Colossians 1
1
1Ukua tuyuutit qairut ilivsiññun Paul-miñ tilirauruamiñ alġaqsruitquvlugu tusaayugaaġiksuanik God-im pitqummani, Timothy-miḷḷu aniqatiptiŋniñ. 2Tuyuutaurut ilivsiññun ilaaguaqtauruanun God-mun, atausiŋŋuqatauŋaruanun Christ-mun, aniqatinun ukpiġnaqsiŋaruanun ilaanun Colossae-miittuanun, God Aapavut nagliktuutiqpaqaġlisuq tutqiutiqaqtillusiḷu.
Aŋaiyyunmi Quyanaaġutit
3Aŋaiyyutikavsi quyyavigisuugikput God ataramik, Aapaŋa Atanipta Jesus Christ. 4Qanuq tusaaŋagikput ukpiġnaqsiŋaniqsi Christ Jesus-mun piviuttaqsriñiqsiḷu iluqaiññik ilaaguaqtauruanik God-mun. 5Aasii tainna iñuusiqaqtusi, iñuuqatigiyumavlugu God qiḷaŋmi isuitchuamun. Taamna piyumman pigiliutiqqaaŋagiksi iḷumun ittuaq tusaayugaaġiksuaq alġaqsruutaumman ilivsiññun. 6Taamna tusaayugaaġiksuaq alġaqsruutauŋaruaq ilivsiññun alġaqsruutaummiuq iñuŋnun nunami iluqaani, aasii iñuvsaat ukpiliqł̣utiŋ Christ-mun, iñuugaqsivḷutiŋaasii Christ iñuutqutaagun, ilivsivsauq iñuusivsisun taimaŋŋaqaŋa tusaakavsiuŋ nagliktuutiqpaŋa God-im, kaŋiqsivḷugu iḷumun ittuaŋa. 7#Col 4.12; Phm 1.23.Iḷisaaġiŋagiksi taamna tusaayugaaġiksuaq Epaphras-miñ piviuttaġikkaptiŋniñ kivgauqatiptiŋniñ Christ-mun. Ilaa ukpiġnaqtuq savakti Christ-mun alġaqsruiruaq ilivsiññun pisivluŋa. 8Ilaan quliaqtuaġutiŋagaatigut Ilitqusiġiksuamun piviuttaqsripkaġnivḷusi allanik iñuŋnik.
9Taimaŋŋaqaŋa uvlumiñ tusaaviptiŋniñ taavrumiŋa, aŋaiyyutigivsi-suli, apiġivlugu God ataramik ikayuquvlusi iḷitchuġipiaquvlugu qanuq God-mun pitqutilaaqsi, Ilitqusiġiksuamun isumatusipkaquvlusi kaŋiqsipkaquvlusiḷu sumik God-im pitquyumakkaŋanik ilivsiññun. 10Suli aŋaiyyutivlusi iñuusiqaquyumavlusi nalliummatiruamik Ataniġmun, iviġaumalugu Ataniq supayaanik piguvsi, ataramik nakuurualiqilusi suli iḷitchuġisaiññaġlugu God. 11Aŋaiyyutivlusiḷu God-mun suaŋŋatiqapiaġataqtuamun, suaŋŋasiquvlusi naamaruamik, igḷutuġumiñaqsiḷugich uuktuaġusiapayaat qiñuirrutiqaġlusi, quviasuunmiglu. 12Suli aŋaiyyutivlusi quyyatiqaquvlusi ataramik Aapamun nallium matipkaliġmatigut piqataullasivḷuta allanun ukpiqtuanun iñuggunmi isuitchuami, iñuummatun qaummaġmi. 13God-im annautiŋagaatigut atanniqsimmataaniñ Tuunġaum, iñuummatun ittuamiñ taaqtuami, nuurrutivluta atanniqsimmataanun Iġñiġmi piviuttaġirami. 14#Eph 1.7.God-im Iġñiŋata tasuŋagaatigut God-mun suliqutigiŋaiquvlugich itqaumayumiñaiġḷugich piḷuutivut.
Christ Kamanaġniqsrauruq
15Christ God-itun ittuq tautugnaitchuatun. Ilaa inŋaruq sivuanni supayaat savaaguŋaiñŋaisa. 16Ilaa God-itun ittuq qanuq ilaagun supayaat savaaguŋarut, sut qiḷaŋmiittuat sullu nunamiittuat, sut tautugnaqtuat sullu tautugnaitchuat, tamatkua ilitqutchich atanniqsimanniktuat, ilitqusiḷḷu suaŋŋatiqaqtuat sapiġñaqtuallu. Tamatkua iluqaisa Christ savaŋagai inmiñuksrivḷugich. 17Christ inŋaruq sivuanni supayaat, aasii ilaan suaŋŋataata igliqtitkai atautchikun piqatigiikł̣ugich supayaat savaani. 18#Eph 1.22, 23.Suli iñuk niaquata aŋalanmatun timaa, tainnatun Christ aŋalatkai ilaan iñuŋni aŋaiyyuliqiruat. Aŋaiyyuliqiruat ilaan iñuggutiqaqtitkai isuitchuamik, aŋiqqaaŋavluni tuqqunmiñ aasii iñuuvluni isuitchuamun. Tavraasii ilaa Atanġuruq supayaanun, 19qanuq God sivunniŋaruq tamatkiġḷuni ilaa iñuusukłuni ataramik Iġñiġmiñi. 20#Eph 2.16.Suli Christ maqipkaġmagu auni, tuquvluni aŋarraurami, God-im iḷauraaliuŋagai aŋuyautaiqł̣ugich supayaat savaani, nunamiittuat qiḷaŋmiittuallu.
21Suli qaŋauvlugu ilivsi uŋasiŋarusi God-miñ. Uumigiŋagiksi, iñuuvlusi piḷuutini. 22Paŋmapak-aasii Christ iḷauraaliuŋagaasi God-lu, aitchuutigivlugu timini tuqutautquvlugu aŋarraurami, ilivsi akuqtuġnaqsitquvlusi God-mun, piḷuutaiqsauŋalusi, pasiñaġumiñaiŋalusiḷu ilaan sivuġaani. 23Aglaan ukpiŋaiqsuksrauŋitchusi, ukpiġutiqaġitchi suaŋapiaqtuamik, tuniqsimaruamik, suli niġiugiŋaiġñagu annaurrauniksraqsi taŋŋiqsauniaqtilaaŋanik tusaaŋakkavsisun tusaayugaaġiksuakun. Taamna tusaayugaaġiksuaq alġaqsruutauŋaruq iñupayaamun nunamiittuamun, aasii uvaŋa Paul alġaqsruutigigiga.
Paul Savaurriruq Aŋaiyyuliqiruanik
24Paŋmapak quviasuktuŋa pisigivlugu nagliksaaqtitauniġa ilivsi pisigivlusi. Nagliksaaqtitaukama Christ nagliksaaġmatun piuq. Taamna pisigivlugu quviasuktuŋa naarrusiqapkich ilaan nagliksaaġniŋi, pisigivlugich aŋaiyyuliqiruat timigikkani. 25God-im kivgaksraqtaaġiŋagaaŋa aŋaiyyuliqiruanun ilivsi iḷagivlusi, piraksriqł̣uŋa uqautigimmaġiksaaquvlugu ilaan uqaluksrirrutini, 26kaŋiqsiñaiñŋaruaq qaŋapak kiŋuniġiiñi, aglaan paŋmapak kaŋiqsiñaqsiŋagaa ilaan pimiñun, tamatkunuŋa ilaaguaqtauruanun God-mun. 27Iliŋiññun, iḷagivlugich Jew-guŋitchuat, God-im satqummiġuliŋagaa qanutun kamanaqtigivluni kaŋiqsiñaiñŋaruaq. Taamna kaŋiqsiñaiñŋaruaq Christ iñuullaniŋa iḷuvsiññi, aasii niġiullasivḷusi iḷauniksravsiññun iñuuniġmi qiḷaŋmi, ilaa iñuuqatigilugu. 28Christ alġaqsruutigigikput, siḷġiqsuqsimavlugu iñupayauraq iḷisautivlugulu isumatutilaaptiktun iñupayauraq atausiŋŋuqatauŋaruaq Christ-mun, agliraksraiqsuatun ukpiqtuagutquvlugu, iñupayauraq qaġġirraukpan sivuġaanun God-im. 29Tavra taamna siġġaqutigigiga, aasii piyumiñatualukkiga qanuq Christ sapiġñaqtuam suaŋŋataa savakłuni iḷumni.
Currently Selected:
Colossians 1: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
