Ephesians 2
2
Tuqqunmiñ Iñuggunmun
1 #
Col 2.13. Tavra ilivsi qaŋapak tuquŋaruatun iñuktun inŋagaluaqtuasii qanuq piḷuksiŋavlusi kamagiŋił̣ł̣ugiḷḷu God-im pitquraŋi, God-im aitchuŋagaasi iñuggunmik isuitchuamik. 2Taimani iñuuŋagaluaqtuasii piḷuusiqutini, nunam iñuŋisa iñuusiatitun. Taimani qaukłiata ilitqusiqł̣uich piḷuusiqipkaŋavlusi, paŋmapaksuli iñuŋnik kamaksripkaiŋiñmatun God-im pitquraŋiñik. 3Tainnauvva iluqata qaŋauvlugu iñuusuuŋagaluaqtuaguut. Pisuuŋaruaguut qanuq piḷuksisuguuruat iñuutchivsa pisukkaŋiññik, iñuuvluta iviġagniugaqsiññaqługich timiptalu isumaptalu pisukkaŋich. Tavra ukpiqtuaguŋiññapta taimani, tatavsaqtauyumiñaŋagaluaġmiugut allatuttauq iluqaisitun ukpiŋaitchuatitun iñuktitun.
4Aglaan God naglikkutiqpaqaŋaruq uvaptiŋnun suli piviuttaġiqpaŋagaatigut. 5Irrusiqaŋagaluaqtilluta tuquŋaruatun iñuktun pisigivlugich piḷuutivut, God-im aitchuŋagaatigut iñuggunmik isuitchuamik aŋipkaqamiuŋ Christ tuqqunmiñ, qanuq atausiŋŋuqatigiŋagikput Christ. God-im nagliktuutiqpaŋagun annaurrauŋarugut. 6Aasiisuli atausiŋŋuqatigiŋavlugu Christ, aŋipkaqtauganiŋammatun ittugut Christ aŋipkaqtaumman. Suli inmiuq uvagut qiḷaŋmiitaniŋmatun aquppivḷuta inaani kamanaqsipkaqtauvium piqatigivlugu Christ Jesus, qanuq ilaa atausiŋŋuqatigiŋagikput. 7Tainna pikami God piaqłuktautaipiaġataŋaruq uvaptiŋnun atausiŋŋuqatigipkaqamisigut Christ-mun, aasii taavruma iḷisimanaqsiñiaġaa isuitchuamun qanutun God naglikkutiqpaqaqtilaaŋa uvaptiŋnun. 8Qanuq God-im nagliktuutiqpaŋagun annaurrauŋarusi ukpiliqavsi. Annautiŋaitchusi ilivsiññik sunik piḷusi. Taamna annaun God-im aitchuutaa ilivsiññun. 9Annaurrauŋaitchusi pisigilugich piḷġusiḷḷuatasi. Annaurraullaniġuvsi piḷġusiḷḷuatasi pisigilugich, iñuk uqavigaaġutiksraqaġniaġaluaqtuq. 10Aglaan God ilaa allaŋŋuqtitchiŋaruq uvaptiŋnik, atausiŋŋuqataullasivḷuta Christ-mun, iñuulluatallasitquvluta. God sivuniqaŋaniqsuq iŋiḷġaan tainna iñuuruksrauvluta.
Atausiŋŋuqatigiigñiq Christ-mi
11Tavra itqaqsiuŋ qaŋauvlugu ilivsi Jew-guŋitchuasii taiguqtauŋagaluaqtilaaqsi nalunaiñŋutaiḷanik Jew-guruanun timimiŋni nalunaiñŋutaqaqtuanun. 12Itqaumasitchi taimani atausiŋŋuqatigiŋaitkiksi Christ, iḷauŋaiñŋarusi God-im iñuksraqtaaŋiñun Israel-guruanun. Piqatauyumiñaiñŋarusi aitchuusiaqaqtuanun unniqsuqłiisinik God-im sivunniuġutigiŋakkaŋiñik iñuksraqtaamiñun, aasii piqaŋił̣ł̣usi annagummanmik, suli naluvlugu God. 13Tavra uŋasiguuŋagaluaqtuasii God-miñ, paŋmapak Christ qaġġisiŋagaasi ilaanun, maqipkaqługu auni tuqqutivlusi. 14Christ aŋuyautaiqsinŋagaatigut God-mun avanmullu. Jew-guruallu Jew-guŋitchuallu atiŋitkaluaqtuat uumikkutivlutiŋ, paŋmapak atisiŋarut aŋuyautiŋaiqł̣utiŋ. 15#Col 2.14.Jew-guruat pigivlugich iluqaisa God-im pitquraŋi, aŋaiyyuvikpaŋmiḷu piraġautchich, isummatigiŋarut inmiŋnik nalaunŋałhaaqłutiŋ Jew-guŋitchuaniñ. Tavra Christ tuqukami, asivaŋagai pitqurapayaurat nalaunŋasiñiaġutauŋaiqł̣ugich iñuŋnun, aglaan iñuich nalaunŋasipkaq tauyumiñaqsivḷugich ukpiġlutiŋ ilaanun. Taamna pisigivlugu Jew-guruallu Jew-guŋitchuallu atausiŋŋuqatigiŋagaat Christ, aasii aŋuyautiŋaiqł̣utiŋ avanmun. 16#Col 1.20.Atunim Jew-guruallu Jew-guŋitchuallu avilaitqatigiiksittut God-mun Christ tuqqutaagun aŋarraurami, aasii paŋmapak suuramik-unnii uumikkutaiqsut avanmun. 17#Is 57.19.Suli Christ tiliŋagai alġaqsruirini quliaqtuaġutitquvlusi aŋuyaŋaiġunmik God-mun, ilivsi Jew-guŋitchuasii uŋasiŋagaluaqtuasii God-miñ Jew-guruallu qanittuat God-mun. 18Tavra atausiŋŋuqatigiŋakaptigu Christ iluqata, Jew-guruallu Jew-guŋitchuallu, ikayuqtiqaqtugut atautchimik Ilitqusiġiksuamik ullautitquvluta Aapamun.
19Tavraasii tavraŋŋaaglaan allayuaguŋaiqsusi iglaaguŋaiqsusiḷu, aglaan atausiŋŋuqataurusi ilaaguaqtauruanun God-mun, iḷaliutivlusiḷu igluqatiŋiñun God-im. 20Ilivsi igluqpaum iḷagimmatun itkaasi nappakkaŋata maŋŋuliġmatun pivḷugu tilirauruaniglu uqaqtiŋiñiglu God-im, Christ Jesus ilaa sivulliqsun maŋŋuksratun uyaġaktun maŋŋuliutiqqaaqługu. 21Qaaŋanun taavruma maŋŋuliutauqqaaqtuam uyaġaum igluqpak iluqani ipiqqiqsauruq aasii nappaqługu aŋaiyyuviguqsaiññaqtuatun ilaaguaqtauvlugu Ataniġmun. 22Tavraptauq tainnatun ilivsi iḷagimmigaasi God-im igluata aasii God iñuuvluni iḷuvsiññi Ilitqusiġiksuamigun.
Currently Selected:
Ephesians 2: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
