Colossians 2
2
1Iḷisimatqugivsi qanutupayauraq piŋigitilaavsiññik, taamapkualu Laodicea-miittuat, suli iluqaisa tautuŋaitchuat uvamnik. 2Qapiŋaisaaqtautqugitka atautchimuktitauŋammata piviuttaqqutikun avanmun. Tavra nalupqigiŋaipiaġniaġaat kaŋiqsiḷḷuataġlugulu suna God-im salapqiŋakkaŋa sivuniġivlugu Christ kaŋiqsiñaiñŋaruaq qaŋapak. 3Iluqani isumattutiksraq iḷitchuqqutiksraġlu ayuġnaipiaqtuk iluqaptiŋnun atausiŋŋuqatigikaptigu Christ, aasii taapkuak piqpagnapiaqtuk uvaptiŋnun. 4Taavrumiŋa uqallautigivsi kimulliqaa asiñuutitquŋił̣ł̣usi saglunik uqautilusi. 5Qanuq nayuŋitkaluaŋŋavsi isumamni itqatigiruatun itkivsi, aasii quviasuktuŋa pisigivlugu iñuuniaqatigiigḷuataġniqsi, suli ukpiġurri Christ-mun suaŋapiaġataġman.
Iñuusipiaġataq Christ-mi
6Tavra Christ Jesus Atanġum ukpiġutivsigun annautiŋammasi, iñuusiqaġitchi ataramik ukpiqsimaaġlusi ilaanun. 7Napaaqtuq pamataummatun maŋŋuġmigun aasii nauvluni qunmun, tainnatullisuq ukpiġurri Christ-mun suaŋasisaiññaġli tuniqsimallasiḷusi, quyagiqpaglugich supayaurat ilaan piŋaraŋi. Tainna iḷisausiaqaŋarusi. 8Qaunagisitchi. Iḷisausiavsiññiñ asiñuutipkaġnasi iñuŋnun iḷisaurriruanun iñugruiññaich isumattutaatigun, anniqsuutauŋitchut sagluuvlutiŋ. Tainnatchit iñuich iḷisaurrutiqaqtut iñuich isumaŋiññik iñuuniaġluataġnikun, iḷisaurrivḷutiglu ilitqutchiñun aŋalannivḷugich sut God-im savaaŋi, iḷisaurriñiaġnatiŋ Christ iḷisaurrutiŋiñik. 9Qanuq Christ-mi, ilaan timaani, iluqaġmi God iñuuruq. 10Aasii ilivsi atausiŋŋuqatigiŋakavsiuŋ Christ, ilivsivsauq piqaġmiusi iluqaanik God-mik iñuuruamik iḷuvsiññi. Christ kamanaġniqsrauruq aŋalatchiruaq iluqaiññiñ suaŋŋatiniñ naagga ilitqutchiñiñ.
11Aasiisuli atausiŋŋuqataukavsi Christ-mun, nalunaiñŋutchiqsauŋarusi God-mun iñuksraqtaaguvlusi. Nalunaiñŋutchiqsauŋaitchusi timisi piḷaktaulugich Jew-guruatun, aglaan iḷisimanaqtinŋagiksi God-mun nalunaiñŋutchiqsauŋatilaaqsi piḷuusiqiugaaŋaiqł̣usi, suli iñuuvlusi iviġagniaqługu Christ. 12#Ro 6.4.Qanuq paptaiqsaukavsi piqasiutimmatun piŋarusi tuqqutaanun Christ, piḷuksisuguuruat iñuutchisi iḷuviqatauŋarut ilaanun. Aasii paptaiġutikun aŋipkaqtauqatigimmatun piŋagiksi Christ, qanuq ukpiġiŋagiksi God-im pikkaŋa, aŋipkaqługu Christ tuqqunmiñ. 13#Eph 2.1-5.Ilivsi-suli iñuich tuquŋaruatun iñuktun God-mun inŋagaluaqtuasii, qanuq kamagilaił̣ł̣ugich ilaan pitquraŋi, nalunaiñŋutchiqsauŋaił̣ł̣usiḷu ilaanun iñuginiḷusi. Aglaan paŋmapak God-im piqataullasigaasi iñuggunmik isuitchuamik Christ-mun, qanuq suliqutigiŋaiŋagai iluqaisa piḷuutisi, itqatqikkumiñaiqł̣ugich. 14#Eph 2.15.Christ tuqukami aŋarraurami piiŋagai tatavsausiaksrautikkaluavut nalliummatiruat uvagut kamaksriŋiññiptiŋnun God-im pitquraŋiñik. God-im tigummatun piŋagai piḷuutivut, aasii kikiaktuutivlugich aŋarrauramun, tainnaqłuni piiŋagai. 15Aasiisuli, Christ tuqukami akimaŋaruq iluqaiññiñ ilitqusiqł̣uŋniñ atanniqsimanniktuaniñ aŋalatchiruaniḷḷu iñuŋnik. Christ iḷisimanaqsiŋagaa suaŋŋatiqałhaaqtilaani iliŋiññiñ akiiḷivḷugich.
16 #
Ro 14.1-6. Tavra tamatkua tainnainniġmata, uŋiarrisiginagich iñuich pisaaŋakpasi sutigun niġikkavsigun, naagga imikkavsigun, niqinaqiyyaġnivsigun, naagga nalunaiqsimarauruatigun niqinaqiviksigun tatqiḷiġaġimman naagga Savaiñmata. 17Tainnatchich pitqurriutit anniqsuutauŋarut iñuŋnun kisianik Christ qaiñiŋanun aglaan. Taġġałhiñauŋarut pipiaguruamun Christ-mun ilaanun. 18Iñuŋmun uqallautipkaġnasi tammaŋaniḷusi qanuq kamanaiyaŋiññavsi ilivsiññik aŋaiyyuvigilugich isaġulgich. Tainnatchich iñuich iḷisimmatinignisuurut qiñiqtuuraatigun, aasii arguaŋasivḷutiŋ, qanuq annaurrauŋaił̣ł̣utiŋ. 19#Eph 4.16.Taapkua iñuich pituummiŋitchut Christ Ataniġmun. Christ niaquuruatun ittuq, aasii aŋaiyyuliqiruaŋi timitun. Iluqaġmiŋ pituummiruat niaqqumun navyaatigun nukiktigullu nauqatigiiguurut, God-im naupkaqługich.
Tuquniq Iñuuniġlu Piqatigivlugu Christ
20Christ tuqumman, tuqummatun piŋarusi ilitqutchiñun iñuiḷḷu isummatiġruiññaŋiññun annaurraunikun. Paŋmapak tamatkua aŋalanŋaiŋagaasi. Taamnaasii tainnainman, iñuuŋaiqsuksraupiaqtusi aŋalataġipkaġlusi tamatkunuŋa. Annagniataktuksrauŋitchusi kamaksriñikun pitquranik 21inna ittuanik uqaluŋnik, Aksiugnagu taamna niqi, Uuksiñak taavrumiŋa niqimik, Aksiuqqayaanagu taamna. 22Tainnatchich pitqurat iñugruiññaich iḷisaurrutigigaich, qanuq piqutiqaqtut nuŋusuuruanik. 23Tamatkua pitqurat qiññaqaġumiñaġaluaqtut nakuuruatun, qanuq aŋaiyyupkallavlugich iñuich, suli kamasaaŋaiḷḷavlugich inmiŋnik pitchaiḷiñiapiallavlugich timitiŋ. Aglaan tainnatchich pitqurat suaŋŋasiġumiñaipiaġaat iñuk akiiḷiyumiñaqsiḷugich pigiitchuakun kipiġniuġutit, savaaġiitchuallu.
Currently Selected:
Colossians 2: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
