Ephesians 3
3
Paul Savautigai Jew-guŋitchuat
1Uvaŋa Paul tigutaaqtauruŋa pisigivlugu alġaqsruiñiġa tusaayugaaġiksuamik Christ-kun ilivsiññun Jew-guŋitchuanun. 2Iḷisimarusi God-mun aitchuŋatilaamnik taavrumiŋa savaaksrapiaġatamik, alġaqsruiñiġmik ilivsiññun Jew-guŋitchuanun God-im nagliktuutiqpaŋanik. 3Taamna sivunniuġutaa God-im Jew-guŋitchuanun iḷisimanaiñŋaruaq sivuani, God-im salapqiŋagaa uvamnun. Taamna uqautigillaŋagiga uqautigipiasuŋaġnagu tuyuutimni. 4#Col 1.26, 27.Aasii taiguallaisa tuyuutitka, puttuqsriñiaġiksi kaŋiqsisiqaqtilaaġa alġaqsruutiqaġniġmik Christ-mik. 5God-im kaŋiqsipkaŋaitkaa taimani iñuuruanun iñuŋnun paŋmapak kaŋiqsipkaisiġmisun ilaaguaqtamiñun uqaqtimiñullu Ilitqusiġiksuakun. 6Aasiuvva God-im salapqiŋakkaŋa. Jew-guŋitchuat kiŋuvaannaqataullasivḷugich Jew-guruanun. Iliŋich Jew-guruatuttauq pigillavlugich Christ-gum, aasii piqataullasivḷutiŋ annaunmun unniqsuqłiisauŋaruamun Christ-kun, ukpiġiliqamisigik tusaayugaaġiksuat.
7God-im piksraqtaaġiŋagaaŋa alġaqsruirautquvluŋa tamattumiŋa tusaayugaaġiksuamik, nagliktuutiqpaqaqłuni uvamnun annautivluŋa suaŋŋanmigun. 8Kamanaiññiqsraugaluaqtilluŋa iluqaiññiñ ilaaguaqtauruaniñ God-mun, ilaa naglikkutiqaŋaruq uvamnun, aasii uvamnun alġaqsruutigitquŋagai Jew-guŋitchuanun inuaŋaitchuat anniqsuusiaksraŋich iluqaġmiŋ, atausiŋŋuqatauŋaruat Christ-mun. 9Suli God-im piraksriŋagaaŋa kaŋiqsiñaqsitquvlugu ilaan sivunniuġutigiŋarani iñupayaanun, annaurrauniksraŋat iñupayaurat Jew-guŋitkaluaqtuat Jew-guruallu. God-im savaŋaruam supayaanik, nalunaqtinŋagaa aippaapak taamna sivunniuġutini. 10Paŋmapak God-im iḷitchuġipkaŋagaa sivunniuġutini aŋaiyyuliqiruatigun, tamatkua iluqaisa isaġulgiḷḷu ilitqusiqł̣uiḷḷu tautuquvlugich taŋŋiutaanik kamanaqtuam isumattutaata God-im. 11God-im sivunniuġutigiŋagaa taimaŋŋaqaŋa isuaniñ taamna sivunniuġutini taŋŋiqsauniaġnivḷugu Jesus Christ-kun Ataniptigun. 12Aasii pisigivlugu ukpiġniqput ilaanun, qikkisaiġḷuta attaqsruutaiġḷutalu ullautiyumiñaqtugut God-mun. 13Nagliksaaqtuŋa pisigivlugu quliaqtuaqaġniġa tusaayugaaġiksuanik ilivsiññun, aasii apiġigivsi ipiqtusuutigitquŋił̣ł̣ugu taamna, aglaan qapiŋaisaaġusiaġitquvlugu pisigilugu anniqsuusiaqaŋaniqsi alġaqsruutipkun ilivsiññun.
Piviuttaqqutaa Christ
14Isummatigikapkich tamatkua iluqaisa God-im sivunniuġutigiŋaraŋi, pułłuŋa aŋaiyyuruŋa Aapamun, 15Aapauruamun iluqaiññun ukpiqtuanun, qiḷaŋmiitkaluaqpata naagga nunamiitpata, 16aŋaiyyuvluŋa God-mun inuaŋaitchuamik nagliktuutiqpaqaqtuamun, suaŋŋasipiaġataquvlusi Ilitqusiġiksuaŋanun iḷuvsiññiittuamun iñuuyumiñaqsiḷusi nalaunŋaruakun, 17iḷisimanaġumauq Christ iñuutilaaŋa uummativsiññi sivisutilaaŋatun ukpiqsimaaġnivsi. Aŋaiyyummiuŋasuli piviuttaqsriqpaktuagukavsi, kaŋiqsiyumiñaquvlugu piqatigilugich iluqaisa ukpiqtuat iḷitchuġilugu uummativsiññiñ, 18,19qanutun kamanaqtilaaŋa piviuttaqqutaata Christ-gum uvaptiŋnun. Piviuttaqqutaa kamanaqpaił̣ł̣uni iḷitchuġimmaġiksiyumiñaitkikput iluqaan. Sutun ittuq aktilaaġnaġumiñaipiaqtuatun, ikiqtułhaaqłuni, takiłhaaqłuniḷu qutchił̣haaqłuniḷu itiłhaaqłuniḷu supayaamiñ qiñiqtuuraaġumiñakkaptiŋniñ. Tainnainniġman aŋaiyyutigivsi ataramik iñuutquvlusi nalaupiaġataġlugu God-im iñuutqutaa ilivsiññun.
20Qanutułhaaq God-im pisiyumiñaġaatigut qaaŋiġḷuguunnii apiqsriaġiyumiñakkaqput naagga qiñiqtuuraaġumiñakkaqput. Taamna ilaan piḷḷagaa Ilitqusiġiksuakun ikayuqtigianikkaptigun ilaan iñuutqutaagun uvaptiŋnun. 21Iñupayaat isuiḷaamik nanġaġlirruŋ God paŋmapaŋmiñ isagutilugu isuitchuamullu, pisigilugu ilaan aktilaaganignaġumiñaitchuaq kamanautaa iḷisimanaqsiŋaruaq aŋaiyyuliqiruatigullu Christ-kullu.
Currently Selected:
Ephesians 3: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
