Psalms 44
44
Aŋaiyyun Munaġitquvluni
Atuqtit aullarriŋannun. Poem aglaaŋat iḷaŋisa Korah-m.
1Uvagut siutillaaptignik tusaaŋagikput, God
maŋŋuuptaptauq quliaqtuaġutiŋammigaatigut,
quliaqtuaqhutiŋ kamanaqtuanik savaaġiraġnik takkuanni,
aippaani uvluŋiññi;
2qanuq ilignun anitilaaŋannik ukpiŋaitchuat
inillaktiłługich aasii ilvich iñutin nunaŋannun;
qanuġlu tatavsaikavich allanik nunaqpauruanik
aasii iñuktin piḷḷuataqtiłługich.
3Iñutin nunannaŋaitchut savikpamignik;
akimaŋaiñmiut suaŋŋanmikkun;
aglaan ilvich suaŋŋatikkun,
nalupqigiŋił̣ł̣ugulu nayuutitilaan,
qiñiqtinnapku nakuaqqutin ilaiññun.
4Ilvich umialigigikpiñ God-igivlutillu;
akimapkaqsimaaġitin iñuktin,
5aasii ilvich suaŋŋatikkun akiiḷisuugivut akiḷḷivut.
6Ukpiqsrautaitchuŋa pisiksimñun
naakka savikpamnun annautiniaġasugiluŋa;
7ilvich aglaan annautisuugivsigut akiḷḷiptigniñ
akiisitaqługiḷḷu uumigirivut.
8Nanġaqsaġataġivsigiñ
Quyanaaqtuaġutillu taimuŋa isuitchuamun.
9Pagmapak aglaan uvva ayyakkivsigut akiisiłłutaasii;
avluġaaqasiŋaiġitin uvva aŋuyaktivut.
10Qimaktiłłutaasii akiḷḷiptigniñ,
iliŋisaasii piññaktaaġivlugich piutivut.
11Imnaisun aasii tuqutaupkaqłuta;
siamitiłłuta allanun nunanun.
12Tunigitin ilvich iñuuraġniatin akiisuuraqługich
naggutaiḷaaqługich.
13Siḷalliipta qiñiġaat qanuq ilignun aŋalatilaaqput,
kipagiaqsivḷutaasii iglaquvsisigivlutalu.
14Iglaquvsautiġuqtitkivsigut uvva akunġanni nunaqpaich;
niaqullatigivlutalu kipakkunmigni.
15Qiñiġviiḷḷakamauvva;
Matugaaŋa kanŋusuutim
16naalaġnivaił̣ł̣ugich kipakłiqsit pisaaŋaruallu
akiḷḷitka uumiksriruallu uvamnik.
17Iluqatiŋ tamarra piut uvaptignun,
puiguiŋaitkaluaqtiłłuta ilignik
naakka navgiŋaitkaluaqtiłłuta sivunniuġutiptignik.
18Tuniqsimmataiŋaitchugut suli ilignun;
kamaksriŋisaaġuta piŋiñmiugut piraksriutignik.
19Iginŋagivsigut niġrułługnun susallaiqł̣uta;
qimakhuta taaġniqsramun.
20Nanġaiŋaiġñiġupta piiguġlugu God-ikput
aŋaiyyuuġutalu allat godiŋiññun,
21iḷumutupiaq iḷitchuġiniaġaluaqtusi,
atakkii iḷisimagitin isumavut suiḷaurrisit unnii.
22 #
Ro 8.36. Aglaan ilvich pisigivlutin uvagut tuqutaugaluamiiqtugut,
aŋalatchiqhuta imnaisun tuqutaksrauruatun.
23Itiġiñ, Ataniiq! Summan imña siñikpich?
Iqiiġutin, ayyaktuŋaiqsigut isuiḷaamik!
24Summan iriqsimavich?
Puiguġnagu kiiqsiuġniqput isumaaluutikpullu!
25Ulġurugut naqirvaktatun nunamun;
nalavluta akiisitatun nunami.
26Makillutin ikayuqsigut!
Pisigilugu nakuaqqutin nuŋulaitchuaq annautisigut!
Currently Selected:
Psalms 44: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
