Acts 6
6
Tallimat Malġuk Iñuich Ikayuqtit
1Tavra taipkunani uvluni ukpiqtuat iñugiaksimmata, Greek-tun uqausiqaqtuat Jews uqamayuutiqaŋarut Jew-guruanun, uqaqłutiŋ uiḷgaŋaruatiŋ mitchugisuunivḷugich uvlutuaġman autaaġmata. 2Tavra qulit malġuk tiliraunikun iḷitchitqurat ququaŋagaich atautchimun ukpiqtuat, aasii uqallakłutiŋ, Nalaunŋaitchuq uvagut aġiuguptigu alġaqsruiñiq uqaluanik God-im autaaqtausugluta niqinik. 3Tavraasii aniqatiit, piksraġitchi tallimat malġuŋnik aŋutinik uqautikkusiaqaġluataqtuanik, aŋalatittuanik Ilitqusiġiksuamun isumattunmullu, savaakkigaksraptiŋnik taavrumiŋa. 4Aasiiḷi uvagut atuġniaġikput piviksraqput aŋaiyyuuġniġmun alġaqsruiñiġmullu. 5Tavra uqallautaata iviġaŋagaich iluqaisa iñusalaich, aasii piksraqtaaġiŋagaat Stephen, suaŋaruaq ukpiġunmiñi aŋalatiłłuniḷu Ilitqusiġiksuamun. Piksraqtaaġiŋammigaich Philip-lu Prochorus-lu Nicanor-lu Timon-lu Parmenas-lu Nicolaus-lu Antioch-miu, Jew-guŋitchuaq ukpiliŋaruaq Jew-guruatitun. 6Taapkua inillaŋagaich sivuġaannun tiliraunikun iḷitchitqurat, aasii aŋaiyyutiŋagaich iḷivḷugiḷḷu argatiŋ ilaiññun. 7Tavra uqalua God-im siaminŋaruq, suli ukpiqtuat Jerusalem-mi iñugiaksisaiññasugruŋarut, suli iñugiapiaġataqtuat aŋaiyyuliqsiqpaich ukpiliŋarut.
Stephen Tigutaaqtauruq
8Tavra Stephen, ikayuqpakługu God-im suaŋŋanmik, akunġanni iñuich savaŋaruq kamanaqtuanik aliuġnaqtuanik nalupqinaiyautinik alġaqsruiñiŋan iḷumun itilaaŋanik. 9Tavra iñuich iḷaŋisa akiḷḷiḷiŋagaat iḷauruat aŋaiyyuviŋmun taggisiqaqtuamun Atanġiqsitauruat Iñuich. Taapkua Jews qaiŋarut Cyrenia-miḷḷu Alexander-miḷḷu, allallu Jews qairuat Cilicia-miñ Asia-miḷḷu qapiqtaġniaŋagaat Stephen. 10Tavra Ilitqusiġiksuam isumattusiŋagaa Stephen uqaġman, aasii iliŋisa qapiqtalguiñŋagaat. 11Tavra akiḷiqł̣ugich iñuich iḷaŋich nalunautchivḷutiŋ kiaqsruŋagaich uqaquvlugich inna, Tusaaŋagikput uqaġman uqamaqłuutinik Moses-kun God-tikullu. 12Tavra ilaisa tainnaqłutiŋ aŋalayyauŋagaich iñuich, umialiŋnallu, iḷisaurriḷḷu pitquranik. Tavra Stephen ullakługu tigguġluŋagaat, aasii qaġġisivlugu uqaqsitaaqtitchiriñun. 13Suli qaġġiriŋarut iñuich iḷaŋiññik saglutiginniktuksranik Stephen-mik uqaquvlugich inna, Una iñuk uqaŋaiyuitchuq uqaluŋnik paaqsaaŋaruanik uumuŋa aŋaiyyuvikpaptiŋnun, pitquranullu qaisauŋaruanun Moses-kun. 14Qanuq tusaaŋagikput uqallaŋman taamnagguuq Jesus Nazareth-miu suksraunġiiñiaqtuaq uumiŋa aŋaiyyuvikpaŋmik, suli allaŋŋuġlugich piraġautchich Moses piraksriutiŋi uvaptiŋnun. 15Tavra takunnapiaġataqługu, iluqaġmiŋ aquppiruat kasimmarriruani tautuŋagaat Stephen kiiñaŋa iḷiruaq isaġulgum kiiñaŋatun.
Currently Selected:
Acts 6: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
