James 2
2
Allakaaġiigñasi Iñuŋnun
1Aniqatiimaaŋ, ukpiqtuagukavsi Ataniptiŋnun Jesus Christ-mun kamanaqtuaguruamun, suuramikunnii aŋalannagich iñuich allagiiksitaġlugich. 2Qanuq suġalliruaq iñuk kaviqsuamik qitiqłiaġutilik annuġaaġipiaġataġmiḷuni isiqpan aŋaiyyuvivsiññun, suli iḷiappauruaq isiġmiḷuni annuġaaluktuġluni, 3aasii ilivsi qaunagiłhaagaqsiguvsiuŋ annuġaaġipiaġataqtuaq aasii uqallautilugu, Aquvittin uvuŋa inilluatamun, aasiiḷi uqallautilugu iḷiappauruaq, Makitaiñ takanani, naagga, Aquvittin natiġmun saniġaannun aquppiutama, 4allakaaġiiksitaġisi iñuich akunnavsiññi, isivġiqł̣ugich pigiitchuanik isumaqaqłusi. 5Piviuttaġikkavsii aniqatiit, naalaġnisitchi, God-im piksraqtaaġiŋagai piiḷḷiuqtuat mattumani nunami piiḷḷiuquŋił̣ł̣ugich ukpiġunmi, kiŋuvaannaquvlugiḷḷu atanniqsimaviŋmiñi unniqsuqłiisauŋaruamik ilaan piviuttaġirimiñun. 6Tavra suksraġiŋiñŋagiksi iḷiappauruaq. Nalliŋisa nagriaġisuuvasi isivġiqsiñuutivlusiḷu? Suġalliruat. 7Iliŋisa uqamaqłuutigisuugaat taamna atilluataq God-im aitchuutaa ilivsiññun.
8 #
Lv 19.18. Nalaunŋarualiqiniaqtusi kamagiguvsiuŋ God-im pitquraŋa, Bible uqalugikkaŋat inna, “Piviuttaġisaġiñ siḷalliñ iliktun iḷiḷugu.” 9Aglaan allakaaġiiksitaġuvsigik iñuich qiññaŋatigun, piḷuusiqirusi. Aasii pitqurat pasiñiaġaasi kipuqłaiñiḷusi. 10Qanuq kiñapayaaq kamaksriŋitchuaq iḷaŋannik pitqurat pasirauruq kamaksriŋitchualivḷugu iluqaiññik pitquranik. 11#Ex 20.14; Dt 5.18; Ex 20.13; Dt 5.17.Qanuq God uqaqtuq, Allatuġnak, aasiisuli uqallakłuni, Iñuaġnak. Tavra allatuŋitkaluaġuvich aglaan iñuaġlutin, kamaksriŋitchutin pitquranik. 12Tavra uqaġitchi iñuulusiḷu tamatkunatun iñuktun isivġiqsauyumaaqtuatun pitquratigun atanġiqsitchiḷḷaruatigun iñuŋnik. 13Qanuq iñuk nagliksralaitchuaq God-im nagliginiaŋiñmigaa isivġiġumiuŋ, aglaan nagliktuun akimaniaqtuq nagliktauruaq isivġiqsaukpan.
Ukpiġullu Savaallu
14Aniqatiimaaŋ, iñuk uqaqtuaq ukpiġutiqaġnivḷuni aasii anniqsuiñiaŋiḷḷuni allanik, ukpiġutaata anniqsuġumiñaqpauŋ? Ukpiġutaan tainnaittuam annautiyumiñaitkaa. 15Aniqan annuġaagiḷḷiuqpan niqiksraiḷḷiuġluniḷu, 16qanuġlugu anniqsuġumiñaitkaa uqallautigiññaġlugu inna, God-im quviasuusiġḷisin, uunnaagiñ niġiḷḷuataġlutillu, aitchuġaluaġnagu pigiraksraġiraŋiñik iñuuniaġniġmi. Tainnasiq ukpiġutaupiaqpa? 17Ukpiġutiqaġniq ikayuġniasuŋaġnagich allat iñuich iḷumutun ukpiġutauŋitchuq, tuquŋaruatun ittuq.
18Aglaan iñuk iḷaanni uqallagniaġmiuq iñuŋmun, Ukpiġutiqaqsiññaqtutin aasiiḷi uvaŋa ukpiġutiqaqtuŋa anniqsuiñiaqłuŋa allanik. Tautuktinŋa ukpiġutiŋnik anniqsuiñiaġaluaġnak, uvaŋali anniqsuiñiaġnipkuŋ tautuktinniaġikpiñ ukpiġutimnik. 19Tavra uqaqtutin ukpiġnivḷutin atausiunivḷugu God, taamna nakuuruq. Ilitqusiqł̣uitchauq ukpiġigaat taamna, aasii iliŋich uuliksisuurut sivuuġavlutiŋ. 20Isumalaaŋitchuatiin iñuuk, iḷisautitquyumavich ukpiġun anniqsuiñialaitchuaq suuŋisilaaŋanik? 21#Gn 22.1-14.Isumalaaġutigisiuŋ maŋŋuqput Abraham. Qanuqłuni nalaunŋasirauŋava God-im sivuġaani? God-im iḷisimaŋagaa nalaunŋaruagutilaaŋanik ukpiġunmiñi pisigivlugu aitchuutigiyumiñaġmagu iġñini Isaac niġrutitun iḷivḷugu ikipkaiviŋmun. 22Iḷitchuġisitchi ilaan ukpiġivaił̣ł̣ugu God piyummatiqaŋaruq supayauramik God-im piraksriqpani. Taavruma piraŋata nalupqinaiŋagaa ukpiġutiqapiaqtilaaŋanik, 23#Gn 15.6; 2 Ch 20.7; Is 41.8.aasii Bible uqaluŋich taŋŋiqsauŋarut uqaluqaqtuat inna, “Abraham ukpiġiŋagaa God, aasii taavruma nalaunŋasiŋagaa sivuġaani God-im.” Aasii ilaa tairauŋaruq avilaitqataanik God-im. 24Iḷitchuġirusi tasamma iñuum nalaunŋasipkaqtautilaaŋanik savaalluatatigun ukpiġutiłhiñaŋiḷaakun.
25 #
Js 2.1-21. Aasiivsauq Rahab, sivuani allatuqtauŋagaluaqtuaq, uuktuutauyumiñaġmiuq ukpiġutim anniqsuiḷḷatilaaŋanik. Ilaa nalaunŋarualirauŋaruq anniqsuiñiġmigun tukkuliikami kivgauruanik suli aullaqtiłługich allakun apqutikun. 26Tavra timitun tuquŋaruatun ilitqusiq piiġman timimiñ, tainnatun ukpiġun tuquŋammiuq anniqsuiñiaŋiññami.
Currently Selected:
James 2: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
