James 4
4
Avilaitqatiqaġniq Nunam Iñuŋiñik
1Sum aullaqisaaġuuvagich aŋuyautit qanaaġutillu akunnavsiññi? Iñukpalliġuurut pigiitchuaniñ pisuutivsiññiñ iñiqługu qalanmatun ittuamiñ iḷuvsiññiñ. 2Kipiġniuġaluaġaqtusi piqaġukłusi pigiliutillammiñaġiḷḷu, taimmaasii iñuaqsałhiñaaġuqłusi. Suli kaviuqłusi piññaktaaġillammiñagiḷḷu, aasii taimma qanaaġutiaqsivḷusi aŋuyautivlusiḷu. Piññaktaaġilaitkisi pigisukkasi, qanuq apiqsriaġilaitkisi God-mun. 3Apiqsrigaluaġmiraqtusi aitchuusiaqalaitchusi, qanuq apiqsrisuuvlusi killukuaŋaruakun, atuġuqługich ilivsi aliasuŋisaaġutivsiññun. 4Ukpiġnaitchuasii iñuich, naluvisiuŋ avilaitqatauniq nunam iñuŋiñun piḷuusiqisuuruanun akiḷḷiḷiqsuutautilaaŋanik God-mun? Tavraasii kiñapayaaq avilaitqatauruaq nunam iñuŋiñun, aŋuyyiruq inmiñik God-mun. 5Isumavisi taŋiġiḷamik Bible uqaġasugalugich uqallakamiŋ inna, Ilitqusiq God-im iḷiraŋa iñuŋmun mumiŋaruq tutchutikun kipiġniuġutinun. 6#Pr 3.34.Aglaan taavrumaŋŋa kipiġniuġunmiñ suaŋałhaaqtuq God-im nagliktuutiqpakun ikayuun aitchuutaa. Taamna pisigivlugu Bible uqaluŋich uqaqtut inna, “God-im akiḷḷiḷiqsuġai kamasaaqtuat, aglaan aitchuiruq nagliktuutiqpaŋmik kamasaaŋitchuanun.” 7Aŋalallisi God-im. Akiḷḷiḷiqsuqsiuŋ Tuunġaq aasii pigruġniaqtuq ilivsiññiñ. 8Qalliḷaaġitchi God-mun, ilaaptauq qalliḷaaġniaġmiuq ilivsiññun. Piḷuusiqirauruasii, isumalitqigitchi piḷuutiniñ savaaġiŋaravsiññiñ. Ilivsi malġuŋnik isumaqaqtuasii, kamagipiaġataqsiuŋ God. Ukpiŋŋuaqtuaguŋaiġitchi. 9Nunuuraliġitchi isumaaġlusiḷu qialusiḷu piḷuutisi pisigilugich. Iglaqhaaqtaġniqsi mumigḷi qirratiġuġluni, suli quviasuutiksi ipiqtusuutiġuġluni. 10Kamanaiġitchi ilivsiññik sivuġaani God-im, aasiiḷi ilaan kamanaqsipkaġniaġaasi.
Kiliktuun Qanuqinniġaqłiutikun Aniqanmik
11Aniqatiimaaŋ, uqautikkutinasi pigiitchuamik avanmun. Qanuq iñuk uqautiqaqtuaq pigiitchuamik aniqanmun naagga qanuqinniġairuaq aniqanmiñik uqautigigai pigiitchualivḷugich pisaaŋavlugiḷḷu God-im pitquraŋi piviuttaqqutinikun avanmun. Tainna iḷiuġuvsigik God-im pitquraŋi kamaksriñiaqtuaguŋaiqsusi pitquranik, aglaan isivġiqsiġuqtusi pitquranik. 12God kisimi pitquralirauruq isivġiqsauvluniḷu. Ilaa kisimi annaurriḷḷaruq suksraunġiiḷḷavluniḷu. Aglaalli kiunasugivich isivġiqsuatiin siḷalliġñik?
Kiliktuun Uqavigaaġnikun
13 #
Pr 27.1. Naalaġnisiŋa, ilivsi uqaqtuasii inna, Uvlupak naagga uvlaakun aullaġniaqtugut nunaaqqimun aasii ukiiḷuta taamani tauqsiqsuġluta maniññaksaġluta. 14Tainna uqaqtutin nalullaqpich uvlaakuksramik. Suuva iñuutchiñ? Taktugayaatun ittuq sivikitchuami illaktuatun, aasii taktuiqł̣uni. 15Innaaglaan uvva uqaġumiñaġaluaqtutin, Atanġum pisuutigikpagu, iñuuniaqtugut aasii piḷugu una naagga taiŋña. 16Tainna uqallaŋisuaġuvsi, uqavigaaqtusi arguaŋŋativsiññi. Aasii iluqaġmi tainnasiq uqavigaaġun pigiitchuq. 17Kiñaliqaa iḷisimagaluaqłuni nalaunŋaruamik piraksramik piŋiññamiuŋ, ilaa piḷuksiruq.
Currently Selected:
James 4: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
