Psalms 89
89
Atuun Nunaqpauruat Iłuiḷḷiuġutiqaqtillugich
Poem aglaaŋa Ethan-gum Ezrahite-guruam.
1Atanġuruatiin, atuutiginiaġiga taimuŋaaglaan nakuaqqutin;
Quliaqtuaġiniaġiga iḷumun ittuaguniġiñ taimuŋa kiŋuniġiiksuaguruanun.
2Iḷisimaruŋa nakuaqqutin inniaqtilaaŋanik taimuŋaaglaan,
iḷumun ittuaguniġiñ nutim ittuaq inniaqtuq qiḷaktuttauq.
3Uqallaŋarutin, “Inillaiŋaruŋa sivunniuġunmik iñuksraqtaġiŋaramnun;
Unniqsuqłiiŋaruŋa kivgaġiramnun David-mun,
4 #
2 S 7.12-16; 1 Ch 17.11-14; Ps 132.11; Ac 2.30. ‘Kiŋuniitin ataramik umialgułhaiññaġuuniaqtut;
suli aquppivigiran inillagniaġiga kiŋuniġiipayauraqtaġnun.’”
5Qiḷaich atuutigigaich aliuġnaqtuat savaaġisuuratin;
ilumutuuqtuaġuniġiḷḷu atuutigiraġigaat salumaruat ilaaguaqtauŋaruat katittaġigamiŋ.
6Kiñami imña qiḷaŋmi iliktun inniaġniqpa, Ataniiq?
Nalliat unnii qiḷaŋmiittuat nalliummatiŋitchuq iliŋnun.
7God atqunaqługu qiksigiraksrauruq ilaaguaqtauruani salumaruani;
iluqapayauraġmiŋ taluġiugaqtuksraġigaat qiksigilugulu.
8Ataniq God Sapiġñaqtuaguruatiin, allamik piitchuq suaŋatigiruamik iliktun;
supayauraġniġni ilumutuuqtuagurutin, Ataniiq.
9Aŋalatkin suamaruaq taġiuq;
qaiḷḷiqpakkaluaġman, quunniġuqtillagiñ.
10Siquvyataġigiñ Rahab, niġrułłuk taġiumi, aasii tuqułługu;
Suaŋŋatiqpagnik siaminŋagitin akiḷḷitin.
11Qiḷak pigigiñ, nunalu;
savaŋagiñ nuna sunapayauraġlu nunamiittuaq.
12Savaaġiŋagikkiñ salliñaaġlu kiluliñaaġlu;
Mount Tabor-lu Mount Hermon-lu attualaniaqtuk quviasuunmi atqiñ pisigilugu.
13Qanutun talġiñ suaŋŋatiqapiallaktuq! Argaiñ suaŋammiuq! Suli taliqpiiñ argaiñ qutchiksuagupiallaktuq!
14Umialgutin maŋŋuqaqtuq nalaunŋarualiqinikun suli pitqiksiġautaitchuakun;
piqpakkullu iḷumutuuġniġiḷḷu nalunaitchuk suraġaġnipayauraġni.
15Qanutun quviasuktigivat iñuich nanġairuat iliŋnik atuutitigun,
iñuusiqaqtuat qaumanġani nayuqłiatiniqpich, Ataniiq!
16Ilvich pisigivlutin quviasugaqtut uvluqtutilaaŋatun,
nanġaqtuaqłutin pisigivlugu nalaunŋaruaguniġiñ.
17Kamanaqtuanik akimmatiqaqtittaġigivsigut;
iviġaglutin quviasualaraqtugut akimmanmi.
18Ilvich, Atanġuruatiin, naliġaŋagiñ sapunniaqtikput;
Salumaruaguruatiin God iñuŋiññun Israel, umialiksriñŋagiptigut.
God-im Unniqsuqłiisaa David-mun
19Qiñiqtuuraatigun iŋiḷġaan uqautiŋagitin iḷumutuuqtuaġiraġnun,
“Ikayuŋagiga aŋuyaktiqpauruaq;
Qaiñŋagiga aquppiutaqpak naliġaamnun iñugiraġniñ.
20 #
1 S 13.14; Ac 13.22;
1 S 16.12. Kivgaġa David umialiguqtinŋagiga
uqsruqtaaqługu salumaruamik uqsrumik.
21Suaŋŋatiga ataramik ilaaniinniaqtuq,
suaŋŋatigma saŋŋisipkaġniaġaa.
22Akiḷḷiŋisa pisaasuġmiaġniaŋitkaat;
pigiiḷḷiqirauruat akiisinniaŋitkaat.
23Suksraunġiġniaġitka akiḷḷiŋich
suli tuqullugu kiñapayaaq uumiksriruaq ilaanik.
24Iḷumutuuġutikullu nakuaqqutikullu itqatiginiagiga;
Akimmatiqałhaiññaqtinniaġiga.
25Argaŋich inillagniaġitka qulaanun taġium,
Agliḷaaġniaġiga sivitchuqtaaġlugu umialguviŋa Mediterranean-miñ Euphrates kuuŋanunaglaan.
26David-gum uqallautiniaġaaŋa,
‘Aapagigikpiñ suli God-igivlutin;
munaqsrigigikpiñ suli annaurrigigikpiñ.’
27 #
Rev 1.5. David aŋayukłiuniaqtuq iġñimniñ,
kamanaġniqtauluni umialipayaaniñ nunami.
28Taŋŋiġuuniaġiga unniqsuqłiisiga ilaanun,
suli sivunniuġutiga ilaanun inniaqtuq isuitchuamun.
29David-gum kiŋuniiŋich inillaktauniaqtut taimuŋaaglaan;
kiŋuniiġiraŋich umialiusuuniaqtut.
30“Kiŋuniiŋisa aglaan kamagiŋitpatigik pitquratka,
suli maliġuaŋitpatigik piraksriutitka,
31suunnaġiŋitpatigik pitqurriutitka,
suli kamagiŋiḷḷugich piraksriutitka,
32piḷuusiqiaŋich pisigilugich tatavsaġniaġitka anaullaunmik;
pigiiḷḷiqiaŋich pisigilugich ipiġaqtuġniaġitka.
33Aglaan nakuaġiŋaiġñiaŋitkiga David
unniqsuqłiisigianiŋaraġa ilaanun piŋiññiaŋitkiga.
34Naviŋniaŋitkiga sivunniuġutigiŋaraġa ilaanun
naakkaunnii tasuġlugu unniqsuqłiutigiŋaraġa.
35“Tavra atausiaqługu unniqsuqłiiŋaruŋa salumaruakun atipkun:
Sagluqiyumiñaitkiga David.
36David taimuŋaaglaan kiŋuvaaqaġuuniaqtuq,
suli munaġiniaġiga ilaan umialgutaa siqiñiq siqiññaaġuraġniaqpan.
37Inillaktauniaqtuq taimuŋa tatqituntauq,
ataramik iḷisimariqaqtuatun qiḷaŋmi.”
Qigḷukpagniq Akiisitaumman Umialik
38Aglaan uvva Ataniiq, uumitchautiŋagiñ umialiksraqtaaġiŋaran;
suksraaŋagiñ nalunaiŋaran uqsruqtaaqługu.
39Maliġuaŋaitkiñ sivunniuġutin kivgaġiraġnun
suli igił̣ł̣ugu niaquġutaa nunamun.
40Ulġuttaŋagitin iniqpaŋisa katchiŋich
suli siqumiłługich sapukutauraġniaŋich.
41Apqusaaqtuat tigligaigaat suġautaŋiñik;
siḷalliipayaaŋisasuli kipagigaat.
42Akimapkaŋagitin akiḷḷiiŋich;
iluqaisa quyatchaivḷugich.
43Satkukkaluaŋich anniqsuutauŋaiqsinŋagitin
aasii akiisiłługu aŋuyagiaġman.
44Kamanautaiqsinŋagiñ
suli igił̣ł̣ugu aquppivia nunaġruiññamun.
45Utuqqaliñaġiaqtinŋagiñ nutaġauniŋaniñ
suli matuvlugu kanŋunaqsiḷiġunmik.
Aŋaiyyun Annautitquvluni
46Ataniiq, iriqsimaniaqpich imña isuitchuamun?
Qanutuaglaan imña qinnautin ikualaniaqpa igniqtun?
47Itqaumalugu qanutun naisilaaŋa iñuggutigma;
itqaumalutin savaaġiŋagiptigut iluqata iñugruiññauvluta!
48Kiñaimña iñuk iñuuruaq tuquŋitchumiñaqpa?
Qanuġluta iñugruiññauruagut tuqulaitchumiñaqpisa?
49Ataniiq, nauŋ ipkua nalupqinaiyautigiŋaratin nakuaqqutigni?
Nauŋ iḷumutuuġutigiŋaratin David-mun?
50Puiguġnak qanutun uvaŋa, kivgaġiran, kipagitchiŋatilaamnik,
igḷutuaġiŋakapkich kipakkutiŋich iñuich ukpiŋaitchuat.
51Akiḷḷiqpich pisaaŋaŋagaat umialiksraqtaaġiŋaran, Ataniiq!
Sumupayaaġman tamarra pisaaŋavlugu.
52Nanġaqtauli Ataniq isuitchuamun!
Aamian! Aamian!
Currently Selected:
Psalms 89: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
