Matthew 16
16
Iñuich Tautuguŋarut Aliuġnaqtuamik
(Mark 8.11-13; Luke 12.54-56)
1 #
Mt 12.38; Lk 11.16. Tavra Pharisees-lu Sadducees-lu qaiŋarut Jesus-mun, aasii uuktuaqsaqługu apiġiŋagaat tautuktitquvlutiŋ aliuġnaqtuamik qiḷaŋmiñ, iḷisimanaqsisaġlugu God-mun iviġaumagitilaaŋa. 2Ilaan kiuŋagai, Unnuksraaġman uqallaguurusi, siḷaŋŋuġniaġaa qanuq qiḷak kaviqsiruq. 3Aasii uvlaami uqallaguummiusi, sialugniaqtuq uvlupak qanuq qiḷak kaviqsiularuq maŋaaqsiruġlu. Iḷisimagaluaqłusi sivunniuġniŋanik qiññaŋata qiḷaum, iḷitchuġilaiññiġisi sivuniŋich aliuġnaqtuat savaaguruat akunnavsiññi. 4#Mt 12.39; Lk 11.29.Qanutun pigiisigirut god-aitchullu iñuich, makua savaquriruat uvamnik aliuġnaqtuanik. Aliuġnaqtuatualuk savaaguniaqtuaq piñiaqtuq Jonah-tun uqaqtiŋatun God-im. Tavra ilaan qimaŋagai aasii aullaqłuni.
Pharisees-lu Sadducees-lu Arriqaqtut Imaksramik
(Mark 8.14-21)
5Tavra ikaaganikamiŋ taaguŋatchianun tatchim, iḷitchitqurat iḷitchuġiŋarut piiguqtilaamiŋnik punniġnik. 6#Lk 12.1.Jesus uqallautiŋagai, Qaunagisitchi nipuŋaiḷḷusiḷu imaksriuqtaŋiññik Pharisees, Sadducees-lu. 7Tavra uqaarraqsiŋarut avanmun uqaqłutiŋ, Ilaan uqallausiġigaa taamna punniliraaŋiññapta. 8Tavra Jesus, iḷisimavlugu qanuq uqaqtilaaŋat uqallaŋaruq, Uvvailivsi summan uqaaġutiqaqpisi akunnavsiññi punniġutaiññivḷusi? Iñuich ilivsi ukpiġutikitchusi. 9#Mt 14.17-21.Kaŋiqsiŋaitpisisuli? Itqaumaŋitpisigik ipkua tallimat punniġich avguqapkich 5,000-nun aŋutinun? Qavsiñullu aguummagnun immiqsiŋavisi? 10#Mt 15.34-38.Naaggaunnii tallimat malġuk punniġich avguqapkich 4,000-nun? Qavsiñullu aguummakpagnun immiqsiŋavisi? 11Qanuq imña kaŋiqsiŋiññiqpisi uqautiqaŋisilaamnik punniġnik. Qaunagisitchi imaksrautiŋisigun Pharisees Sadducees-lu. 12Tavrani iḷitchitqurat kaŋiqsiŋarut ilaanun uqautiŋisilaamiŋnik imaksraŋagun punniġum, aglaan qaunagitquvlugich iḷisaurrutiŋisigun Pharisees Sadducees-lu.
Peter-m Uqallautaa Jesus Kiutilaaŋanik
(Mark 8.27-30; Luke 9.18-21)
13Tavra Jesus tikiññamiŋ nunaaqqiŋiññun Caesarea Philippi-m, apiġiŋagai iḷitchitqurani, Iñuich kiunisuuvanŋa, Iġñiŋa Iñuum? 14#Mt 14.1, 2; Mk 6.14, 15; Lk 9.7, 8.Iliŋich uqallaŋarut, John-gunisuugaatin Paptaiqsi, allalli Elijah-univḷutin, allat suli Jeremiah-univḷutin naaggaqaa iḷaginivḷutin uqaqtiŋiñun God-im. 15Ilaan apiġiŋagai, Ilivsiḷimi kiunivisiŋa? 16#Jn 6.68, 69.Simon Peter uqallaŋaruq, Ilivich Christ-gurutin, Iġñiŋa iñuuruam God-im. 17Jesus kiuŋagaa, Quviatchaktitaugiñ Simon iġñiŋa John, qanuq iñuum satqummiŋaitkaa iliŋnun taamna uqallautin, aglaan Aapama qiḷaŋmiittuam. 18Aasii uqallautigikpiñ, ilivich Peter-aurutin, sivuniqaqtuaq Uyaġagmik, aasii taavrumuŋa uyaġagmun nappaġniaġiga aŋaiyyuviga, aasii suaŋŋatipayauraŋisa Tuunġaum payariyumiñaitkaat. 19#Mt 18.18; Jn 20.23.Aitchuġniaġikpiñ pitchiġiiyautiŋiñik Atanniqsimmataata Taavruma qiḷaŋmiittuam. Taamna sivuniqaqtuq pitquŋisasi Aŋaiyyuvimñi nunami pitquniaŋiñmigai Taavruma qiḷaŋmiittuam, aasii supayaat pipkallakkasi nunami pipkallaniaġmigai Taavruma qiḷaŋmiittuam. 20Tavrani Jesus uqautipiaġataŋagai iḷitchitqurani quliaqtuaquŋił̣ł̣ugich kimununnii Christ-guniḷuni.
Jesus Uqautigigaa Nagliksaaġniksrani Tuquniksraniḷu
(Mark 8.31—9.1; Luke 9.22-27)
21Tavraŋŋaaglaan Jesus iḷisautirraqsiŋagai iḷitchitqurani aullaqtuksraupiaġnivḷuni Jerusalem-mun aasii nagliksaaġutiqaġluni iñugiaktuanik umialiŋnaŋiññiḷḷu Jew-guruat aŋaiyyuliqsiqpagniḷḷu iḷisaurriñiḷḷu pitquranik, aasii tuqutauluni, aasiisuli uvluk piŋayuanni aŋipkaqtauluni. 22Tavra Peter-m asivaqtaaġutivlugu uqallautiŋagaa, Tainna uqaqtuksrauŋitchutin. Ataniiq, God-im pipkaŋaiḷḷiuŋ taamna. Taamna piruksrauŋipiaqtuq iliŋnun. 23Tavra Jesus qiviaqługu Peter uqallautiŋagaa, Satan, piiġiñ uvamniñ. Piñaiḷutaurutin uvamnun, qanuq isumaŋitchutin God-im isummasianik aglaan iñuich isumaŋannik.
24 #
Mt 10.38; Lk 14.27. Tavrani Jesus uqallautiŋagai iḷitchitqurani, Kialiqaa maligukkumiŋa piruksrauŋitchuq ilaan pisukkamiñik, iqsriutilugu aŋarraurani, itqanaitchuksrauruq tuqqutigiyumiñaġluŋaunnii. 25#Mt 10.39; Lk 17.33; Jn 12.25.Qanuq iñuk iñuullatuvaił̣aktuaq tammaiñiaqtuq iñuggunmiñik, aglaalli iñuk sullatuaġumiḷu atiruaq tuqqutiyumiñaġluŋaunnii, tammaiyumiñaipiaġaa iñuggutini. 26Iñuk suġallakkaluaġumi supayauranik nunamiittuanik aasii tammautigilugich, ilaa suuramikunnii anniqsuġumiñaitchuq inmiñik. Sumik piitchuq iñuum simmiutiksraŋanik iñuggunmiñun. 27#Mt 25.31; Ps 62.12; Ro 2.6.Qanuq Iġñiŋa Iñuum qaiyumaaqtuq piqatigilugich isaġuliŋni qaumanġagun Aapami, aasii tavrani akiḷiġḷugu iñupayaaq savaaŋigun. 28Iḷumun uqallautigivsi, iñuqaġniaqtuq iḷaŋiññik makitaruanik uvani tuquniaŋitchuanik tautukkaluaġnatiŋ Iġñiŋanik Iñuum qairuamik umialiktun.
Currently Selected:
Matthew 16: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
