Popular Bible Verses from Philippians 2

Share

Siŋñatiqaġnasi piġuqtiġnasiḷu aglaan kamasaaġutaiḷḷusi avanmun, isumaqaŋaiġḷusi nakuułhaaġasugalusi allaniñ iñuŋniñ. Ilivsiññun kisian kipiġniuġutigiŋaiġḷusi, aglaallu allat iñuich kipiġniuġutilugich.

Isumaqaqtuiññaqtuksraurusi Christ Jesus isumaqausiatun.

Jesus Christ Iġñiq taimaŋŋaqaŋa God-tauruaq Aapamisun, ilaan taamna tainna irrusiñi piġuqtiġutigiŋaitkaa atiqasiutiniaġluni God-mun. Aglaan inmiñik pisuksiññaqłuni ilaan atuŋisaallaŋagaa God-mun nalliummatinini, aasii kamanaiqł̣uni kivgaġuŋaruq. Ilaa aniŋaruq aakamiñ iñuktun, qiññaqanikłuni iñugruiññatun. Aasii iñuguqami kamasaaŋił̣ł̣uni kamagiŋagaa God supayaakun, tuquvluni unnii kikiaktuurrauvluni aŋarrauramun pitquranik navguiritun.

Qanuq God savaktuq iḷuvsiññi piyummasiqsuqłusi sunik ilaan pitqukkaġmiñik suli taŋŋiqsillavlugich.

Taamna pisigivlugu God-im atqunaqługu kamanaqsipkaŋagaa suli atchiqł̣ugu atiġmik kamanałhaaqtuamik atipayaaniñ, iluqaġmiŋ qiḷaŋmiittuat nunamiittuallu nunam ataaniittuallu sitququvlugich qiksiksrautikun Jesus-mun. Suli iluqaġmiŋ iñuich iḷisimanaqsiḷugu uqallausiġiniaġaat Jesus Christ Atanġuniḷugu. Tainna pikparruŋ God-tauq Aapa nanġaqtauniaġmiuq.

Supayaat pisigik uqaalaŋaiġḷusi naagga qapiqtaiḷḷisigiŋaiġḷugich, pasiñaġumiñaitchumausi iḷumutuuqtuagulusiḷu God-im miqłiqtuŋi, qanuqinniġausiaksraiḷḷusi iñuullavsi akunġanni pigiitchuat uniuŋaruallu iñuich. Akunġanni tainnatchich iñuich taaqtuatun ittuat, ilivsi qaummaġiksuksraurusi qaummatitun

Tavraasii piviuttaġikkavsii, kamagisuuŋakavsiŋa nayuqavsi, naumałhaaqtuq kamagiugaġuvsiŋa nayuqtigiŋitkaluaqtillusi uvamnun. Iñuusitchi uvluutiraġimmasi qanuq annaurrauŋaruat iñuutqusiaŋatiktun, kamagiugaġlugu God qiksigilugu atqunaq, sivuuġagilugu kamaksriŋiññiksraqsi ilaanik.