Colossians 3
3
1 #
Ps 110.1. Christ aŋipkaqtaumman tuqqunmiñ, aŋipkaqtauŋammatun ittusi piqatigivlugu ilaa. Taamna tainnainman, kipiġniuġutigituiññaqsigik quviasaaġusiat quviasuutillu qiḷaŋmiittuat, Christ irviani, aquvititauvluni taliqpiata tuŋaanun God-im. 2Isumagituiññaqsigik sut tatpaŋmaniittuat. Isumagigiññaŋaiġḷugich sut nunamiittuat. 3Qanuq tuquŋaruatun iñuktun ittusi iluqaiññun pigiitchuanun kipiġniuġutinun, iñuggurri iriqsimavluni piqatigivlugu Christ qiḷaŋmiittuaq, God-lu. 4Christ iñuggutigikkaqput qiñiġnaqsikpan, ilivsivsauq qiñiġnaqsiqatiginiaġiksi, piqataulusi ilaan kamanautaanun.
Utuqqauruaq Iñuusiq Nutauruaġlu
5Tavra tamatkua tainnainmata, iñuusitchi tuqunmatun piḷugich iluqaisa pigiitchuat iḷuvsiññi. Isummatigisitchi ilivsiññik tuquruatun naluksriḷḷugich qanusipayaat allatuutit, salumaitchuat isummatit, qanusipayaat pigiitchuat kipiġniuġutit, kaviuqqutillu. Kaviuqqutiqałhaaġniq sunun iñuŋnullu God-mun piviuttaqqunmiñ iñuuraqpaqaġniġuruq. 6Pisigilugu iñuich tainnatchiñik piḷuusiqiniŋat tatavsaġniaġai God-im. 7Qaŋauvlugu iñuuŋŋavsi tamatkunatun iñuktun, tamatkua pisuuŋagaluaġmigisi. 8Aglaan paŋmapak, aġiusigik tamatkua piḷuutit, sunŋusuutit, qinnautit uqautikłiġñiġich pigiitchuanik, saglutillu iñuktigun, salumaitchuaniglu uqaluqaġniġich. 9#Eph 4.22.Sagluuŋaiġḷusi avanmun, qanuq paŋmapak aŋalataġiŋaiġaasi piḷuktuat isumavsi piḷġusivsiḷu. Tainna iñuusiqaŋaiŋarusi, 10#Eph 4.24; Gn 1.26.aasii iñuusarraqsivḷusi nutauruakun iñuutchimik, iḷitchisaiññaqłusi nalaunŋaruakun iñuutchimik, Christ-tun iḷisaiññaġuktuamik. 11Iñuusiġiliutikaptigu taamna nutauruaq iñuusiq, sumiugitchuq akunġanni iñuich, Greek-gugaluaġmata Jew-gugaluaġmatalu, nalunaiñŋutchiŋavlutiglu timimiŋni God-mun naagga nalunaiñŋutchiŋaitkaluaġmata, aglagnik nalugaluaġmata, naagga aŋuyyiqigaluaġmata Scythians-tun, naagga kivgaugaluaġmata kivgauŋitkaluaġmatalu, qanuq Christ naumałhaaqtuq iluqaiññiñ iñuuvluni iluqaiññi ilaan iñuŋmiñi.
12 #
Eph 4.2. Tavra God-im iñuksraqtaaġiŋammasi, piḷuutaiqł̣usi piviuttaġivlusiḷu, kiikaa iḷunŋusuutiqaġitchi allanun, ikayuiruagulusi, kamasaaŋaiġḷusi, paaqłaktautaiḷḷusi qimmaksaliyaiḷḷusiḷu, 13#Eph 4.32.piaqłuktautiŋaiġḷusi avanmun. Iñuk uqaallatiksraqaġaluaġumi allamun iñuŋmun, suliqutigiŋaiġḷiuŋ itqaumaŋaiġḷugu uqaallatiksraq. Atanġuptauq suliqutigiŋaiŋammagich piḷuutivut itqaumayumiñaiqł̣ugich, tainnatulli uvagut suliqutigiŋaigaksraġigivut allat pimaqłuutiŋich uvaptiŋnun. 14Naumałhaaqtuaq iluqaiññiñ, piviuttaqqutituiññaġitchi avanmun. Piviuttaqqutim atausiŋŋuumapkapiallakkai iñupayaat. 15Aasii aŋuyautairrutim Christ pipkakkaŋata ataramik aŋalallisi, qanuq God-im ququaŋagaasi iḷautquvlusi ativlutiŋ aŋaiyyuliqiruanun, suli iñuuqatigiiquvlusi aŋuyautaiḷḷusi. Suli quyyatiqaġitchi ataramik. 16#Eph 5.19, 20.Ataramik isummatigisigik iluqaisa Christ iḷisaurrutiŋi iñuusiġilugiḷḷu. Tavraasii tainna piguvsi isumattutinigniaqtusi aasii iḷisaurriyumiñaqsiḷusi siḷġiqsuutiyumiñaqsiḷusiḷu avanmun, atuutiqaġumiñaqsiḷusiḷu Psalms-nik nanġautiniglu suli atuutinik qapiŋaisaaġutauruanik ukpiqtuanun, quyyatiqaġlusi uummativsiññiñ God-mun. 17Suli sunapayaaq piguvsiuŋ naagga uqallausiġiguvsiuŋ, pisiuŋ Atanġum Jesus pisiksraŋatun uqallausiksraŋatullu, quyyavigilugu Aapa ilaagun.
Iñuuniaqatigiigñiq Nutauruami Iñuutchimi
18 #
Eph 5.22; 1 P 3.1. Nuliaguruasii, kamakkutiqaġitchi uivsiññun. Taamna nalaunŋaruq ukpiqtuaguruanun Ataniġmun. 19#Eph 5.25; 1 P 3.7.Uiguruasii piviuttaġisigik tuvaaqatisi, suammatisuŋaiññaŋaiġḷugich. 20#Eph 6.1.Miqłiqtuut, kamagisigik aŋayuqaasi ataramik, qanuq kamaksriñivsi Ataniq iviġaksimaaġaa. 21#Eph 6.4.Aapauruasii, suasuŋaiññaġnagich miqłiqtusi, qapiŋasiviaqtut kamaksriñiaġniġmiŋni ilivsiññik.
22 #
Eph 6.5-8. Kivgaat, kamaksrisitchi ataramik tamatkuniŋa ilivsi ataniġikkavsiññik, qiñiqtiqaġuvsi kisianik pisuŋaġnasi, iñuŋnik iviġaiñiaqtitun, aglaan ataramik savaglusi iviġaumasuglugu Ataniq. 23Sunapayaaq savaaġiguvsiuŋ, savagitchi piyummatiqaġlusi, savautimmatun Ataniq iñuŋił̣aat, 24iḷisimaugaġlusi Atanġum akiḷiġñiaġaasi kiŋuvaannaktaamik, qanuq savautigiksi Ataniq Christ. 25#Dt 10.17; Eph 6.9.Iñuk killuliqirauruaq akiḷiqsauniaqtuq killuliqiamigun. Iñupayaat atilugich piñiaġaich.
Currently Selected:
Colossians 3: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
