Proverbs 27
27
1 #
Jas 4.13-16. Kamanniraaġutiginagu uvlaakuksraq.
Nalurutin suniaqtilaamik akkupagmiñ uvlaakumun.
2Allat iñuich nanġaġlisin—
nalugaluaqtaqpiḷḷu; iliŋnunhiñaŋiḷaaq.
3Uqumaisilaaŋa uyaġaum naagga maġġaum suuŋitchuq
siġġaġnaqtuamiñ tikitchuuruamiñ isumalluaġiiḷuktaqtuni.
4Qinnautiqaġniq naglikkutaitchuq siquvsisuuruġlu,
aglaan suuŋitchuq saŋiagniġmiñ.
5Iluałhaaqtuq natqiksruqtuni avanmun
iriqtaġiniġmiñ nakuaqqunmik iliŋiññun.
6Avilaitqatauruat iluamik pisuurut, anniġaluaqłutin.
Aglaan akiḷḷiqpich iqittaaqpatin—qaunakłaaġiñ!
7Siḷviñŋaguvich honey-tuġugniaŋitchutin,
aglaan kaakkuvich tipiglukkaluaqtuaq siiġñatun ittuq.
8Kiñaliqaa unitchiruaq aimaaġvigmiñik
qupałuktun ittuq uglumiñik unitchiruatun.
9Tivraġiksautillu tivraġiksuallu uqsruqtiġutit quviasuutausuurut,
aglaan siġġaġniuġutit siqumitchuugaat tutqiutiqaġniq.
10Piiguġniaġnagich avilaitqatiitin naaggaunnii aapakpich availaitqatiiŋich.
Siġġaġniuġnamun tikitkuvich, apiġinagu iḷan ikayuqulutin;
qanittuam siḷalliqpich ikayułhaaġniaġaatin iḷagniñ uŋasiksuamiñ.
11Isumatulutin, miqłiqtuuŋ, aasii quviasugniaqtuŋa;
kiggutiksraqaġniaqtuŋa kialiqaa uvyauqpaŋa.
12Isumaturuat iñuich iḷisimasuurut siġġaġnaq tikiññiaġman aasii pitchaiḷivḷugu,
aglaan isumatuitchuam tikisaaġuugaa aasii isumaalugiaqsivḷugu aaqagumman.
13Kiñaliqaa isumalluaġiisilaamisun unniqsuqłiiruaq naluraġmi iñuum akiiḷaŋa akiḷiġñiaġnivḷugu
ilaan suġauttani akiḷiutigiyumaaqtuksraġigai.
14Nipaturuaġlu quvianaqtuaġlu paġlan uvlaatchaurami
uqamaqłuutitun ittuq.
15Qaniġviḷuguuruaq tuvaaqan
arriqaqtuq kutittuatun nutqautaiḷatun sialugman.
16Qanuġlugu nipaiqsinniaqpiuŋ?
Nutqaqtinniataŋaviuŋ anuġi naaggaunnii tigumiaġniataŋavich uqsrumik argagni?
17Iñuich iḷitchisuurut avanmun,
tainnaptauq savił̣ham ipiksaġmatun savił̣haq.
18Qaunagigupku napaaqtuq siiġñiruaq fig-nik niqiksraqaġniaqtutin figs-nik.
Kivgat qaunaksriruat umialimignik nanġaqtauniagtut.
19Ilvich kiiñaqpich taġġaŋa tautuguugiñ immami
aasii suli iliŋnun uummatigni tautuguummiutin.
20Iñuum pigiyumaraŋi arriqaqtut nunaŋani tuquŋaruat—
iniksraiyuitchut.
21Igniġum piupiaġmagaaġuugai kaviqsuaġlu qatiqtuaġlu maniich;
aglaan iñuk uuktuqtausuuruq nanġaqtaukami.
22Piyukpakkaluaġupku tuqutqayaqtaallaan
isumalluaġiitchuaq isumalluaġiiñŋaiġumiñaitchuq.
23Qaunagimmaġiksaakkich
imnaigutitillu pamiqsaagutitillu pisuqtilaaqtun,
24qanukkii piiḷḷiuŋiññiq taimuŋa inŋitchuq.
Nunaqpauruat unnii taimuŋa inŋitchut.
25Ivigaat kivluqtuni niqiksriuqługich
allamiḷi allat naupkaqługich.
26Annuġarriuġumiñaqtutin imnaich mitquŋiññiñ
suli tauqsiġumiñaqtutin maniññaktaaġniñ tunigupkich iḷaŋich nagrulgich pamiqsaat.
27Aasii iḷakuŋiññiñ nagrulgich pamiqsaat immuqaġumiñaġniaqtusi
iḷatillu aġnaŋiḷḷu kivgaqpich.
Currently Selected:
Proverbs 27: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
