James 5
5
Kiliktuun Suġalliruanun
1Naalaġnisiŋa, ilivsi suġalliruasii, qiasitchi siaqqaulasitchiḷu pisigilugu iłuiḷḷiuqpakkumaaġniqsi. 2#Mt 6.19.Suġalisi siŋñagivlugich tutquqtaġikkasi maquŋarut, annuġaasiḷu qupilġut niġigaich. 3Maniutisi kaviqsuat qatiqtuallu qaliŋagai, aasii qaliqtauniŋich nalupqinaiġutauniaqtut ilivsi siŋñatutilaavsiññun aasii nunuuraliqsiqpaglusi timiriunnii igniġum ikiraŋatun piḷusi, qanuq ilivsi tutquqtaġiŋagisi suġalliasi kisivsiññun makkunani aqulliġñi uvluni. 4#Dt 24.14, 15.Akiḷiḷaitkisi iñuich savaktuat nautchiaqaġvivsiññi. Tusaasigik uqaavsisiŋich. Suli nipauġutiŋich katitchiruat palauvaksranik God-im tusaqsraġigai, Atanġum sapiġñaqtuam. 5Iñuuŋarusi nunami susuŋisaaġutipiaġatakun aliasuŋisaaġunmiḷu, quiññaksaŋarusi niġrutitun uvluanun tuqutchivium. 6Suksraunġiiŋarusi iñuaŋarusiḷu nalaunŋaruamik iñuŋmik, akiḷḷiḷiqsuŋaiñmigaasi.
Qiñuirrun Aŋaiyyullu
7Tavraasii aniqatiimaaŋ, qiñuitchitchi qaiñiŋanunaglaan Atanġum. Iḷisimasiuŋ una, nautchialiqiri utaqqiuġuuruq qiñuiqł̣uni piqpagnaqtuanun nauruksranun nunamiñi, qiñuiqł̣uni utaqqiraqtuq sialuŋnaġiaqtuksramik, aquvatigullu sialuŋniksramik. 8Ilivsivsauq qiñuitchitchi qapiŋairrutiqaġlusi, qanuq qaiñiksraŋa Atanġum qalliruq. 9Aniqatiimaaŋ, uqamayuutiqaġnasi avanmun, God-im isivġiŋitchumagaasi. Iḷisimasitchi, Isivġiqsi tikiyasiuraqtuq. 10Aniqatiimaaŋ, tuvraaksraurut nagliksaaġniġmullu qiñuirrunmullu uqaqtiŋi God-im uqaŋaruat pisivlugu Ataniq. 11#Job 1.21, 22; 2.10; Ps 103.8.Iḷisimasiuŋ una, quviasuŋnisuugivut qiñuitchuat. Tusaaŋagiksi Job qiñuitchuaq, suli iḷitchuġiŋagiksi Atanġum piŋaraŋa ilaanun. Aasii paŋmapak iḷitchuġirusi Ataniq iḷunŋusuutiqpaqaqtuq naglikkutiqpaqaqłuniḷu.
12 #
Mt 5.34-37. Aniqatiimaaŋ, naumaruaq tamatkunaŋŋa, unniqsuqłiikavsi suaŋasiḷiqsaanagich unniqsuqłiisisi atuġlugu qiḷak naagga nuna naagga qanusipayaaq uqaluk. Aglaan unniqsuqłiikavsi aŋiqsiññaġitchi suli naaggaaqsiññaġitchi, God-im isivġiŋitchumagaasi.
13Kiñaliqaa iḷari nagliksaaqpa? Aŋaiyyuli. Quviasukpa? Atuġli nanġautinik. 14#Mk 6.13.Iñuk iḷari naŋitpa? Qaitquligich aŋaiyyuliqiruat umialiŋnaŋich, iliŋisa aŋaiyyutilirruŋ uqsruqtiġlugu olive uqsruanik pisilugu Ataniq. 15Aasii ukpiġutiqaqłutiŋ aŋaiyyutaata iłuaqsipkaġniaġaa naŋittuaq, aasii Atanġum naŋinŋaiqsinniaġaa, aasii piḷuusiqiŋaniqpan suliqutigiŋaiqsauniaqtut itqaumayumiñaiġḷugich. 16Tavraasii quliaqsigik piḷuutisi pirasi allamun iñuŋmun ilaanun, aŋaiyyutilusiḷu avanmun, iłuaqsirauyumausi. Aŋaiyyutaa nalaunŋaruam iñuum suaŋŋatiqpaqaqtuq taŋŋiqsuiḷḷaruġlu. 17#1 K 17.1; 18.1.Elijah iñuktauq uvaptiktun irrusiḷik aasii aŋaiyyuŋaruq kipiġniuqłuni sialuquŋił̣ł̣ugu, aasii ukiuni piŋasuni itchaksraniḷu tatqiñi sialuŋaitchuq nunamun. 18#1 K 18.42-45.Aasii aŋaiyyutqiŋammiuq tavraasii sialuguŋaruq, aasii nuna naurivḷuni.
19Aniqatiimaaŋ, kiñaliqaa asivaqpan iḷumun ittuamiñ aasii iñuum isumalitqiksitpagu, 20#Pr 10.12; 1 P 4.8.iḷisimali kialiqaa piḷuusiqiri isumalitqiksitpagu killuliqutaaniñ annaurraupkaġniaġaa ilitqusia tuqqunmiñ, suli iñugiapiaġataqtuat piḷuutit suliqutigiŋaiqsaupkaġlugich.
Currently Selected:
James 5: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
