James 3
3
Uqqam Irrusia
1Aniqatiimaaŋ, iñugiaktuasii iḷisaurriġuġnasi, qanuq iḷisimarusi uvagut iḷisaurriruaguut isivġiusiaqaġniaqtugut tuniqtulluktuamik allaniñ. 2Qanuq iluqata killukuaġuurugut iñugiaktuatigun, aasii kiñaliqaa killukualaitchuaq uqaluŋmigun, ilaa iñulluatapiaguruq, aŋalataġillasiŋavlugu iluqaan timi. 3Kiŋmiġusiġuugivut tuttuqpaich qaniŋisigun kamagitquvluta, aulataġillagivut sumun aullaġukapta. 4Isummatigisigik umiaqpaich. Qanutun kamanaqtigigaluaqtut anuġiqpaum tiŋillavlugich, aulatiqaqtut aquutikułłuuramik sumupayaaq aqutim pisuutaa sivunniġman. 5Tainnatuttauq uqaq mikigaluaqtuq iḷagikkaŋa timim, qanutun uqavigaaġuutigiruq sunik kamanaqtuanik. Ignikułłuuram ikuallaktillagai napaaqtusalaich. 6Tainnatuttauq uqaq igniqtun inmiuq, Uqqam salapqiġuugai iñuum isumagiirrutiŋi salapqiqł̣ugu iluqaan pigiitchuapayaaq iḷisimakkaŋat iñupayaurat. Uqqam salapqiġuugaa iñuum siḷivinŋatilaaŋa piḷuunmik suraġaġnipayaakun. Tavraasii uqaq igniqtun iłłuni ikuallaktitaŋatun nagliksaaġvium, iłuiḷḷiuġutiqaqtitkaa iñuuniqput iluqaan sivisutilaaŋatun. 7Qanusipayaat niġrutit, tiŋmiallu, paamġuqtuallu, taġiuvlu niġrutiŋi, iñuum pamiqsaaġillagai. 8Aglaan kialiqaa iñugruiññaum aŋalallasiyumiñaitkaa pamiqsaatun uqaq pigiitchuaq, siḷivinŋaruaq tuqunamik. 9#Gn 1.26.Uqqaptiŋnik nanġaġuugikput Ataniq, Aapalu, suli uqqaptiŋnik uqamaqłuutivlugich iñuich savaaguruat arriŋatun God-im. 10Qanuq atautchimiñ qaniġmiñ qairuk quviasaaġullu uqamaqłuullu. Aniqatiimaaŋ, taamna tainnaittuksrauŋitkaluaqtuq. 11Imiġiksuaġlu taġiuġnitchuaġlu maqiyumiñaitchuk atautchimiñ maqsraluktuamiñ imiġmiñ. 12Aniqatiimaaŋ, fig napaaqtua nauriyumiñaitchuq olive-nik, naaggaunnii grape napaaqtuayaaŋa fig-nik. Tainnaptauq taġiuġnitchuaq imiq maqiyumiñaitchuq taġiuġniitchuamik.
Isumattun Paŋmaŋŋaqtauruaq
13Kiña akunnavsiññi isumaturuaguva kaŋiqsisiqaqpalu? Isumattutiqaqtilaani kaŋiqsisiqaqtilaaniḷu iḷisimanaqtilliuŋ iñuulluataunmigun savaalluatamigullu kamasaaŋaiġḷuni isumattutiqaġluniḷu. 14Aglaan uumisuutiqaqtuiññaġuvsi killuqsraunmiglu siŋñanmiglu isumatuniḷusi kamasaaġnasi, saglutigilugu God-im iḷumun ittuaŋa. 15Qanuq tainnasiq isumattun qairuaguŋitchuq God-miñ, aglaan iñugruiññaġniñ, piḷuksisuguuruaniñ iñuutchivsiññiñ Tuunġaġmiḷḷu. 16Qanuq iñuich killuqqutimmata siŋñarrautimmatalu atiŋirrutinikkayuktut, qanusipayaaġlu pigiitchualiqiniq iḷivḷuni. 17Aglaan isumattutim paŋmaŋŋaqtauruam iñuk piḷuutaisitkaa aŋuyautairrutiqaqtitkaalu pikałaktautairrutiqaqtitkaalu uqayunaqtitkaalu, suli nagliktuiḷḷatuqpaktuq anniqsuiḷḷaturuġlu, atunim aŋalatkai iñuich, naagga piŋŋuaġutaitchuq. 18Aasii iñuich atisipkaiñiaqtuaguruat nalaunŋaruakun iñuich iñuuniaqatigiiksillagaich piisinniaqługu atiŋirrun.
Currently Selected:
James 3: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
