Acts 7

Stephen Alġaqsruiruq

1Tavra aŋaiyyuliqsiqpaich qaukłiata apiġiŋagaa Stephen uqallakłuni, Taamna pasikkusian iḷumun itpa? 2#Gn 12.1.Tavra Stephen uqallaŋaruq, Aniqatiit umialiŋnallu, naalaġnisiŋa. Kamanaqtuaq God niptaŋaruq maŋŋuptiŋnun Abraham-mun iñuumman Mesopotamia-mi, nuunŋaiñŋaan Haran-mun. 3Aasii uqallautiŋagaa Abraham, Aullaġiñ nunaŋniñ iḷaŋniḷḷu, aasii aullaġlutin nunamun iḷitchuġipkaġniakkamnun iliŋnun. 4#Gn 11.31; Gn 12.4.Tavra Abraham aullaŋaruq nunaŋanniñ Chaldea-ġmiut, aasii iñuuniarraqsivḷuni Haran-mi. Aasii Abraham aapaŋa tuquaniŋman, God-im nuutinŋagaa tavraŋŋa mattumuŋa nunamun paŋmapak iñuuvigikkavsiññun. 5#Gn 12.7; 13.15; 15.18; 17.8.Naaggauvva ilaan aitchuŋaitkaa kiŋuvaannaktaksramik tavrani, isigagniqtutilaatun-unnii taktilaaqaqtuamik nunamik, aglaan unniqsuqłiivḷugu aitchuutiginiaġnivḷugu ilaanun piġġaktaaġipkaġlugu kiŋuniiŋiñullu aquagun. Tavrani God-im unniqsuqłiimmagu Abraham miqłiqtuiñŋaruq. 6#Gn 15.13, 14.Innauvva God-im uqallautiŋagaa, Kiŋuniitin tuyuġmiaguniaqtut allami nunami. Tavrani savaktauniaqtut nagliksaaqtitauqpaglutiglu 400 ukiuni. 7#Ex 3.12.Aglaan tatavsaġniaġitka iñuich savautikkaŋich. Suli taavruma aquagun aullaġniaqtut taavrumaŋŋa nunamiñ, aasii aŋaiyyuvigiluŋa uumani inimi. God tainna uqaŋaruq. 8#Gn 17.10-14; Gn 21.2-4; Gn 25.26; Gn 29.31—35.18.Aasii God-im unniqsuqłiikamiuŋ Abraham, piraksriŋagaa nalunaiñŋutchiquvlugich timiŋisigun kiŋuniiŋi iḷisimanaqsisaġlugu iliŋiññun akuqtuqtilaaŋanik taamna unniqsuqłiisaa. Tavraasii Abraham nalunaiñŋutchiŋagaa Isaac animman, tallimat piŋasunik uvlianiŋman. Aasii Isaac-gum nalunaiñŋutchiŋagaa Jacob, aasiiḷi Jacob-gum nalunaiñŋutchiŋagai qulit malġuk iġñini maŋŋuuvut.

9 # Gn 37.11; Gn 37.28; Gn 39.2, 21. Tavrali maŋŋuliutiruat killuġivlugu Joseph, tuniŋagaat savaktautquvlugu Egypt-mi, aglaan God-im itqatigiŋagaa. 10#Gn 41.39-41.Suli annautiŋagaa iluqaiññiñ iłuiḷḷiuġutiŋiñiñ. Tavra Joseph Pharaoh-muurraumman umialganun Egypt, God-im iviġaumakkusiamik isumattunmiglu piqaqtinŋagaa. Tavra Pharaoh-m Joseph kavanaliutiŋagaa Egypt-mun, iluqaiññullu igluqatimiñun. 11#Gn 42.1, 2.Tavra niqaiḷḷiurraqsiŋarut nagliksaaġnapiaġataqtuamik iluqaani Egypt-miḷu Canaan-miḷu, aasii maŋŋuuvut paqillaiŋarut niqiksramik. 12Tavra Jacob tusaakami niqiksraqaqtilaamik Egypt-mi, tiliŋagai maŋŋuuvut sivulliġmi tavruŋa. 13#Gn 45.1; Gn 45.16.Aasii ullautitqigmata Joseph iḷitchuġipkaŋaruq inmiñik aŋayuumiñun, suli Pharaoh-m iḷitchuġiŋagai Joseph iḷaŋi. 14#Gn 45.9, 10, 17, 18; Gn 46.27.Tavra Joseph qanniŋagaa aapani Jacob, uqallautivlugu qitunġaniḷu qaitquvlugich Egypt-mun, iñugiaktilaaŋat 75 iñuich. 15#Gn 46.1-7; Gn 49.33.Tavra Jacob qitunġaniḷu Egypt-muŋarut. Tavrani aasii tuquŋaruq, maŋŋuuvullu tuquŋammiut. 16#Gn 23.3-16; 33.19; 50.7-13; Js 24.32.Aasii timiŋich nuunŋagaich Shechem-mun, aasii iḷuviqługich Abraham tauqsiaŋanun maniŋmiaqługu maŋŋuqaqtuaniñ Hamor-mik.

17 # Ex 1.7, 8. Tavra God-im unniqsuqłiisini Abraham-mun taŋŋiyasiaqsimmauŋ, maŋŋuuvut iñugiaksiŋarut Egypt-mi. 18Tavra umiallitqiŋarut Egypt-mi naluruamik Joseph-mik. 19#Ex 1.10, 11; Ex 1.22.Ilaan aŋalataġiŋagai pisaasuġmiaġutikun iñuvut, suli taluqsralliaġivlugich igittaquŋagai miqłiqtuuraŋich aimaaġviŋiññiñ, tuqutquvlugich. 20#Ex 2.2.Tainnaiḷimman Moses aniŋaruq. Iglignaŋaruq miqłiqtuq. Tavra iñukkuksaqtauŋaruq piŋasuni tatqiñi aapami igluani. 21#Ex 2.3-10.Tavra anitaumman aimaaġviŋmiñiñ, paniata Pharaoh-m tiguaŋagaa, aasii iñukkuksaqługu nanmiñiq iġñiġiruatun. 22Suli Moses iḷisaurrusiaqaŋaruq iluqaagun isumattutaatigun Egypt-miut, suli sapiġñaqsiŋaruq uqaluŋmiñi savaamiñiḷu.

23 # Ex 2.11-15. Tavra malġukipiamik ukiunikami sivunniŋaruq takusukługich Israel-guqatini. 24Tavra tautukługu iḷaŋata Egypt-mium pimaqłuktakkaŋa Israel-guruaq, ikayuġiaŋagaa payyaksaqtuaq, aasii akisautikamiuŋ Egypt-miu tuqunŋagaa. 25Ilaan isummatigiŋagai aniqatiini kaŋiqsiñasugalugich God-mun atanġiqsinniaġasugalugich inmigun, aasii kaŋiqsiŋiññiqsut. 26Tavrasuli uvlaakumman Moses tautuŋagik malġuk Israel-guruak piyuutiruak, atisitquyumaŋagik uqaqłuni, Aŋutiik, Aniqatigiiksutik. Summan piyuutivisik avanmun? 27Taavruma pimaqłuktairuam igḷumiñik asivaqtinniaqtuŋagaa Moses uqallautivlugu, Kia atanauraliutivatin isivġiqsiġuqłutillu uvaptiŋnun? 28Tuqutchukpiŋa iñuaġusiqsun Egypt-miumik ikpaksraq? 29#Ex 18.3, 4.Moses tusaakami taavrumiŋa pigruŋaruq Egypt-miñ. Suli iñuuniarraqsivḷuni nunami Midian-mi. Tavrani malġugnik iġñiniŋaruq.

30 # Ex 3.1-10. Tavra malġukipiat ukiut qaaŋiġmata, isaġulik niptaŋaruq Moses-mun igniġmi ikualaruami uqpiŋñi, nunagluktuaŋani Iġġim Sinai-m. 31Moses tautukamiuŋ allayuaġiŋagaa tautuani. Tavra qalliḷaaqsaġataviksillugu uqpiŋñun qiñimmaġiksaaġukługu, tusaaŋagaa Ataniq uqallaktuaq. 32“Uvaŋa God-auruŋa maŋŋuvsiññun, God-iŋa Abraham Isaac-guvlu Jacob-lu.” Tavra Moses uuliksiŋaruq iqsitchakłuni, suli qiñiqsausiiŋagaa. 33Tavra Atanġum uqallautiŋagaa, “Atuqalukkiñ piikkik isigaŋniñ, qanuq ini qikaġviiñ God-im nunagigaa. 34Iḷumutun tautuŋagiga pimaqłuktausiaŋat iñuŋma Egypt-miittuat, suli tusaaŋagiga iiqtuaġutaat, aasii atqaŋaruŋa annautiyaqtuqługich. Aasii paŋmapak qaġġiiñ. Tiliñiaġikpiñ Egypt-mun.”

35 # Ex 2.14. Taamna Moses pigisuŋisaŋat iñuich Israel-guruat uqaqłutiŋ, Kia atanauraġuqpatin isivġiqsiġuqłutillu uvaptiŋnun? God-im tiliŋagaa atanauraġuqługu annaurriruaġuqługulu ikayuqługu isaġulgum tautuŋakkaŋata ikualaruani uqpiŋñi. 36#Ex 7.3; Ex 14.21; Nu 14.33.Ilaan aullatiŋagai iñuich annisivlugich Egypt-miñ, savakłuni aliuġnaqtuanik nalupqinaiyautinik God-mun itqatigitilaamiñik Egypt-miḷu Red Sea-miḷu nunagluktuamiḷu malġukipiani ukiuni. 37#Dt 18.15, 18.Taamnauruq Moses uqaŋaruaq Israel-guruanun, God-im tiliñiaġaa ilivsiññun uqaqtini aniqatiivsiññiñ uvamniktauq tilisimmatun. 38#Ex 19.1—20.17; Dt 5.1-33.Taamna Moses itqatauŋaruq iñuŋnun Israel-guruanun kasimammata nunagluktuami. Ilaa tavraniitqatauŋaruq maŋŋuuptiŋnun isaġuliŋmullu uqaurrimiñun Iġġimi Sinai-mi. Ilaa aitchuusiaqaŋaruq God-miñ qaaŋiqsitaksranik uvaptiŋnun qanuq iñuuruksrautilaaptiŋnik.

39Uvagut maŋŋuupta kamagisuŋiñŋagaat, asivaqsiññaqługu utiġumaliŋarut Egypt-mun. 40#Ex 32.1.Tavra uqallautiŋagaat Aaron, god-iliuqtigut sivulliuqtiksraptiŋnik, taimña Moses aullarriruaq uvaptiŋnik nunaŋaniñ Egypt nalugikput sutilaaŋanik. 41#Ex 32.2-6.Tavra iñuuraqpaliŋarut qiññaqaqługu immulivium nuġġaŋatun, aasii aitchuivḷutiŋ ikipkaunmik taavrumuŋa, suli quviasuuttaġiqpaŋagaat ilimiŋ savaaqtiŋ. 42#Am 5.25-27.Tavrali God-im iḷatchiḷiŋagai, aŋaiyyuyumiñaqsivḷugich uvluġianun qiḷaŋmi. Iñugiaktuat ukiut pianiŋmata uqaqtaa God-im aglaŋaruq uqautigivlugich taapkua iñuich,

“Iñuich Israel-guruasii, uvaŋa pisiluŋa tuqutchiŋaitchusi

ikipkaiḷusiḷu niġrutinik,

nunagluktuami malġukipiani ukiuni.

43Kukiḷuutiŋagisi tupauraqtuummaisa god-iŋŋuat Molech,

tamatkualu iñuuraqpaŋŋuat uvluġianiñ god-igikkavsiññik Rephan-mik.

Tamatkua iñuuraqpauŋarut, ilivsi savaasi aŋaiyyuvigisukługich.

Tavraasii aullautipkaġniaġivsi qaaŋiġḷugu Babylon.”

44 # Ex 25.9, 40. Tavra Stephen uqavsaaŋaruq. Maŋŋuuvut piqaŋarut tupqanik God-im nayuqłiataata nunagluktuami, God-im savaqutaatun Moses-mun savaaguŋaruq tuvraqługu tuvraaksriun iḷisaurrusiani. 45#Js 3.14-17.Aquvatigun maŋŋuuptali kiŋuvaaġiŋagaat taamna tupiq aapamiŋniñ. Aasii ilaisa saagaŋagaat aullaqatigikamirruŋ Joshua piññaktaaġikamirruŋ nuna allaniñ nunauruaniñ God-im uŋutaŋiñiñ sivumiŋni. Aasii taamna tupiq napaŋaruq David-munaglaan. 46#2 S 7.1-16; 1 Ch 17.1-14.David iviġaumagiŋagaa God-iŋata Jacob, aasii ilaan apiġiŋagaa igluqpisukługu. 47#1 K 6.1-38; 2 Ch 3.1-17.Aglaan Solomon-gum igluqpiŋagaa.

48Aglaattauq kamanaġniqsrauruaq God iñuuviqaŋitchuq igluqpaŋnik iñuich savaaŋiññik uqaqtiŋata God-im uqallausiatun,

49 # Is 66.1, 2. “Inna uqaqtuq Ataniq, qiḷak iksivautaġigiga umialgunimni,

suli nuna isigagma tunŋavigivlugu.

Qanutchimik igluqpiñiaqpisiŋa?

Naagga sumi iniqaġniaqpik minġuiqsiġviksramnik?

50Uvaŋa uvamnik savaŋaitpik tamatkua iluqaisa?”

51 # Is 63.10. Ilivsi uqaqtuvlu atiruasii iñuich, qanutun ukpiġutaisigirusi uummanmi. Qanutun tusaalaisigirusi God-im uqaluŋiñik maŋŋuuvsisun inmiusi. Ilivsivsauq ataramik paaqłaktaġiksi Ilitqusiġiksuaq. 52Atausiq unnii uqaqtaa God-im maŋŋuuvsi nagliksaaqtinŋaiñŋitkaat. Suli tuquġaŋagaich God-im kivgaŋi uqaluqaqtuat sivuani qaiñiksraŋanik Nalaunŋaruam Kivgaŋata, ilaa ilivsi paŋmapak aitchuutigianiŋagiksi, suli tuqułługu. 53Ilivsiuvva aitchuusiaqaŋaruasii God-im pitquraŋiñik isaġulgich aitchuutigiŋakkaŋiññik, naaggauvva kamagiŋaitkisi.

Stephen Tuqutkaat Miḷḷuuqługu Uyaġaŋnik

54Tavra iḷauruat uqaqsitaaqtitchiriñun naalaġniruat Stephen-mik, qinnalipiaġataŋarut kigutitiŋ kiggisilaallaisa. 55Tavrali Stephen, aŋalałługu Ilitqusiġiksuam, takunnaŋaruq qiḷaŋmun, aasii tautukługu qaumanġa God-im, suli Jesus makitaruaq taliqpiata tuŋaani God-im. 56Suli uqallaŋaruq, Tautuksiuŋ, tautukkiga qiḷak aŋmaqtuaq, suli Iġñiŋa Iñuum makitaruaq taliqpiata tuŋaani God-im. 57Tavra iliŋich nipaallaŋarut nipatusivḷutiŋ, suli siutitiŋ matuuqługich, upaktuŋagaat atautchikun. 58Tavrani annisiñiqłaŋagaat iniqpaŋmiñ, aasii uyaġaŋnik miḷuqtuqługu. Saglutiginniktuat ilaanik mattaŋagaich qalliich annuġaatiŋ qaunagitquvlugich nukatpiamun atiqaqtuamun Saul-mik. 59Aasiiḷi miḷuqtuipkaqługich Stephen-mik ilaa aŋaiyyuŋaruq, Ataniiq Jesus, akuqtuġuŋ ilitqusiġa. 60Tavra Stephen sitquŋaruq, aasii nivliŋaruq nipatuvluni, Ataniiq, pasiñagich taavrumuuna piḷuutikun. Tavra taamna uqallausiġianikamiuŋ, tuquŋaruq.

Currently Selected:

Acts 7: INUPIAQ

Highlight

Copy

Want to have your highlights saved across all your devices? Sign up or sign in

Iñupiatun Mumiksat Uqalugiksuat (North Slope Iñupiaq Bible) © American Bible Society.

Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:

American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)

Learn More About Iñupiatun Mumiksat Uqalugiksuat