Philippians 1
1
1 #
Ac 16.12. Ukua tuyuutit qairut ilivsiññun Paul-miñ Timothy-miḷḷu, kivgauruaŋniñ Jesus Christ-mun. Tuyuutaurut iluqaiññun Philippi-miittuanun ilaaguaqtauruanun God-mun ukpiqłutiŋ Christ Jesus-mun, taputivlugich umialiŋnallu tiikallu. 2God-tiptuq Aapapta Atanġuvlu Jesus Christ tutqiutiqaqtillisi nagliktuusiaqpaqaqtillusiḷu.
Paul Aŋaiyyutigai Taiguaqtuksrat Tuyuunmiñik
3Quyyavigisuugiga God-tiga itqalimaaqavsi, 4ataramik aŋaiyyutipayaamni aŋaiyyutisuugivsi quviasuutiqaqłuŋa, 5quyyatigivlugu ikayuqavsiŋa savaamni alġaqsruivḷuŋa tusaayugaaġiksuamik uvlumiñqaŋa ukpiliqqaaġataġnivsiññiñ paŋmapaŋmun aglaan. 6Aasii nalupqisuŋitchuŋa God-im isagutipkaiŋaruam savaaġiksuamik iḷuvsiññi iglaupkaġniaġaa taamna naatiḷġataġlugu qaiñiŋanun aglaan Jesus Christ. 7Piviuttaġiqpakkivsi. Nalaunŋaruamik quviasuutiqaġumiñaqtuŋa nalupqigiŋiḷḷusiḷu qanuq piqatigiŋagivsiŋa savaaksrirrutaani God-im paŋmapaglu tigutaaqtaukama tigutaaqtauŋaiñŋaġmalu kukiḷullaŋŋaġma ukpiliqsinniaqługich iñuich tusaayugaaġiksuaq Jesus Christ-kun kisimi annautauyumiñaġnivḷugu, aasii ukpiġiraksraġinivḷugu. 8God iḷisimaruq iḷumun uqaqtilaamnik uqallakama kipiġniuttaġipiaġnivḷugu nayuqsiutisukłusi, Christ Jesus tainna irrusiqaqtitkaaŋa iḷumni.
9Uvva aŋaiyyutigivsi inna. Aŋaiyyutigivsi piviuttaqqutiliqsaiññaquvlusi, iḷumun ittuaġlu iḷitchuġisaiññaquvlugu, suli nalaunŋaniqsrauruamik sivunniutiksravsiññik, 10sivuniksraqtaaġiyumiñaqsiḷugu iłuaġniqsrauruaq. Tainna piguvsi, piḷuutiqaġniaŋitchusi pasirauniaŋitchusiḷu Christ qaikpan. 11Aasiisuli tainna piguvsi, ataramik iłuatun iñuuniaqtusi supayaakun ikayuqtiqaġlusi Jesus Christ-mik, iñuŋnun nanġaġumiñaqsiḷugu God kamanaqsiḷiġlugulu.
Iñuuniq Sivuniqaqtuq Christ-mik
12Aniqatiitkaa, iḷisimatqugivsi tigutaaqtaunimni piruat uvamnun siamitivsaaqsiññaŋagaat tusaayugaaġiksuaq. 13#Ac 28.30.Uvuŋaqamaqaŋa iluqaġmiŋ munaqsrich umialgum igluqpaŋani iluqaġmiglu allat uvaniittuat iḷitchuġiŋarut tigutaaqtautilaamnik pisigivlugu Christ-mun kivgauniġa. 14Suli tigutaaqtauniġma qapiŋaiqsaaŋagai aniqatit nalupqisuŋaimmaġiksaaqługich ukpiġunmiŋni Ataniġmun, aasii iqsisaiqsiññaqłutiŋ alġaqsruutigivlugu God-im uqalua sivuuġaŋaiqł̣utiŋ.
15Iñuich iḷaŋisa alġaqsruutigiŋagaat Christ killuqsraqłutiŋ qanaaġuksiññaqłutiŋ, aglaattauq allat alġaqsruutigiŋagaat pisuutigikł̣utiŋ. 16Tamatkuali aqulliich alġaqsruirut piviuttaġivluŋa iḷisimavlutiŋ God-mun savaaksriñŋatilaamnik, taluqsraŋaiġḷuŋa uqautigitquvlugu tusaayugaaġiksuaq nalaunŋaruakun. 17Allalli iñuich alġaqsruutigiŋitkaat Christ pipiaġataġlutiŋ, aglaan uvaŋa killuġivluŋa. Tainna alġaqsruirut isumavlutiŋ iłuiḷḷiuqtivsaaġukkaluaqłuŋa tigutaaqtaunnamni. 18Suŋitchuq. Quviasuutigigiga Christ alġaqsruutigiyumiñaġmarruŋ qanusipayaakun piñaġumiñaqtuakun, sunŋutikkaluakun naagga iḷumi nalaunŋaruakun irrusikun. Quviasuutigivsaaġniaġmigiga, 19iḷisimavluŋa pisigilugich aŋaiyyurriñisi uvamnik, ikayuusiaġalu Ilitqusiġiksuaŋaniñ Jesus Christ, tigutaaqtauŋaiqsitauniaqtuŋa. 20Kipiġniupiaġataqtuŋa piyummatigipiaġigalu suuramikunnii inuqtitchisuŋił̣ł̣uŋa piraksriusiamnik Christ-miñ, aglaan ataramik paŋmapak-unnii qapiŋairrutiqapiaġuktuŋa supayaatigun pikkapkun Christ nanġausiaqaquvlugu, iñuugaluaġuma naagga tuqugaluaġuma. 21Qanuq iñuunimni iñuusiġisutualukkiga savautilugu Christ. Aasii tuqugaluaġuma uvamnun anniqsuutaułhaaġniaqtuq. 22Aglaan iñuuguma anniqsuutauvsaaġumiñaġmiuŋa savaapkun. Nalliaŋnik tigusisausiitchuŋa. 23Qanuqsausiitchuŋa, iñuuluŋa naagga ullaglugu Ataniq. Qimagupiaġaluaġiga maani iñuuniq aasii nayuqsiutilugu Christ, qanuq taamna nakuułhaasaktaqtuq. 24Aglaan ilivsi pisigilusi iñuuruksraułhamaaqtuŋa. 25Iñuuniaqtilaaġasuli nalupqigiŋitkiga, Iḷisimaruŋa tuqutauniaŋisilaamnik uvani tigutaaġviŋmi. Iñuuniaqtuŋasuli ikayuġuglusi suaŋasiḷaaġuglugu quvianaqsiḷaaġuglugulu ukpiġurri. 26Aasii pisigilugu tigutaaqtauŋaiġñiġa utaqqiguvsi atqunaġlugu nanġaġniaġiksi Christ Jesus.
27Uvva una naumałhaaqtuq. Iñuuruksraupiaqtusi Christ iñuutqutaatun iñuŋmiñun, uvaŋa tautukkaluaġuvsi naagga tautuŋitkaluaġuvsi, tusaayumiñaġumauŋa atipiaġataqłusi iñuutilaavsiññik atausiq sivuniġivlugu una, taluqsraŋaiqł̣usi quliaqtuaġitilaaŋanik tusaayugaaġiksuaq iñuich ukpiqtirrutiksraŋat God-mun. 28Iqsitchaktinnasi akiḷḷiḷiqsuqtivsiññun. Qulluaŋairrutivsi qanuqpisiiḷḷiñiaġai suksraunġiqsauniaqtilaaŋannik, suli ilivsi annaurrauyumaaqtilaavsiññik, qanuq God-im akimmasiġaasi. 29Qanuq Christ ukpiġumiñaqsigiññaŋaitkaasi inmiñun aglaallu nagliksautigipkaġumiñaqsivḷuni ilivsiññun. 30#Ac 16.19-40.Tavra iḷaalliutiyumiñaqsiŋarusi uvamnun qapiyaiḷḷusi quliaqtuaġiguvsiuŋ tusaayugaaġiksuaq. Aŋuyaŋniqtun taamna ittuq qiñiġaġikavsiŋa qaŋapak qulluaŋaitchuaŋaa suli tusaavlusiḷu paŋmapak-unnii qapiyaisilaamnik.
Currently Selected:
Philippians 1: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
