Proverbs 28
28
1Pigiiḷḷiqirauruaq iñuk qimaasuuruq maliqataŋitkaluaqtilluni,
aglaan iḷumutuuqtuaq iñuk iqsiitchuq lion-tun.
2Nunaqpauruaq piḷuusiqikpata, aqulliġaaġiiñik aullarriqaġuuruq.
Aglaan nunaqpauruaq suaŋaniaqtuq suli tuniqtuniaqtuq aullarriqaġumi isumaturuanik.
3Aullarri nagliksaaqtitchiruaq piiḷḷiuqtuanik iñugnik
arriqaqtuq sialukpaktun maqutchiruatun naurianik.
4Suliqutigiŋitkupkich pitqurat, iḷḷuliqsuġitin pigiiḷḷiqirauruat;
aglaan kamaksriguvich, paaqłaktuġitin.
5Piḷuktuat nalurut suutilaaŋanik atunim nalaunŋaruam,
aglaan aŋaiyyuruat Ataniġmun kaŋiqsimagaat.
6Nakuułhaaqtuq suiḷḷiuġniq iḷumutuuġuniḷu
suiḷḷiuŋiññiġmiḷḷu pitqiksiġaġniġmiḷḷu.
7Nutaġauruat kamagivlugu pitquraq isumaturut.
Avilaitqatauruat iñuumaqłuktuanun kanŋusaaġaich aŋayuqaatik.
8Umiallakkuvich qaaŋiġḷugu akiḷiipkairġaġutillu iñuiḷḷu pitqiksiġaġupkich,
umialgutitin allamugniaqtut aŋalatchisuqtuamun piiḷḷiuqtuanik.
9Kamagiŋitkupku pitquraq,
God-im tusaaniaŋitkai aŋaiyyutitin uumisuutiqaqpaitchut.
10Killukun iglaugutigupku iḷumutuuqtuaq iñuk piḷuktualiqipkaġupku,
ilvich piraġipkaġniaqtutin.
Patchisaitchuaq akiḷiusiaqaġniaqtuq.
11Suiḷḷiuŋitchuat iñuich isumasuurut isumatunasugivlutik,
aglaan suiḷḷiuqtuaq iñuk sivuniksramik iḷisimaruaq iḷisimałhaaqtuq.
12Iluaqtualiqiruaq akimamman, iñupayaat quviasuutiqpaqaġuurut,
aglaan iñuich iñuulluataŋitchuat inillagmata, iñuich iriqtuliġuurut.
13Iñuuniaġniġmi sivunmukkumiñaitchutin iriqtuġupkich piḷuutitin.
Quliakkich suli aġiukkich; tavraasii God-im nagliktuutini qiñiqtinniaġaa iliŋnun.
14Kamagisuŋaiññaġuŋ Ataniq aasii quviasuutiqaġniaqtutin.
Siqquqsimaguvich maqutauniaqtutin.
15Suiḷḷiuqtuat iñuich qanuqsausiiqaġumiñaitchut akiḷḷiqsruġniḷukkumirruŋ pigiiḷḷiqirauruaq aullarri;
anayanapiaġataqtuq lion-paktun naagga naġiuqtuatun akłatun.
16Aullarri isumatuitkumi naglikkutaiññiaqtuq taluqsralliaġiññikkumi.
Iñuk nakuaqsraŋitchuaq iḷumutuuŋiññiġmik aullarriñiaqtuq sivisuruamik.
17Iñuk tuqutchiŋaruaq allamik iñugmik inmiñik iḷuvviviḷiuqtuq.
Ilaatun pipkaġli.
18Pitqiksiġautaitchiñ aasii annaumiñiaqtutin.
Pitqiksiġautaitkuvich, ulġusiññaagurutin.
19Savvaqturuaq nautchialiqiri niqiksraukkaġuuruq.
Iñuich asiḷiqiugaqtuat suiḷḷiuŋaiġumiñaitchut.
20Iḷumutuuqtuat iñuich iñuuniaqtut naamalutiglu quviasugutiglu.
Aglaan akkupapianiaq umiallagnialaguvich, tatavsaqtauniaqtutin.
21Atunim aŋalatchisaiññiq iluaŋitchuq.
Aglaan iḷaŋich isivġiirit killukuaġuurut mikiruuramik unnii saglutautikun akiññaksaġutik.
22Signaturuat iñuich qilamik umiallagnialavaił̣ł̣utik
nalurut piiḷḷiuġniq tikitkaqsitilaaŋanik.
23Iluaqsruġuŋ iñuk,
aasii aaqagu quyyatigiłhaaġniaġaa nanġausiamiñ.
24Kiñaliqaa isumaruaq iluaġniḷugu tigligaġniq aŋayuqaamiñiñ
nakuułhaaŋitchuq tigligaqtimiñ.
25Anniqsrautuniq tikiutisiññaġuuruq siġġaġniuġniġmun.
Iluałhaaġniaqtutin ukpiqqutiqaġuvich Ataniġmun.
26Inmulhiñaq ukpiġraqtuat isumalluaġiitchut,
aglaan maliġuaqtuat isumattutikkun annaksimaaġniaqtut.
27Aitchuiguiñ piiḷḷiuqtuanun aasii susuksiuniaŋitchutin.
Suliqutigiŋitkupkich piiḷḷiuqtuat iñugiaktuat iñuich uqamaqługviginiaġaatin.
28Iñuich iriqsimaliġuurut pigiiḷḷiqirauruat suaŋŋasiqtaummata.
Aglaan tavraŋŋa piiġmata iluaqtuakuaqtuat aullarriġuġuurut.
Currently Selected:
Proverbs 28: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
