Psalms 38
38
Aŋaiyyutaa Nagliksaaqtuam
Psalm aglaaŋa David-gum; isumaaġunmi qiaruam.
1Araa Ataniiq, tatavsaġnaŋa qinnaŋallaqpich!
2Ikiḷḷiiŋagigmauvva qaġruġnik;
ulġuqhaatinŋagigmauvva.
3Qinnautikamŋauvva, kiiqsiuliqpaŋaruŋa;
timiga iluqaan naŋirrutiniktitkaat piḷuusiqiaġma.
4Qanuqsausiiġaanŋauvva piḷuusiqiaġma;
uqumaiḷḷiraatka uqumaitpaił̣ł̣utik akigaanignaitchut.
5Tavrakii uvaŋa isumalluaġiiñŋavluŋa,
kiḷḷitka marra tippaktut auvlutiŋ.
6Puuŋasikamauvva, siquptaq;
Qiñuuqtuaġaqtuŋa uvluqtutilaaŋatun.
7Uunnautinikpaŋaruŋauvva
suli tuquaqsiuraqtuŋa.
8Piḷaipiallaktuŋa susallaipiallakłuŋa;
uummatiga iluiḷḷiuqtuq, iiqtuaqtuŋa anniġñaqłuŋa.
9Araa Ataniiq, iḷisimarutin sumik inuqsraqtilaamnik;
tusaasuugitin iiqtuaġutipayauratka.
10Uummatitchiaŋaiḷḷaiqsuŋa, suaŋŋataiġmiuŋa,
takpiiḷisaiññaġmiuŋa.
11Avilaitqanma siḷalliġmaunnii qaninŋallaiġaanŋa,
kiḷḷiqsuqpaił̣ł̣uŋa;
nanmiñiq iḷamaunnii ullallaiġaanŋa.
12Tamatkuaptauq tuqutchisuktuat quviġluŋa pisaġisukłuŋa,
anniaqłiġumaruat uvamnik sivuuġasaaġaanŋa maqurrutiksraqsiuqłuŋa;
nutqalaitkaich uvapkun sivunniuġutitiŋ akiḷḷiġivluŋa.
13Arriqaqtuŋauvva tusaalaiḷatun,
uqallayuitchuatun uqalaił̣ł̣uŋaunnii.
14Ittuŋauvva kiggutiqayuitchuatitun,
atakkii tusaalaił̣ł̣utiŋ.
15Ukpiġigikpiñ aglaan, Ataniiq;
Ilvich aasii, kiuniaġigma Ataniiq God-iiŋ.
16Akiḷḷiimnun iluiḷḷiuġutiga kipakkutaupkaġnagu;
uqavigaaqtinnagiḷḷu killukkuaġutiga pisigilugu!
17Ulġuyasiuraqtuŋa
suli ataramik kiiqsiuqtuŋa.
18Quliaġitka piḷuutitka;
nunuurautigigitka piḷuutitka.
19Akiḷḷitka marra makua sayyaġigmiut suaŋavlutiglu;
iñugiaktut uvamnik uumiksriruat patchisaitkaluaŋŋaġmiŋ.
20Tamatkua piaġiiḷanik paaqłautiqaqtuat nakuuruanun
akiḷḷiqsruġaanŋa iluakkuaġniḷugniġa pisigivlugu.
21Suksraaġnaŋa Ataniiq;
qimaummiñaŋa, God-iiŋ!
22Qaiḷutin qilamik ikayuŋŋa, Ataniiq Annaurriiŋ!
Currently Selected:
Psalms 38: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
