Matthew 3
3
Alġaqsruiñiŋa John Paptaiqsim
(Mark 1.1-8; Luke 3.1-18; John 1.19-28)
1Taipkunani uvluni John Paptaiqsi qaiŋaruq, alġaqsruivḷuni nunagluktuaŋani Judea-m. 2#Mt 4.17; Mk 1.15.Uqaqłuni, isumalitqigitchi, qanuq God-im atanniqsimasaaqsigai iñuich. 3#Is 40.3.John-guŋaruq Isaiah-m God-im uqaqtaata uqallausiġiŋakkaŋa,
“Iñuk imma alġaqsruiruq nipatuvluni nunagluktuami,
Ataniq qaiyasiruq.
Apqutiksriuqsiuŋ sivukkiksiḷugich.”
4 #
2 K 1.8. Tavra John annuġaaqaŋaruq kakaktim pikukturuam amianik, suli qisiŋmik tavsiqaqłuni, aasii niqigivlugich nuttagayuich qupilġut igutchaiḷḷu honey-ŋannik paqinnaqtuamik nunagluktuami. 5Tavra iñuich ullaaŋagaat John Jerusalem-miñ iluqaaniḷḷu Judea-miñ, suli iluqaiññiñ nunaaqqiñiñ avataaniittuaniñ kuugum Jordan. 6Suli John iñuich paptaiŋagai kuuŋani Jordan, quliaqtuqługich piḷuutitiŋ God-mun.
7 #
Mt 12.34; 23.33. Tavra iḷitchuġikamigich iñugiaktuat Pharisees Sadducees-lu paptaiqsauyyaqtuat, ilaan uqallautiŋagai, tuqunaliktun nimiġiatun ittusi, pisaasuqtusi. Isumanasi paptaiqsaugiññaġlusi pillugniaġasugalugu God-im tatavsautaa. 8Iñuusitchi nalunaiġḷugu isumalitqiksilaaqsi piḷuutivsiññiñ. 9#Jn 8.33.Suli isumasaġnasi pillugniaġasugalugu God-im tatavsautaa pisigilugu Abraham-mun kiŋuniġiniḷusi. Qanuq uqallautigivsi, God miqłiqtuliḷḷaruq Abraham-mun makkunaŋŋa uyaġagniñ. 10#Mt 7.19.God-im isivġiutaa qallipiaġataqtuq, iñuktun itqanaiqsuatun kipisałhiñaaġuqługu napaaqtuq kaŋiagun. Napaaqtupayaaq siiġñiḷḷuatalaitchuaq kipirausuuruq, aasii qirugivlugu igniġmun. Tainnatun God-im suksraunġiġñiaġai iñuich nalaunŋarualiqiŋitchuat. 11Uvaŋa paptaiġivsi imiġmik isumalitqikavsi, aglaan imma qaiñiaqtuaq aqupkun sapiġñałhaaqtuq uvamniñ, nalliummatiŋitchuŋaunnii aluġutik saagaġumiñaġlugik. Iḷiñiaġaa Ilitqusiġiksuaq iḷuvsiññun, aasii piiġḷugu piḷuun. 12Ilaan amiġaiyautini kakiuraqpait saagaġigai, suli suaqłuiyaġniaġaa amiġaiyaiviñi aasii katillugich palauvaksrat tutquiviŋmun, aglaan ikipkaġniaġai amiġaŋich qaminnaġumiñaitchuamik igniġmik.
Jesus Paptaiqsauruq
(Mark 1.9-11; Luke 3.21-22)
13Tavra tavrani Jesus iñukpalliŋaruq Galilee-miñ Jordan-mun John-mukłuni, paptaiquvluni ilaanun. 14John-gum paptaiġuŋitkaluaġaa, uqallakłuni, Ilivich uvva paptaigaksraġigaluaġiŋma, aasiuvva qaivich uvamnun paptaiquvlutin? 15Tavra Jesus kiugiññaŋagaa, Tainna piḷi paŋmapak. Taamna piguptigu, taŋŋiġñiaġikpuk iluqaan God-im piraksriutaa. Tavra John piyumaliŋaruq.
16Tavra Jesus paptaiqsauganikami, tavrauvvaa qakiŋaruq immamiñ. Tavra qiḷak aŋmaqłuni, John tautuŋagaa Ilitqusiġiksuaŋa God-im atqaqtuaq tiŋmiatun, aasii mitchaaqłuni ilaanun. 17#Gn 22.2; Ps 2.7; Is 42.1; Mt 12.18; 17.5; Mk 1.11; Lk 9.35.Aasii tusaaŋagaa nipi qiḷaŋmiñ, Uvva piviuttaġikkaġa Iġñiġa. Ilaa iviġaummatigilluataġiga.
Currently Selected:
Matthew 3: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
