James 1
1
1 #
Mt 13.55; Mk 6.3; Ac 15.13; Ga 1.19. James, kivgaŋa God-im Atanġuvlu Jesus Christ, tuyuqtuq paġlatinik iluqaiññun God-im iñuŋiñun siaminŋaruanun iluqaani nunami.
Ukpiġun Isumattullu
2Aniqatiimaaŋ, quviasupiaġitchi uuktuaqtaukavsi allakaaġiiñik uuktuaġutinik, 3qanuq iḷisimarusi uuktuaġusiaŋa ukpiġutivsi tuniqsiḷiġutigigiksi. 4Aasii tuniqsimatuiññaġitchi supayaami, ataramik piḷusi God-im piḷġusiġitqukkaŋiñik iluqaiññik, ataramik iñuusiqaġumausi iviġaumasuglugu God, sunik piŋaiġḷusi iviġaumanaitchuanik ilaanun. 5Kiñapayaaq isumattutaiḷḷiuġumi, qiññuaġli God-miñ aasii isumattutiksriññiaġaa. Qanuq God aitchuiḷḷaruq iñupayaanun nauttaasuŋaġnani, qiññuaġniġaqłilaitchuġlu. 6Aglaan apiqsriḷi ukpiġutiqaġluni, nalupqisuutaiḷḷuni suuramikunnii, qanuq iñuk nalupqisuktuaq ittuq qaiḷḷiŋatun taġium uŋugrugikkaŋatun nalluakkaŋatullu anuġim. 7Iñuk tainnaittuaq isumanani aitchuusiaqaġniaġasugaluni supayaamik Ataniġmiñ. 8Qanuq malġuutchiŋaruamik isumalik tuniqsimaruaguŋitchuq suraġaġnipayaamiñi.
Iḷiappauruallu Suġalliruallu
9Aniqan iḷiappauruaq mattumani nunami quviasuktuksrauruq God-im kamanaqsipkaġmani, 10#Is 40.6, 7.tainnatun suli suġalliruaq aniqan God-im kamanaiqsinmani, qanuq ukpiqtuat atirut God-mun. Suġalliruaq nautchiatun tuquliruatun piñiaqtuq. 11Qanuq siqiñiq nuimman pasiŋñaqtuam uunnaŋata panaqłukkai ivgich nautchiallu, aasii nautchiat katakłutiŋ, qiñiyunaiqł̣utiglu, tainnatun suġalliruaq tuquliñiaqtuq piḷġutchimiñi.
Ikł̣igutchaktinniaqtauniq
12Quviasugli iñuk igḷutuiruaq uuktuaġusiamik, qanuq igḷutuanikkumiuŋ uuktuaġusiaq, aitchuusiaqaġniaqtuq isuitchuamik iñuggunmik, God-im unniqsuqłiisaanik akiḷiutiginiaġnivḷugu tamatkunuŋa piviuttaġirimiñun. 13Kiñapayaaq ikł̣igutchaktinniaqtaukami uqallaŋnani, Ikł̣igutchaktinniaġaaŋa God-im. Qanuq God ikł̣igutchaktitauyumiñaitchuq piḷuktuamun, suli ikł̣igutchaktitchiñialaitchuq kimigliqaa iñuŋmik. 14Aglaan uvva iñullaa ikł̣igutchaktinniaqtauraqtuq kaviuġuksaaqtaukami, inataukamiḷu kipiġniuġunmiñun. 15Aasii ilaan kipiġniuġunmi pigiitchuat payarimmanni piḷuusiqisuuruq, aasii iñuk piḷuutiŋisa suksraunġiqsaupkalġiñaġniaġaat.
16Piviuttaġikkavsi aniqatiit, sagluqipkaġnasi. 17Iluqaġmiŋ aitchuutigiksuat inuaŋaitchuallu aitchuutit paŋmaŋŋaqtaurut, qaisaŋi God-im savaŋaruam qaummatipayauranik. Ilaa allaŋŋulaitchuq inŋitchuġlu taġġaqtun allaŋŋuqtaqtuatun. 18God-im pisuunmigun anitqiksinŋagaatigut uqaluagun iḷumun ittuam, uvagut iniqaqqaaquvluta savaapayauramiñiñ.
Naalaġniruallu Kamaksriruallu
19Piviuttaġikkavsii aniqatiit, iḷisimasiuŋ una. Iñupayaaq ataramik itqanaiḷḷi naalaġniñiġmun aglaan uqallayaiḷḷuni, qinnayaiḷḷuniḷu, 20qanuq iñuk qinnakami taŋŋiiḷaitchuq God-im nalaunŋatqutaanik. 21Taamna pisigilugu iñuusiqaŋaiġitchi pigiitchuamik, piugaŋaiġḷugich God-im pigiiññiraŋi. Aglaan kamasaaŋaiġḷusi kamagisigik God-im uqaluŋi, ilaan iḷitchuġipkaŋakkaŋi ilivsiññun annaurrautquvlusi.
22Uqalua God-im kamagisiuŋ. Naalaġnigiññaġuvsiuŋ uqaluk, sagluqirusi ilivsiññik. 23Qanuq kiñapayaaq naalaġniraugiññaqtuaq uqaluŋmun kamagigaluaġnagu, iñuktun ittuq taġġaqtuqtuatun kiiññamiñik. 24Qanuq tautuktuq inmiñik aasii aullaqami piiguaniktiġaa qanuq qiññaqaqtilaani. 25Aglaan iñuk tainnainŋitchuq qiñiqtuiññaqtuaq God-im pitquraŋiñun nalaunŋaruanun atanġiqsitchiḷḷaruanun iñuŋnik. Naalaġnisuŋaiññaqamigich God-im uqaluŋi kamagituiññaqługiḷḷu piiguqtilaitkai tavrauvvaa, aasii quviasuusiaqaqtitauvluni pisigivlugu taŋŋiiñini uqaluŋmik.
26Kiñaliqaa isummatigigumi iḷumun ukpiqtuaguniḷuni aŋalatchuiḷḷaan uqaluni, sagluqiruq inmiñik. Taavruma iñuum ukpiqtuaguniŋa taŋiġitchuq. 27Uvva innaittuq God-im nalaunŋarualikkaŋa iḷumutullu ittualivḷugu ukpiqtuaguniq, takulugich aŋayuqaagiŋaruat, uiḷgaŋaruallu piiḷḷiuqpata, suli qaunagiluni inmiñik piḷuksisuŋiḷḷuni nunam iñuŋisun.
Currently Selected:
James 1: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
