo na Pentekoxte

1Vano nigafiyile nlabo na Pentekoxte, aatene yaaligi vamohive, mburo mmohive. 2Mowaaguva odhulu wahiiweya oruma, wakalagahi oruma wa pevo yuulubale, wahidhaala nyuba yaatene mwakaraatiligiiwa. 3Vano yahoona dhakalagahi wona malumi a munddo, omwadheya, okala va kadda muthu. 4Aatene yahidhaaliwaga Muneba Woweela, wambeela owogaga dhiwogelo dhimohi mooligana ni Muneba mwawogiheliiwa. 5MuZheruzalemi mwahikala aZhudewu yamweebedha Mulugu, yakumile malogo maatene a elabo ya vati. 6Ogeeweyile oruma wule, mulogo wahitugumana okala wootikina mwaha wi kadda muthu awiiwaga ewogaga ni ewogelo yaaye. 7Athu aatene ohaleeliheya ni otikina, aliwa yookohanaga: <<Ala aatene enawoga kahuwo aGalileya? 8Ki mwaha bwaddi kadda muthu mwa hiyo awiiwaga ewogaga ewogelo ya elabo ebaliwiiye?>> 9(Yaali aPariti, aMediya, aElemi ni ookala oMesopotamiya, oZhudeya ni oKapadosiya, oPonto, oAziya, 10oFirizhiya, oPamfiliya, wEgubuddu ni a dhipaddi dha oLibiya waaddamela oSirene, amohi aleddo aRoma. 11Amohi mwa hiyo nili aZhudewu woobaliwana, amohi oovolowamo,#2.11 Oovolowamo yeeriwa aporoselitu ale yarumeedha obathiziwa, okutha mu nyuba ya Mulugu ni yahiineliwa. amohi aKereta, aArabe.) <<Hiyo nnowawiiwa ewogaga dhootikiniha dha Mulugu ni dhiwogelo dheehu-dheehu>>. 12Aatene yahitikina ohaleeliheya, yookohanaga kadda muthu ni mukwaaye yiiraga: <<Elaya enatapulela ddi?>> 13Vano amohi yowaabeddaga, yiiraga: <<Ala emulezele vinyu>>.

Olaleya wa Peduru

14Mbwenye Peduru ahiimelaga vamohi ni ale kumi ni mmohi, vano oliye ni ndhu nootaama ahiwogaga ni aZhudewu, wiira: <<Nyo alobwana a oZhudeya ni nyo mwaatene munakala oZheruzalemi wuno, mmaale wi guwaaddeleni. Mvuruwane pama. 15Kahuwo mwemo wona munoobuweliinyu, athu ala kiire olezela, vowi mudhidhi oli wora tanu ni nnayi dha bebehi! 16Ela eneereya siyeene yawogile namavuhulela Zhoweli, yeeriliiye:

17<Mulugu wiire: Malabo oomariha ginoodha gikuthulele

Muneba waaga mmirimani mwa athu aatene,

azombwe ni anamwali eenyu eneerege ovuwiha mutheenga waaga,

Azombwe eenyu eneerege woona dhootikiniha dha Mulugu,

anakalaba eneerege oroha dhoovuhulela.

18Wa amwiimeleli aaga aalobwana ni aahiyana

gineere waakuthulela Muneba waaga malabo ayene,

vano aliwa eneerege ovuwiha mutheenga waaga.

19Gineere wiirana dhootikiniha odhulu ni elabo ya vati,

mwazi, munddo, ni murabo woothuwa mwiisi.

20Nduwa nnoodha nsadduwe epipi,

mweeri onoodha osadduwe mwazi

nihinafiye nlabo noothithimiheya na Nabwiya.

21Vano aatene ayene eneethane

ndina na Nabwiya eneere ovulumusiwa>.#2.21 Zhoweli 2.28-32.

22<<Nyo aEzarayeli, vuruwanani madhu ala. Yesu muNazarethi ohuvuwihiwa ni Mulugu vameentoni veenyu. Ohuvuwihiwa odheela mwa dhootikiniha ni dhitoonyihedho dhedho Mulugu dheeriiyena vaari veenyu odheela mwa oliye wona munoneliinyu. 23Yesu ola ahipelekiwa wona mwemo Mulugu mwasasanyedheliiye, vano nyo ompa, omukomela vamuraddini mookamihedhiwa ni athu ooholowa. 24Mbwenye Mulugu ahimvenyiha muukwani. Opadha mingoyi dhookwa vowi dhaali dhohaandeya wi okwa omuwadeelele. 25Vevale Davidi awogaga dha Yesu, ahiira:

<Goomoonave Nabwiya vameentoni vaaga.

Oliye oli omoononi waaga wooja, mwaha wowi gihithikeye.

26Fivevo murima waaga onohagalala,

nlumi naaga nnothaba;

mwiili waaga teto oneere ovuma moojejiha,

27vowi kamunaahiye egumi yaaga mburo wa anookwa,

kamunaamwihiye Oweela eenyu avudde.

28Nyo muhuginoniha dila dha egumi,

muneere ogidhaaliha ohagalala vookala ni miyo>.#2.28 Masaalimu 16.8-11.

29<<Amudhaaga, mugihiye guwaaddeleni mwa ebaribari dha nikolo neehu Davidi. Oliye ahikwa, ologohiwa, nsiye naaye nili vaari veehu ofiyedha peeno. 30Mbwenye oliye aali namavuhulela, ahinona wi Mulugu ahimuroromeliha mwa olibela wi eere omuhabihavo mmohi wa anamabaliwelamo a Davidi vampanddoni vaaye. 31Davidi aganonile ndo, ahiwoga dha ovenyihiwa muukwani wa Kirixtu wi kaahiyiwe mburo wa anookwa, naari mwiili waaye kawavuddile. 32Yesu ola Mulugu ahimvenyiha muukwani, hiyo nili anamoona a dhedho. 33Vano Yesu vavuwihiwiiye omoononi wooja wa Mulugu, ahaakela wa Ababe, Muneba Woweela waroromelihiwiiye, ahikuthulela dhedho dhinooniinyu, dhineewiinyu. 34Vowi Davidi kaagwelile odhulu, mbwenye oliyeene ahiwoga:

<Nabwiya Mulugu ahiwoga wa Nabwiya aaga:

Okaraati omoononi waaga wooja

35ofiyedha amwiiddani aawo eheliwe

vati va manyalo aawo>.#2.35 Masaalimu 110.1.

36<<Mowindo, aEzarayeli aatene enone ebaribareene wi Yesu, oyene mwamukomeliinyu vamuraddini, Mulugu ohumusakula okala Nabwiya ni Kirixtu>>.#2.36 Mulogo wa aEzarayeli woomujejihedha Kirixtu wi aavulumuse, mbwenye Yesu agabaliwe aEzarayeli kayeewelelemo wi Kirixtu onamujejihiisu duuleene adhiile wa aliwa malabo alene.

Omwadheya wa gerezha

37Aliwa veewiligiiwa nda yahikukumuwaga mmurimani, yahimukohaga Peduru ni arumiwi amohiwa, wiira: <<Ki vano nneere ddi, addibila?>>

38Peduru ahawaakulaga, wiira: <<Tthwaruwani dhoothega dheenyu, kadda muthu abathiziwe mu ndina na Yesu Kirixtu, muneere oleveleliwa, muneere waakela mvahi oli Muneba Woweela. 39Vowi yoororomeliha#2.39 Yoororomeliha enawogiwa va enaagiwana Muneba Woweela, oyene Mulugu waaroromelihiiye waavaha ale enatthwaruwa dhoothega dheewa. sa nyoovo, aniinyu teto ni wa athu aatene eli woolapela ni athu aatene ayene Nabwiya Mulugu eehu eneyiithaneliiye>>.

40Peduru aheenjedhedha owoga madhu mamohi a onamoona, waalibiha, eeraga: <<Muthawe wi mwiivulumuse wa anamabaliwelamo ala ooholowa>>. 41Vevale athu yeewelele madhu aaye yahibathiziwa, nlabo nendde dhigumi macikwi maraaru (3.000) dhaheenjedhedheya va nikuru neewa.

42Athu ale yoodidela dhedho arumiwi dhasuuzihiiwa, yoodidela waandana, yoogwaddanya mukaathe vamohi,#2.42 Yajela vamohi wona emudhi. Yamala oja teto yowiirana yooja ya Nabwiya. ni olobela vamohi. 43Athu aatene yoomoova Mulugu, arumiwi yowiirana dhootikiniha ni dhitoonyihedho dhijinji. 44Ale yaroromela yakala vamohi, yootaganyihedha dhookalana dheewa. 45Yooguliha midda dheewa ni dhookalana dhimohi korowadha waagawelaga ale yahanna, mooligana ni ohaleeliwa wa kadda muthu. 46Malabo maatene yootugumana mu nyuba ya Mulugu ni murima mmohive. Yoogwaddanya mukaathe vamohi mmavade mweewa, moohagalala ni mirima dhoopwaasa, 47emutamaalaga Mulugu. Athu aatene yoodhiveliwa ni aliwa. Nlabo ni nlabo Nabwiya owaweenjedhedha ale yavulumusiwa.

Currently Selected:

Meerelo a Arumiwi 2: tke

Highlight

Copy