Philippians 2
2
Christ Kamanaiqsauruq Kamanaqsipkaqtauruġlu
1Tavra uvagut atausiŋŋuqatigiŋavlugu Christ qapiŋaisaaġutiyumiñaqtugut avanmun, suli Christ piviuttaqqutaata ikayuutipkaqtaġumiñaġmatigut avanmun, suli piqasiutiŋavluta Ilitqusiġiksuamun nagliktuutiraġaġumiñaqsiŋavlutalu avanmun iḷunŋusuutikullu, 2quviatchaksapiaġataqsiŋa isummasiñiglusi uvaptun, piviuttaqqutilusi avanmun atunim, atisiŋalusi ilitqutchivsiññi isumavsiññiḷu. 3Siŋñatiqaġnasi piġuqtiġnasiḷu aglaan kamasaaġutaiḷḷusi avanmun, isumaqaŋaiġḷusi nakuułhaaġasugalusi allaniñ iñuŋniñ. 4Ilivsiññun kisian kipiġniuġutigiŋaiġḷusi, aglaallu allat iñuich kipiġniuġutilugich. 5Isumaqaqtuiññaqtuksraurusi Christ Jesus isumaqausiatun. 6Jesus Christ Iġñiq taimaŋŋaqaŋa God-tauruaq Aapamisun, ilaan taamna tainna irrusiñi piġuqtiġutigiŋaitkaa atiqasiutiniaġluni God-mun. 7Aglaan inmiñik pisuksiññaqłuni ilaan atuŋisaallaŋagaa God-mun nalliummatinini, aasii kamanaiqł̣uni kivgaġuŋaruq. Ilaa aniŋaruq aakamiñ iñuktun, qiññaqanikłuni iñugruiññatun. 8Aasii iñuguqami kamasaaŋił̣ł̣uni kamagiŋagaa God supayaakun, tuquvluni unnii kikiaktuurrauvluni aŋarrauramun pitquranik navguiritun. 9Taamna pisigivlugu God-im atqunaqługu kamanaqsipkaŋagaa suli atchiqł̣ugu atiġmik kamanałhaaqtuamik atipayaaniñ, 10#Is 45.23.iluqaġmiŋ qiḷaŋmiittuat nunamiittuallu nunam ataaniittuallu sitququvlugich qiksiksrautikun Jesus-mun. 11Suli iluqaġmiŋ iñuich iḷisimanaqsiḷugu uqallausiġiniaġaat Jesus Christ Atanġuniḷugu. Tainna pikparruŋ God-tauq Aapa nanġaqtauniaġmiuq.
Ukpiqtuat Ittut Qaummaqtun Nunam Iñuŋiñun
12Tavraasii piviuttaġikkavsii, kamagisuuŋakavsiŋa nayuqavsi, naumałhaaqtuq kamagiugaġuvsiŋa nayuqtigiŋitkaluaqtillusi uvamnun. Iñuusitchi uvluutiraġimmasi qanuq annaurrauŋaruat iñuutqusiaŋatiktun, kamagiugaġlugu God qiksigilugu atqunaq, sivuuġagilugu kamaksriŋiññiksraqsi ilaanik. 13Qanuq God savaktuq iḷuvsiññi piyummasiqsuqłusi sunik ilaan pitqukkaġmiñik suli taŋŋiqsillavlugich.
14Supayaat pisigik uqaalaŋaiġḷusi naagga qapiqtaiḷḷisigiŋaiġḷugich, 15#Dt 32.5.pasiñaġumiñaitchumausi iḷumutuuqtuagulusiḷu God-im miqłiqtuŋi, qanuqinniġausiaksraiḷḷusi iñuullavsi akunġanni pigiitchuat uniuŋaruallu iñuich. Akunġanni tainnatchich iñuich taaqtuatun ittuat, ilivsi qaummaġiksuksraurusi qaummatitun, 16quliaqtuaġutilugich iliŋich God-im uqaluŋiñik iñuupkaiḷḷaruanik. Tainna piguvsi, quviasuutigiyumiñaġniaġivsi Christ qaġġivia uvluq tikitpan, iḷitchuġiluŋa savaaġa ilivsiññi anniqsuutauŋatilaaŋanik. 17Tuqutauyumaaġaluaġumaunnii, quyaruŋa quviasuqatigigivsiḷu iluqasi. Qanuq aŋaiyyuliqsiqpaum kuvviqivlugu naimasuġnaqsiḷaaġmatun ikipkaun ikipkaiviŋmi, tainnatulli auga maqigumi iḷḷatauniaġmiuq ukpiġutivsiññun akuqtuġnaġumiñaqsiḷaaġutauluni aitchuun God-mun. 18Tainnatulli ilivsi quyaruksraummiusi, suli quviasuutivsiññi piqatigiluŋa.
Timothy-lu Epaphroditus-lu
19Atanġum Jesus pisuutigikpagu, piyummatigigiga tilisukługu Timothy ilivsiññun qilamipayaaq, quviasaaqtausukłuŋa tusaalluataġuma ilivsigun. 20Piitchuŋa allamik iñuŋmik Timothy-tun ittuamik, kipiġniupiaġataġluni uŋiarrisaqaġniaqtuamik anniqsuġumavlusi. 21Iñuich maani allat iluqaġmiŋ qaunagigaich ilaisa kipiqqutitiŋ, qaunagiŋaiqł̣ugich kipiġniuġutit Jesus Christ-kun. 22Aglaan Timothy-m nalliummatiniŋa iḷisimagiksi savaqasiqsuġmaŋa alġaqsriuñiġmi tusaayugaaġiksuamik. Savaqasiqsuŋagaaŋa iġñiqtun savaqatauruatun aapamiñun. 23Tavraasii tiliyumaaġiga ilivsiññun iḷitchuġipqauraġuma qanuqtauniaqtilaamnik, 24aasii ukpiġigiga Ataniq uvaŋaptauq qaiñiaqtilaamnik qilamipayaaq.
25Isummatigiŋagiga tiliraksraġipiaqługu ilivsiññun Epaphroditus aniqatikput savaqatiga aŋuyaqatigalu, ilivsivsauq kivgaqsi savaktitaqsi ikayuqtigipkaqługu uvamnun, 26ilaan kipiqqutigimmigaasi tautugukłusi iluqasi, suli isumaaluŋammiuq tusaaŋaniqavsi naŋitilaamiñik. 27Naŋipiaġataŋaruq tuquqqayaqtaallaġmi. Aglaan God-im nagligiŋagaa, kisianami nagligiŋitkaa aglaan uvaŋalu, iḷaanni isumaaġutiqavsaaġasugaluŋa. 28Kipiġniuttaġiłhaaġiga tilisukługu quviatchaquvlusi taututqikkuvsiuŋ, aasiiḷi uvaŋa isumaaluutaiġḷuŋa. 29Paġlayumagiksi quviasuutiqpakun paġlammatuttauq allat ukpiqtuaguqatisi. Suli isummatigilluataġaġusigik iñuich ilaatun ittuat, 30qanuq ilaan tuqqutigiqqayaŋagaa savaani Ataniġmun, anayasaaqługu iñuggunni naatinniaqługu savaaqsi uvamnun.
Currently Selected:
Philippians 2: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
