Zabbuli 38
38
Zabbuli ya Dawudi, ey'okujjukiza.
Okusaba okuwonyezebwa
1Ayi Mukama, tonnenya mu busungu bwo,
Tombonereza ng'okambuwadde.#Zab 6:1
2Onfumise n'obusaale bwo,
Onkubye ne ngwa wansi.#Zab 6:4; 32:4
3Temuli bulamu mu mubiri gwange olw'okunyiiga kwo;
Omubiri gwange gwonna gulwadde olw'ebibi byange.#Zab 31:10, Is 1:6
4Nzitoowereddwa ebibi byange,
Biri ng'omugugu omuzito ennyo.#Ezer 9:6
5Ebiwundu byange biwunya era bivunze,
Olw'obusirusiru bwange.
6Nfunyiddwa ne ngalamizibwa wansi,
Nkaaba obudde okuziba.#Zab 35:14, Is 21:3
7Kubanga ekiwato kyange kijjudde okwokya;
So temuli bulamu mu mubiri gwange.#Zab 38:3
8Nnyongobedde, mmenyesemenyese,
Nsinda olw'obuyinike obuli mu mutima gwange.
9Ayi Mukama, bye njagala byonna obimanyi,
N'okusinda kwange okuwulira.
10Omutima gwange guntundugga,
amaanyi gange gampweddemu.
Amaaso gange,
tegakyalaba.#Zab 6:7
11Mikwano gyange ne baliraanwa tebakyansemberera, olw'ebiwundu byange.
Ne baganda bange banneesuula.#Zab 88:10, Mak 15:40, Luk 10:31,32
12Abaagala okunzita bantega emitego,
N'abo abanjagaliza obubi banjogerera eby'ettima.
Buli kiseera bansalira enkwe.#2 Sam 16:7,8; 17:1,3, Zab 35:20, Mak 12:13
13Naye nze ndi nga kiggala, ssiwulira;
Era ndi nga kasiru, sikyayogera.#Zab 39:2,9, Is 53:7, 1 Peet 2:23
14Mazima, nninga omuntu atawulira,
Atasobola kwanukula.
15Ayi Mukama, nneesiga ggwe,
Ayi Mukama Katonda wange, ggwe onoonnyanukula.#2 Sam 16:12, Zab 39:7
16Nkusaba nti toleka balabe bange kusanyuka olw'obuyinike bwange.
Tobaganya kunneewaanirako nga ngudde.#Zab 13:4
17Ndi kumpi okugwa,
Ndi mubulumi obutasalako.#Yer 20:10
18Njatula ebibi byange,
Nnaanakuwala olw'okwonoona kwange.#Zab 32:5, 2 Kol 7:9,10
19Abalabe bange balamu, ba maanyi.
N'abo abankyayira obwereere bangi.
20Abo abansasula obubi olw'obulungi
Be balabe bange, kubanga nfuba okukola ebirungi.#Zab 35:12; 109:4
21Tondeka, Ayi Mukama,
Ayi Katonda wange, tombeera wala.#Zab 22:11
22Yanguwa okunnyamba,
Ayi Mukama, obulokozi bwange.#Kuv 15:2, Zab 40:13, Is 12:2
Currently Selected:
Zabbuli 38: LBR
Highlight
Share
Copy
Want to have your highlights saved across all your devices? Sign up or sign in
All rights are reserved to the Bible Society of Uganda.
