Psalms 90
90
Sisamaŋat Makpiġaat Psalms-mi
(Psalms 90—106)
God-ikun Iñuktigullu
Aŋaiyyutaa Moses, iñuŋata God-im.
1Ataniiq, qaŋapak tavra irvigisuugiptigiñ kiŋuniġiipayaaqtuani.
2Iġġich savaaguŋaiñŋaisa
naakkaunnii nuna iluqaan savaŋaiñŋaan,
isuaniñ qaŋa God-aurutin isuanun aglaan.
3Iñuich avyuġuqtitqiksittaġigitin,
uqaqłutin, “Utiġitchi avyuġutqiġḷusi iñuuruasii.”
4 #
2 P 3.8. 1,000 ukiut ittut atausitun uvlutun iligni;
arriqaqtut unnugmatun,
sivikitchuatun kiavallagniqtun.
5Uaġaġigiptigut uliqpaktun;
siññaktuqtiqsiññaqtuatun ittaqtugut.
Ivigaatun ittugut nausaqtuatun uvlaami;
6nauvluni ivigaaġuġaqtuq,
aasii panaqłukługu tuqulimmivḷuni anaqammagu.
7Qinnautikpich suksraunġiġaġigaatigut;
tatamaalaraqtugut iqsigivlugu qinnautiqpaiñ.
8Inillaŋagitin piḷuutivut sivuġaġnun,
nalunaqtuami piḷuusiqiavut tautukkumiñaqsivḷugich ilignun.
9Iñuggutiuraġniaqput qinnautikpich kipiraġigaa;
iñuggutaiḷḷagaqtugut aniqsaapagniqtun.
10Iñuuniksratualuvut tavra piŋasukipiaq qulit (70) ukiut;
suaŋŋatiqaġupta sisamakipiaguyumiñaġmiut (80);
aglaan tavra iñuulluataġniptigni qaġġirriraġigaatigut iḷuiḷḷiuġunmiglu isumaaġunmiglu;
iñuggun nuŋunasuaġaqtuq, aasii piiqł̣uta.
11Kia iḷitchuġiŋavauŋ suaŋŋataa qinnautikpich?
Kia iḷisimavauŋ sivuuqqan iḷisuuruaq qinnaliqavich?
12Iḷisauttutigut qanutun naisuurautilaaŋanik iñuggutikput, isumatusiyumaugut.
13Qanutun suli sivisutigiruamik qinnautin inniaqpa?
Naglikkutiqallagniaġiñ, Atanġuruatiin, kivgaġnun!
14Immiqsimaaqtigut uvlaatuaġaġikpan nakuaqqutiġpagnik,
atuutiqaġumaugut suli quviasuutiqaġluta iñuuniqtutilaaptiktun.
15Quviasuutiksritchigut sivisutilaaŋatun ipiqtusuutiqaqtitkaptigut,
iluqaiññi ukiuni iłuiḷḷiuġutiqaŋatilaaptiktun.
16Uvagut, kivgauruagut iliŋnun, qiñiqtittigut kamanaqtuanik savaaġnik;
kiŋuvaaġirapta qiñiġumagaat qaumanġa suaŋŋatikpich.
17Ataniiq God-tiiŋ, quviasaaġutitin uvaptinniillich.
Piḷḷuatautiqaqtittigut suraġaġnipayaaptinni!
Piḷḷuatautiqaqtittigut suraġaġnipayaaptinni!
Currently Selected:
Psalms 90: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
