Psalms 49
49
Isumalluaġiirrutaa Ukpiqsraqtuam Umiallagniġmun
Atuqtit aullarriŋannun. Psalm aglaaŋat iḷaŋisa Korah-m.
1Una tusaasiuŋ, iluqasi!
Atta, iñuich sumipayaaq ittuasii,
2kamanaqtuaġlu kamanaitchuaġlu atiruk,
umialikpaglu iḷiappauruaġlu atiruk.
3Isummatitka nalunaiññiaqtut;
Uqaġniaqtuŋa isumattunmik.
4Qiviaġviginiaġitka isumaturuat uqalugaaŋich
aasii kaŋiqsipkaġniagaqsiḷugu sivuniŋa atuqtuurallaġma nuqaqtiligmik.
5Iqsisaitchuŋa navianniuġnaġaluaġman
avalluġaanŋaunnii akiḷḷiima,
6Iñuich ukpiqsraqtuat umialguniġmignun
kamasaaqłutiŋ qanutun umialgutilaamignik.
7Uvagut uvaptignik tasuġumiñaitchugut;
akiḷiiganikkumiñaitchugullu God-mun nalliġḷugu akisutilaaŋatun iñuggutipta,
8atakkii akiksraŋa iñuum iñuggutaata akisuvaitchuq.
Akiḷiiḷḷaluta akiḷiisaġaluaġupta naamayumiñaitchut
9tikiutiŋiḷḷuqtugut unnii iḷuviqtauviksraptignun,
iñuullaluta taimuŋa isuitchuamun.
10Kiñapayaaq iḷitchuġiŋaruq isumaturuat unnii tuqullatilaaŋannik,
Isumalluaġiitchuat naakkaqaa isumatuitchuaq.
Iluqaġmiŋ umialgutitiŋ uniḷḷagaich iḷamignun.
11Iḷuvvivisiŋ taimma aimmaviḷiutivlugich isuitchuamun;
nayuqsaġataġaat taimuŋa,
imma qaŋauvlugu inmikkun nunaqaŋagaluaqtuat.
12Kamanaqsiñipta tuqutchaiḷiyumiñaitkaatigut;
tuquyumaaqtugut niġrutitun.
13Tautuksigich inmignun nalupqisuŋirviqaqtuat,
nalaunniakkaŋaat susuŋisaaġviqaqłutiŋ umialgunmignik—
14sivuniġiitchut tuquruksrauvlutiktauq imnaisun,
Tuqqun imnaiḷiqiriginiaġaat.
Iluaġniaqtuat akimmasiqsaukpata atanniqsimaaġlugich,
timiŋich qilamik auniaqtut
nunaanni tuquŋaruat uŋasigḷutiŋ aimmavigmigniñ.
15Aglaalli God-im annautiniaġaaŋa;
annautiluŋa suaŋŋataaniñ tuqqutim.
16Isumaqługnak iñuk kisupayaaq umiallagniqpan,
umiallavsaasugruktuq unnii;
17tigumiaġniaŋitkaiptaukkii tuqugaluaġumi;
umialgutaisa malikkumiñainmigaat iḷuvvivianun.
18Pagmapak unnii iñuusiqtiŋ quviagiluġaat
aasii suli nanġaqsiqł̣uni piḷḷuataġuuvaił̣ł̣uni,
19iḷḷatiniaġmiuġli iḷamiñun tuquluni,
taaqtuaqtuamun taimuŋa isuitchuamun.
20Qutchiksiñipta tuqutchaiḷiyumiñaitkaatigut;
tuquniaqsimammiuguttauq niġrutitun.
Currently Selected:
Psalms 49: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
