Matthew 4
4
Jesus Ikł̣igutchaktinniaqtauruq
(Mark 1.12-13; Luke 4.1-13)
1 #
He 2.18; 4.15. Tavra Jesus aullatiŋagaa Ilitqusiġiksuam nunagluktuamun ikł̣igutchaktinniaquvlugu Tuunġaġmun. 2Aasii ilaa niġiḷaiñŋaruq aŋaiyyuuġukłuni malġukipiani uvluni unnuaniḷu, aasii aquvatigun kaaliŋaruq. 3Tuunġaum qaivḷuni uqallautiŋagaa, Iġñiġipiaqpatin God-im, makua uyaġaich punniġuqtitkich. 4#Dt 8.3.Ilaan kiuŋagaa, Aglausimaruq Bible-ni inna, Iñuk iñuuniaŋitchuq niqikun kisiagun, aglaallu ukpiġilugich God-im uqalupayauraŋi.
5Tavrani Tuunġaum aullautiŋagaa Jesus Jerusalem-mun, aasii inillakługu nuvuquyuanun aŋaiyyuvikpaum qutchigñiqsramun, 6#Ps 91.11, 12.aasii uqallautivlugu, Iġñiġipiaqpatin God-im, nautkiaġiñ, qanuq aglausimaruq Bible-ni inna,
“Ilaan tiliñiaġai isaġuliŋni
munaġitqulutin,
aasii qaunaginiaġaatin
piyaqququŋiḷḷutin.”
7 #
Dt 6.16. Jesus uqallautiŋagaa, Aglausimammiuqsuli, Uuktuġniaŋitkiñ Ataniq God-in.
8Tavrasuli, Tuunġaum aullautiŋagaa qutchipiaġataqtuamun iġġimun, aasii satqummiutivlugu iluqaiññik umialgutiŋiññik nunam, kamanautaanniglu. 9Aasii uqallautivlugu, Iluqaiññik tamatkuniŋa aitchuġniaġikpiñ, sitquġlutin aŋaiyyuvigigumŋa. 10#Dt 6.13.Tavrani Jesus uqallautiŋagaa, Aullaġiñ Satan, qanuq aglausimaruq Bible-ni inna, “Aŋaiyyuvigisaġiñ Ataniq God-in, suli kisian savautiniaġiñ.”
11Tavra Tuunġaum qimaŋagaa, aasii isaġulgich qaivḷutiŋ ikayuŋagaat Jesus.
Jesus Aullaġniigaa Savaani Galilee-mi
(Mark 1.14-15; Luke 4.14-15)
12 #
Mt 14.3; Mk 6.17; Lk 3.19, 20. Tavra Jesus tusaakami John tigutaaġnivḷugu, Galilee-muksaŋaruq, 13#Jn 2.12.aasii qimakługu Nazareth aullaqłuni iñuurraqsiŋaruq Capernaum-mi tatchim Galilee-m siñaaniittuami, nunaŋani Zebulun Naphtali-vlu. 14Taamna uqautigiŋakkaŋa uqaqtaata God-im Isaiah-m nalautautquvlugu inna,
15 #
Is 9.1, 2. “Nunaŋa Zebulun nunaŋalu Naphtali-m,
tuŋaani tatchim, taaganitchiani Jordan,
Galilee-m iḷaŋani Jew-guŋitchuat iñuuvianni!
16Iñuich taaqtuamiittuat tautugniaġaat ilaa kamanaqtuatun qaummaqtun ittuaq;
suli tamatkua sivuuġaruat tuqqunmik,
iñuummatun tuqqutim taġġaŋani,
iñuurraqsiñiaqtut ukpiliġḷutiŋ,
qausaġatautimmatun.”
17 #
Mt 3.2. Tavraŋŋaaglaan Jesus alġaqsruirraqsiŋaruq, uqaqłuni, Isumalitqigitchi, qanuq God-im atanniqsimasaaqsigai iñuich.
Jesus Ququaġai Sisamat Iqaluŋniaqtit
(Mark 1.16-20; Luke 5.1-11)
18Jesus pisuaġniallaġmi siñaagun tasiata Galilee-m, tautuŋagik aniqatigiik, Simon tairauruaq Peter-mik, Andrew-lu aniqataa, kuvriqsuak tatchimun, iqalugniaqtauvlutik. 19Ilaan uqallautiŋagik, Maliktinŋa. Iqalugniaġusiptiktun, iḷisautiniaġiptik iñunnagniaġniġmik. 20Tavrauvvaa qimaŋagaik kuvratik aasii malikługu.
21Tavraŋŋa aullalgiññami Jesus tautulgitkik malġuksuli aniqatigiik, James-lu John-lu Zebedee-m iġñiŋik, umiuramiinniqsuat Zebedee-lu aapariŋ, allaiyaqługich kuvratiŋ. Ilaan ququaŋagik. 22Tavrauvvaa qimaŋagaich umiuraqtik aapariglu, aasii malikługu Jesus.
Jesus Iḷisaurriruq, Alġaqsruiruq, Iłuaqsiriruġlu Naŋittuanik
(Luke 6.17-19)
23 #
Mt 9.35; Mk 1.39. Aasii ilaa kukiḷuŋaruq iluqaani Galilee-mi, iḷisaurrivḷuni aŋaiyyuviŋiññi alġaqsruivḷuniḷu tusaayugaaġiksuaŋanik atanniqsimmataata God-im, suli iłuaqsivḷugich iñuich naŋirrutiqapayauraqtuat. 24Tavra Jesus tusaaŋagaat aliuġnaġniŋa siamiłłuni iluqaiññun nunaaqqiŋiñun Syria-m. Aasii iñuich qaġġirriŋarut ilaanun iluqaiññik naŋittuanik, tamatkuniŋa nagliksautiqaqtuanik qanusiḷimaanik naŋirrutinik kiiqsiuġutiniglu, iḷitqusiqł̣uqaqtuallu, qiiqsruġuuruallu, avatiŋiḷḷu tuquŋaruat, aasii ilaan iłuaqsiŋagai iluqaisa. 25Suli iñugiapiaġataqtuat maliŋagaat Jesus Galilee-miñ, quliniḷḷu nunaaqqiñiñ, Jerusalem-miḷḷu, Judea-miḷḷu taavaŋŋatchianiḷḷu kuugum Jordan.
Currently Selected:
Matthew 4: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
