Proverbs 29
29
1Sivunmuusuŋaiññaġuvich natqiksruusiaqapayauraġuvich,
uvlut iḷaŋanni maqutauniaqtutin iluaqsruutaitchuamik.
2Qiñiqtinŋa iluaqtuakuaqtuamik aullarrimik qiñiqtinniaġikpiñ quviasuktuanik iñugnik.
Qiñiqtinŋa pigiiḷḷiqirauruamik aullarrimik, qiñiqtinniaġikpiñ iiqtuaqtuanik iñugnik.
3Quyyatigigupku isumatuniq, aŋayuqaaqpich kamasuutiginiaġaatin.
Asiḷiqqutauruq asiñun maniksuġniq akiitchunun.
4Umialguruaq isumaaluutiqaġman atunim aŋalatchiñiġmik, nunaqpauruaq suaŋŋatiqaġniaqtuq,
aglaan isumaaluutiqaqsiññaġman maniksigun, maqunniaġaa nunani.
5Uqayutkupki avilaitqatiitin,
piraġiqsriuqsiññaġniaqtutin ilignun.
6Piḷuktuat iñuich inmignun piraġipkaġuurut piḷuutimignik,
iḷumutuuqtualli quviasuktullu atanġiqsaurullu.
7Iñulluatam iḷisimagaich atunim pigillaraŋich piiḷḷiuqtuam,
aglaan pigiiḷḷiqirauruat kaŋiqsisuitkaa taamna.
8Iñuich kipakłiqsuat allanik maqullagaich nunaqpaich tuavaallaktił̣ł̣uġich.
Isumaturuat tutqiutiqaqtitchisuurut.
9Isumaturuam uqaqsitaaġvigmuutimmauŋ isumatupiaŋitchuaq,
taamna isumalluaġiitchuaq iglaqsiññaġuuruġlu nipatuvluniḷu qanaanagutisuuruq.
10Tuqutchisuuruat allanik iñugnik nakuaqsrayuitchut sagluuyuitchuanik,
aglaan iluaqtuakun iñuuruat annautiniaġuugaat tainnasiq iñuk.
11Isumalluaġiitchuat iñuich qinnautiktik iḷisimapkaġuugaat,
aglaan isumaturuat iñuich qinnautiktik anitchuitkaat.
12Aullarri naalaġnikpan iḷumun inŋitchuanik
atanauraŋich iluqatik saglutuniaqtut.
13Suiḷḷiuqtuaġlu iñuk nagliksaaqtitchiriŋalu atiruk inna—
Atanġum iluqaaktun qaummatiksrinŋagaik iriŋik.
14Umialgum iḷatchiŋitpagit piiḷḷiuqtuat atunim pigiraksraŋich,
umialguniaqtuq taikuŋasugruk.
15Iłuaqsruutillu natqiksruutillu iluaqtut miqłiqtunun.
Inmikkuaġumik, aakamignun kanŋugipkaġniaqtut.
16Pigiiḷḷiqirauruat iñuich aullarrimmata, pimaqłuutit nauniaqtut.
Aglaan iluaqtuakuaqtuam qiñiġniaġai maqutauppata tainnasich iñuich.
17Natqiksruqsigiŋ miqłiqtusi taimmaasii tutqiutiksrisimaaġniagaasi.
Quviasuusiqsimaaġniaġaasi.
18Nunaqpauruat God-mik aullarraiñmata suna iluayuitchuq.
God-im pitquraŋanik maliġuaqtuat piḷḷuataġuurut.
19Iluaqsruġumiñaitkitin kivgauruat uqautisiññaġlugich.
Kaŋiqsiñiaġaluaġaatin aglaan kamaginiaŋitkaatin.
20Uqallayaruaq niġiukkutaiłhaaqtuq isumalluaġiitchuamiñ.
21Pamatkupkich kivgatin pigisupayaaqtaŋiññik miqłiqtuuniŋaniññaglaan,
agligumik suġġautapayaatin piñiaġaich.
22Iñuich qinnayaruat qanaaġniġmullu siġġaġniuġniġmullu tikiutipkaisuurut.
23Arguaŋaniqpich kanŋunaqtuamun tikisinniaġaatin,
aglaan qiñuitkuvich qiksiginiaġaatin.
24Tigligayuktim paannaŋa akił̣ł̣iqsruqtauniaqtuq inmiñuñ.
Tatavsaqtauniaqtuq iḷumun uqaġumi uqaqsitaaġvigmi, suli God-im tatavsaġniaġaa iḷumun uqaŋitpan.
25Anayanaqtuq isumaaluutigiruni qanuq iñugnun isummatigitilaamik,
aglaan ukpiġigupku Ataniq anayanaitchuq.
26Iñupayaat iluatun aŋalatqurut aullarrauruamun,
aglaan Ataniġmiñ kisian iluaqtuaq qaiḷḷaruq.
27Nalaunŋaruakun iñuuruat uumigigaich pigiiḷḷiqirauruat,
suli pigiiḷḷiqirauruakun iñuuruat uumigigaich nalaunŋaruakun iñuuruat.
Currently Selected:
Proverbs 29: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
