Psalms 50
50
Iḷumun Nanġaiñiq
Psalm aglaaŋa Asaph-gum.
1Sapiġñaqtuaq God, Ataniq, uqaqtuq;
ququularuq iñupayauranun sumiḷiqaa.
2God qivliatittuq Zion-miñ,
iniqpagmiñ naamaruamiñ qiñiyunaġniġmiñi.
3God qaiñiaqtuq aglaan siaksruisaaġniaŋitchuq;
nutqaqtinnaiḷam igniġum sivulliuġaa,
siḷaqłuum avatkaa.
4Ququulagaik qiḷaglu nunalu iḷisimarigisukługik
qiñiquvluni isivġiigumi iñugmiñik.
5Uqallaktuq, “Atautchimuksigich iñutka uvamnun ukpiqtuat,
tamatkua sivunniuqatigiŋaraanni aitchuivḷutiŋ ikipkaikamiŋ.”
6Qiḷaich unnii nalunaiqsruġaat God iluaqtuagutilaaŋa,
ilaakii God isivġiirauruq.
7“Naalaksiñŋa, iñumaaŋ, uvva uqaaqsiruŋa;
Uqausiġiniaġikpiñ paaqłaglutin, Israel-guruasii.
God-auruŋa, God-iksi ilivsi.
8Siḷġiqsuyuitkikpiñ pisigilugich aitchuutitin
ikipkautitillu ataramik qaitchuuratin.
9Suli pigiraksraġiŋiñmigitka aŋusallut pamiqsaaqaġvigniñ
naakka nagrulgich imnait pamiqsaagutigniñ;
10iluqaisakii niġrutit uvaŋa pitka napaaqtuġmiutat
pamiqsaallu qimiġaasalagniittuat.
11Iluqaisalu tiŋmiat pamiqsaaguŋitchuat pigigitka
iñuuruapayaallu nunaraaniittuat.
12“Uvva kaakkuma, uqallautigayaitkikpiñ kaagniḷuŋa,
atakkiuvva nuna supayaallu nunamiittuat tamarra pitka.
13Niġisuuvik niqipiaŋiññik aŋusallut
naakka imiġuuvik auŋiññik imnaich nagrulgich?
14Quyyanmik God-mun aitchuiḷutin;
suli taŋŋiġḷugich unniqsuqłiisigiŋaratin Qutchigñiqtauruamun.
15Ququulaŋŋa iłuiḷḷiuġun qaikpan;
annautiniaġikpiñ,
ilviḷḷi nanġaġniaġigma.”
16God-liaglaan uqallaktuq piḷuktuanun,
“Summan suli taimuŋaaġniaġmivisigiŋ pitquratka?
Summallu uqaġiniaqpisigiŋ sivunniutitka?
17Ilivsiuvva natqiksruqulaiñmiusi uvamnun;
kamagisuitkisi pitquratka.
18Iḷauraakkiutisuummiusi tigligayuktipayaanun tautuktavsiññun,
piqasiutivlugich allatuqtit.”
19“Uqausiġiyumalaaġuugisi pigiitchuat;
nutqapilaitchusiunnii sagluyumaalliqavsi.
20Pasiuqsayagisi iḷasi nanmiñiq
pasiraksraqsiuqłusi.
21Tainna tavra pisuugaluaqtusi uqallayuitchuŋa,
isumasuurusi ilivsitun innasugivluŋali.
Akkupak aglaan suakkivsi
salapqiqsaqługich piḷuutisi.”
22“Naalaġnisiuŋ una, ilivsi suuŋiḷaqsriruasii uvamnik,
suksraunġiqpiaġivsi,
iñuksraitchuq annaurriksravsiññik.
23Qaitchiñiq quyyanmik aitchuutaumman tavra taaptuma qutchiksiḷiġaaŋa,
aasii iḷumutupiallak annautiniaġitka kamaksripayaaqtuat uvamnik.”
Currently Selected:
Psalms 50: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
