Popular Bible Verses from James 1

Share

Aniqatiimaaŋ, quviasupiaġitchi uuktuaqtaukavsi allakaaġiiñik uuktuaġutinik, qanuq iḷisimarusi uuktuaġusiaŋa ukpiġutivsi tuniqsiḷiġutigigiksi.

Kiñapayaaq isumattutaiḷḷiuġumi, qiññuaġli God-miñ aasii isumattutiksriññiaġaa. Qanuq God aitchuiḷḷaruq iñupayaanun nauttaasuŋaġnani, qiññuaġniġaqłilaitchuġlu.

Piviuttaġikkavsii aniqatiit, iḷisimasiuŋ una. Iñupayaaq ataramik itqanaiḷḷi naalaġniñiġmun aglaan uqallayaiḷḷuni, qinnayaiḷḷuniḷu

Aasii tuniqsimatuiññaġitchi supayaami, ataramik piḷusi God-im piḷġusiġitqukkaŋiñik iluqaiññik, ataramik iñuusiqaġumausi iviġaumasuglugu God, sunik piŋaiġḷusi iviġaumanaitchuanik ilaanun.

Uqalua God-im kamagisiuŋ. Naalaġnigiññaġuvsiuŋ uqaluk, sagluqirusi ilivsiññik.

Quviasugli iñuk igḷutuiruaq uuktuaġusiamik, qanuq igḷutuanikkumiuŋ uuktuaġusiaq, aitchuusiaqaġniaqtuq isuitchuamik iñuggunmik, God-im unniqsuqłiisaanik akiḷiutiginiaġnivḷugu tamatkunuŋa piviuttaġirimiñun.

Iluqaġmiŋ aitchuutigiksuat inuaŋaitchuallu aitchuutit paŋmaŋŋaqtaurut, qaisaŋi God-im savaŋaruam qaummatipayauranik. Ilaa allaŋŋulaitchuq inŋitchuġlu taġġaqtun allaŋŋuqtaqtuatun.

Qanuq kiñapayaaq naalaġniraugiññaqtuaq uqaluŋmun kamagigaluaġnagu, iñuktun ittuq taġġaqtuqtuatun kiiññamiñik. Qanuq tautuktuq inmiñik aasii aullaqami piiguaniktiġaa qanuq qiññaqaqtilaani.

Uvva innaittuq God-im nalaunŋarualikkaŋa iḷumutullu ittualivḷugu ukpiqtuaguniq, takulugich aŋayuqaagiŋaruat, uiḷgaŋaruallu piiḷḷiuqpata, suli qaunagiluni inmiñik piḷuksisuŋiḷḷuni nunam iñuŋisun.

Kiñapayaaq ikł̣igutchaktinniaqtaukami uqallaŋnani, Ikł̣igutchaktinniaġaaŋa God-im. Qanuq God ikł̣igutchaktitauyumiñaitchuq piḷuktuamun, suli ikł̣igutchaktitchiñialaitchuq kimigliqaa iñuŋmik. Aglaan uvva iñullaa ikł̣igutchaktinniaqtauraqtuq kaviuġuksaaqtaukami, inataukamiḷu kipiġniuġunmiñun.

Aniqan iḷiappauruaq mattumani nunami quviasuktuksrauruq God-im kamanaqsipkaġmani