Matthew 17
17
Jesus Qiññaŋa Allaŋŋuqtauruq
(Mark 9.2-13; Luke 9.28-36)
1Tavra itchaksrat uvlut pianiŋmata Jesus piqasiutiŋagai inmiñun Peter-lu, aniqatigiigḷu James-lu John-lu, aasii aullautivlugich qutchiksuamun iġġimun kisiisa.
2Tavra ilaa qiññaġmiñi allaŋŋuŋaruq sivuġaanni, suli kiiñaŋa qaummaġiksivḷuni siqiñiqtun, annuġaaŋiḷu qatiqsivḷutiŋ qaummaqtun. 3Tavraasii niptaŋaruk ilaiññun Moses-lu Elijah-lu, uqaaqatigivlugu Jesus. 4Tavra Peter uqallaŋaruq Jesus-mun, Ataniiq, iłuaqtuq tavraniinnapta. Pisukkuvich tupiġniaqtuŋa piŋasunik mauŋa, atautchimik iliŋnun, suli atautchimik Moses-mun, suli atautchimik Elijah-mun. 5#Gn 22.2; Ps 2.7; Is 42.1; Mt 3.17; 12.18; Mk 1.11; Lk 3.22; Dt 18.15.#2 P 1.17, 18.Uqaġataviksillugu suli, qaummaġiksuam nuvuyam qulaŋiġmagich, nipi nuvuyamiñ uqallaŋaruq, Uvva piviuttaġivlugu Iġñiġa iviġaummatigilluatakkaġa. Naalaġnisiuŋ. 6Iḷitchitqurat tusaakamirruŋ nipi, punŋarut nunamun, suli iqsitchapiaġataŋarut. 7Tavra Jesus qaivḷuni aksiŋagai uqallautigillaan, Makittitchi suli iqsiŋaiġitchi. 8Tavrani aaġluqamiŋ, tautuŋitchut iñuŋmik aglaan Jesus kisian.
9Tavra atqallaġmiŋ iġġimiñ, Jesus piraksriŋagai, Quliaqtuaġnasi iñuŋmun tautukkavsiññik, Iġñiŋa Iñuum aŋitchiaġilugu tuqqunmiñ. 10#Ml 4.5.Tavra iḷitchitqurat apiġiŋagaat, Summan uvva iḷisaurrit pitquranik uqaġuuvat Elijah qaiqqaaqtuksrauniaġnivḷugu qaiŋaiñŋaan Christ-guruaq? 11Ilaan kiuŋagai, Iḷumun ittuq Elijah qaiqqaaġniaqtuq Christ-miñ aasii itqanaiġñiaġai supayaat. 12#Mt 11.14.Aglaalli uqallautigivsi Elijah qaiganiŋaruq, aasii iñuich iḷisaġiŋaitkaat, aglaan iñuich piŋagaat qanupayauraq pisukamirruŋ. Tainnatuttauq aasii Iġñiŋa Iñuum nagliksaaqtinniaġmigaat. 13Tavrani iḷitchitqurat kaŋiqsiŋarut ilaanun uqautitilaamiŋnik sivuniġivlugu John Paptaiqsi.
Jesus Iłuaqsigaa Nukatpiaġruk Ilitqusiqł̣ulik
(Mark 9.14-29; Luke 9.37-43a)
14Tavra iñusalaŋnun tikiutimmata, iñuum ullaŋagaa Jesus aasii sitquqłuni sivuġaanun uqallaŋaruq, 15Ataniiq, Naglikkutiqaġiñ iġñimnun, qanuq ilaa qiiqsruġuuruq aasii nagliksaaqpaguuruq, qanuq akulaitchuami puukaġuuruq igniġmun imiġmullu. 16Qaġġisiŋagaluaġiga iḷitchitquraġnun, iłuaqsiḷaiñŋagaat. 17Tavra Jesus kiuŋagai, Qanutun uvva ukpiġutaisigirusi killukuaqtigivlusiḷu iñuich. Qanutun sivisutigiruamik nayugaksraġivisi ukpiliġataqtillusi? Qanutun igḷutugaksraġivisi? Qaġġitchuuŋ nukatpiaġruk uvamnun. 18Tavra Jesus suaŋagaa ilitqusiqł̣uk, aasii aniŋaruq nukatpiaġrugmiñ, suli nukatpiaġruk iłuaqsirauŋaruq tavrauvvaa.
19Tavrani iḷitchitqurat qaiŋarut Jesus-mun iñuił̣aamun aasii uqallakłutiŋ, Suvluta uvagut ilitqusiqł̣uk anilaitpisigu? 20#Mt 21.21; Mk 11.23; 1 Co 13.2.Jesus uqallautiŋagai, Patchisauruq ukpiġutikiññiqsi. Qanuq iḷumun uqallautigivsi, ukpiġutiqaġuvsi nautchiaksratun mustard-tun mikipiaġaluaqłuni naullaruatun napaaqtuqpaġuqłuni, uqallautiyumiñaġiksi una iġġiq, Nuuttin maaŋŋa avuŋaqpanun, aasii nuunniaqtuq. Suli sunaliqaa piḷḷasiñiaġiksi. 21Aglaan tainnasiq ilitqusiqł̣uk sumikunnii aniḷaitchuq aŋaiyyutauŋitchuakun niġiḷaiḷḷuni.
Jesus Uqautigivsaaġaa Tuqqutini
(Mark 9.30-32; Luke 9.43b-45)
22Tavra kukiḷuŋniallaġmiŋ Galilee-mi, Jesus uqallautiŋagai iḷitchitqurani, Iġñiŋa Iñuum aitchuutauniaqtuq iñuŋnun, 23aasii tuqunniaġaat, aglaan ilaa aŋipkaqtauniaqtuq uvluk piŋayuanni. Tavra iḷitchitqurat ipiqtutchapiaŋarut.
Akiḷiiñiq Aŋaiyyuvikpaum Tax-iġutiŋiñik
24 #
Ex 30.13; 38.26. Jesus-lu iḷitchitquraniḷu tikiñmata Capernaum-mun, katitchirit Aŋaiyyuvikpaum tax-iġutiŋiñik qaiŋarut Peter-mun aasii apiġivlugu, Iḷisaurriksi akiḷiiḷaitpa tax-iutiŋiñik aŋaiyyuvikpaum? 25Ilaan kiuŋagai, Akiḷiisuuruq. Tavraasii Peter isiġman iglumun, Jesus uqallaqqaaŋaruq ilaanun, Simon, qanuq isumavich? Kisuniñ umialiŋi nunam katitchisuuvat taxes-nik? Ilaisa nunamigni iñuŋmiŋniñ naagga allat nunat iñuŋiññiñ? 26Peter-m kiuŋagaa, Allaniñ. Tavra Jesus uqallautiŋagaa, Umialgum iñuŋi akiḷiiḷaitchut. 27Tainnailluqtuqunnii iłuigutchaguŋiḷḷugich, niksiḷiġiaġiñ immamun, aasii tigulugu niksiksan sivulliq qakitkupku aatchaqtitkupku paqinniaqtutin naamaruamik maniŋmik tax-iutiksraptiŋnik aŋaiyyuvikpaŋmun. Tigulugu manik aitchuutigiyumagiñ ilaiññun aitchuisilunuk.
Currently Selected:
Matthew 17: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
