Psalms 55
55
Aŋaiyyun Aitchuutigirauruam Avilaitqanmiñiñ
Atuqtit aullarriŋannun. Nuqaqtiligaqłuni. Poem aglaaŋa David-gum.
1Tusaagguuŋ aŋaiyyutiga, ilvich God-auruatiin;
tununnaŋa iŋiqsruġama!
2Tusaaluŋa kiuŋŋa;
Piḷaiġillakkaanŋauvva uŋiarrisaġma.
3Iqsittualapkaġaanŋa sivuuġasaaġutiŋisa akiḷḷiġma,
suksraunġiġaanŋa nagliksaaqtirrutiŋisa piḷuktualiqirit.
Qaġġirriraqtut nagliksaaġutiksramnik;
qinnautiŋagaanŋa uumigigaanŋalu.
4Iqsiññiuqtuŋa,
iqsiñaġniŋisa tuqqutim qanuqsausiiġaanŋa.
5Piiḷḷaiqsuq iqsittualaniġa kiisaimmauvva uuliksivik;
Susallaiġivḷuŋa piaġliuġnaqtuam.
6Isaġuqaġluŋaluqaa tiŋmiatun.
Tiŋiluŋa aullaġayaqtuaŋaa aasii unaŋuiqsiaqsiḷuŋa.
7Tiŋmisugrukkayaqtuŋa uŋasiksuamun
aimaaġviliutiluguunnii nunagluktuaq.
8Qilamiqsruġluŋa, uqqirviksraqsiuġluŋaasii
anuqłiuġnamiḷḷu siḷaługmiḷḷu.
9Alapinaqsipkakkich uqaluŋich akiḷḷiġma, Ataniiq!
Tautuktuŋa qinnautinik tuavaallatiniglu iniqpagmi,
10uvlumiḷu unnuakkaluamiḷu,
pimaqłuutiqaqtuq iluiḷḷiuġutiniglu.
11Suksraunġiun ittuq sumiḷiqaa;
Apqutit siḷivinŋarut nagliksaaqtitchiruaniglu ivayaqtuiruaniglu.
12Akiḷḷiima kipagikpanŋa,
igḷutuġumiñaġiga;
akiḷḷiġma kamanniraaġvigikpanŋa,
Iriġumiñaqtuŋa ilaaniñ.
13Aglaan ilviurutin, uvaptun ittutin, uvaŋa iñuuniaqatiga,
avilaitqatipiaġataġa.
14Ummatiptigniñ uqauraaġaqtuguk
aŋaiyyuyyaqłunuglu atautchikun Aŋaiyyuvikpagmun.
15Akiḷḷitkatuq tuqulich quviġnaqtuakun;
iñuullaġmiglu iḷuviqtaulich!
Atakkii piḷuun aimmaviŋiññiittuq uumataŋiññiḷu.
16Uvaŋaaglaan ququularuŋa Ataniġmun God-mun ikayuquvluŋa,
aasii annautiniaġaaŋa.
17Uvlaami, qitiqqaġman, unnuamiḷu
iŋiqsruqtuŋa nagliksaaġnimni,
aasii Atanġum tusaagaaŋa.
18Ilaan navianaitchuakun utiqtisiññaugaaŋa
aŋuyaamniñ
akiḷḷiisalamniñ.
19God-gum, igliġurriruam taimaŋŋa qaŋa isuiḷaamiñ,
tusaaluŋa akiiḷiñiaġaich;
tavrakii allaŋŋuġuŋił̣ł̣utiŋ,
suli qiksigiŋił̣ł̣ugu ilaa.
20Piqatigiŋagaluakkaġma aŋuyaŋagaich avilaitqatauraġniani;
navgivluni unniqsuqłiunmiñik.
21Uqayuqsaaqami taimma ukpiġnaqsipiallakłuni,
uumikkutiqaġaluallaġmi uummatimiñi;
uqaluŋich uqsruqtiġutitun ittut pisaasuqpaił̣ł̣uni,
aglaan ipiktut igḷuktuuliktun.
22Unitchiiñ isumaaluutignik Ataniġmun,
aasii Ilaan ikayuġniaġaatin;
iḷumutuuqtuat iñuich akiisitchumiñaitkaich.
23Aglaan Ilvich, God, iñuaqtuqtit sagluturuallu iḷuviŋannuutiniaġitin
Tikiutiŋaiñŋaan unnii avvaŋa iñuuviksrautiŋisa.
Uvaŋaaglaan, ukpiġviginiaġikpiñ.
Currently Selected:
Psalms 55: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
