Acts 8
8
1Tavra Saul-gum iviġagiŋagaa tuqutauniŋa.
Saul Nagliksaaqtitkai Aŋaiyyuliqiruat
Tavra taavrumani uvlumi aŋaiyyuliqiruat Jerusalem-mi nagliksaaqtitaurraqsiŋarut. Iluqaġmiŋ ukpiqtuat siaminŋarut iluqaiññun nunaaqqiŋiñun Judea-m Samaria-vlu kisiŋŋuqługich tiliraunikun iḷitchitqurat. 2God-iliqiruaguruat iñuich iḷuviŋagaat Stephen, suli atqunaq kiŋuvġuŋagaat. 3#Ac 22.4, 5; 26.9-11.Tavra Saul nagliksaaqtiqpaŋagai aŋaiyyuliqiruat, suli isauġiqł̣ugich iglut, piaqłuktaqługich aullautiŋagai aŋutillu aġnallu tigutaaġviŋmuksimmaisa.
Tusaayugaaġiksuat Alġaqsruutigigaich Samaria-mi
4Tavrali tamatkua ukpiqtuat siamitauruat kukiḷuŋarut alġaqsruutigivlugu tusaayugaaġiksuaq. 5Philip aullaŋaruq iniqpaŋmun Samaria-mun, aasii quliaqtuaġutivlugich iñuich Christ-mik. 6Tavra iñusalaich atisivḷutiŋ naalaġniŋarut uqaluŋiñun Philip. Naalaġniŋarut iluqatiŋ tautukługiḷḷu aliuġnaqtuat savaaŋi. 7Qanuq ilitqusiqł̣uich aniŋarut iñugiaktuaniñ ilitqusiqł̣uqaqtuaniñ nipaalavlutiŋ, suli iñugiaktuat avatiŋich tuquŋaruat tusiattuallu iłuaqsirauŋarut. 8Tavra iñuich quviasupiaġataŋarut Samaria-mi.
9Aglaattauq iniqpaŋmi iñuqaŋaruq atiqaqtuamik Simon-mik. Sivuani kamanniuqtitkayuŋniġai aŋatkiqivluni Samaria-ġmiut, inmiñik kamanaqtualivḷuni. 10Aasii iluqaġmiŋ iñuich iniqpaŋmi, kamanaiññiqsramiñ kamanaġniqsramun, naalaġnipiaŋagaat, uqaqłutiŋ, Una iñuk suaŋŋasiqsuġaa God-im, iḷisimanaqtuam kamanaqtuamik suaŋŋatiqaqtuam. 11Aasii naalaġnisiqaŋarut ilaanun, qanuq sivisuruamik ilaan kamanniuqtinŋagai aŋatkumiñik. 12Tavraasii ukpiġiliqamirruŋ Philip alġaqsruutaa tusaayugaaġiksuaq atanniqsimmataagun God-im, Jesus-lu Christ-gutilaaŋa, iliŋich paptaiqsauŋarut, aŋutillu aġnallu. 13Simon unnii ilaa ukpiliŋaruq, aasii paptaiqsauqqaaqłuni Philip nayuŋagaa. Suli qiñiqługich kamanaqtuat aliuġnaqtuat Philip piraŋi, ilaa kamanniuŋaruq.
14Tavra tiliraunikun iḷitchitqurat Jerusalem-miittuat tusaakamiŋ Samaria-ġmiunun akuqtuġnivḷugu uqalua God-im, tiliŋagaich taamuŋa Peter-lu John-lu. 15Taapkuak tikiññamiŋ aŋaiyyutiŋagaich ukpiqtuat aitchuusiaqaquvlugich Ilitqusiġiksuamik. 16Qanuq Ilitqusiġiksuaq iḷuannuŋaitchuq nalliataunnii, aglaan paptaiqsaugiññaŋaniqsut atqagun Atanġum Jesus. 17Tavra Peter-vlu John-lu iḷiŋagaich argatiŋ ilaiññun, aasii iliŋich aŋalarraqsiŋagai Ilitqusiġiksuam.
18Tavra Simon, tautukamiuŋ Ilitqusiġiksuam aŋalattaġillaniġmagich iñuich tiliraunikun iḷitchitqurat iḷimmatigik argatiŋ, ilaan mannitchuumaŋagik Peter-lu John-lu, 19uqaqłuni, Aitchuqtinŋali taavrumiŋa suaŋŋanmik, kimulliqaa iḷigupkich argatka aitchuusiaqaġumauq Ilitqusiġiksuamik. 20Tavra Peter-m uqallautiŋagaa, Manikpich suksrauqatigilisin, qanuq isumaŋaniqsutin piññaktaaġiyumiñaġasugalugu maniŋñik aitchuutaa God-im. 21Iḷauyumiñaitchutin uumani savaaptiŋni, qanuq nalaunŋasipiaŋaitchutin iḷuŋni sivuġaani God-im. 22Isumalitqigiñ taavrumaŋŋa pigiitchuamiñ sivunniutiŋniñ, aŋaiyyulutillu Ataniġmun, ilaanun suliqutigiŋaiqulugu pigiitchuakun sivuniqaġniġiñ. 23Qanuq iḷitchuġigikpiñ siġmaaġutiqaqtilaaġnik killuqsraunmik, suli piḷuutim aŋalattaġigaatin. 24Tavra Simon kiuŋagik Peter-lu John-lu, Aŋaiyyutisiñŋa Ataniġmun, nalliiŋich unnii uqallautiptik taŋŋiŋitchumaut uvamnun.
25Tavra uqalugaaġutigianikamitku uqautigivlugulu uqalua Atanġum, Peter-lu John-lu utiŋaruk Jerusalem-mun. Alġaqsruutigiŋagaak tusaayugaaġiksuaq iñugiaktuanun nunaaqqiŋiññun Samaria-ġmiut.
Philip-lu Suġautchiqirilu Ethiopia-ġmiu
26Tavrali isaġulga Atanġum uqallaŋaruq Philip-mun, Itqanaiġiñ aullaġuglutin uŋallam tuŋaanun apqutinun Jerusalem-miñ Gaza-mun. Taamna apqun nunagluktuakun. 27Tavra Philip itqanaiyaqłuni aullaŋaruq. Ethiopia-ġmiu eunuch-guruaq, suġautchiqiri iglauniqsuq aiñmun. Taamna iñuk naumaruaq atanauraq qaunaksrivḷuni suġaliŋiñik aġnam umialgum, taggisiqaqtuaq Candace-mik Ethiopia-mi. Ilaa Jerusalem-muŋaniqsuaq aŋaiyyusukłuni God-mun, 28aasii aisaġniqsuaq tuttuqpiraunmiñi aksraliktuani usiaqsiqł̣uni. Usiaqsiḷḷaġmi taiguaġniqsuaq uqaqtaata God-im Isaiah-m makpiġaaŋiñiñ. 29Tavra Ilitqusiġiksuam uqallautiŋagaa Philip, Ullaguŋ piqasiuttuiñ uumuŋa tuttuqpirautinik aksraliktuaġaqtuamun. 30Tavra Philip aqpanŋaruq, aasii tusaavlugu taiguaqtuaq makpiġaaŋiñiñ Isaiah-m uqaqtaata God-im. Tavra ilaan apiġiŋagaa, Kaŋiqsivich taiguakkaġnik? 31Ilaan kiuŋagaa, Qanuġluŋa kaŋiqsiñiaqpik iñuum iḷisautiŋisuaqpaŋa? Tavra aiyugaaŋagaa Philip mayuġlugu aquptaaqatigitquvluni. 32#Is 53.7, 8.Tavra uqaluuraq Bible uqaluat taiguaġinikkaŋa uumiŋauniqsuq,
“Imnaisun tasikuaqtauruatun tuqutchiviŋmun
naagga imnaiyaatun sivuġaani salirimi nivliḷaitchuatun,
ilaaptauq uqallaŋaiñmiuq.
33Ilaa pimaqłuktaqtauŋaruq, aasii saglutigivlugu pasiŋagaat.
Kia quliaqtuaġiyumiñaqpagich iñuumman iñuuqatiŋisa pigiisilaaŋat,
qanuq ilaa tuqutauŋaruq.”
34Tavra suġautchiqirim uqallautiŋagaa Philip, Uqautiŋŋa kimik uqaqtaa God-im uqautiqaqpa? Uqautigiva inmiñik, naagga alla iñuk uqautigivauŋ? 35Tavra Philip uqarraqsiŋaruq, aasii aullaqisaaġivlugu taamna Bible uqaluat ilaan quliaqtuaġutiŋagaa tusaayugaaġiksuanik Jesus-kun. 36Tavra iglauniallaġmiŋ apqutitigun tikiñŋaruk imaqsuŋmun, aasii suġautchiqiri uqallaŋaruq, Tautuguŋ, uvva imiq. Sumik piñaiḷutaqaġumiñaqpik paptaiqsauniksrapkun? 37[Tavra Philip uqallaŋaruq, Ukpiġuvich iluqaaniñ uummatiŋniñ paptaiqsauyumiñaqtutin. Aasii ilaan kiuŋagaa uqallakłuni, Ukpiqtuŋa Jesus Christ Iġñiġitilaaŋanik God-mun.] 38Tavra suġautchiqirim nutqaqtitquŋagai tuttuqpirautit aksraliktuani, aasii iluqatik atqaqłutik imiġmuŋaruk Philip-lu suġautchiqirilu, aasii Philip-gum paptaiŋagaa. 39Tavra qakimmaŋnik imiġmiñ Ilitqusiġiksuaŋata Atanġum aullautiŋagaa Philip, aasii suġautchiqirim taututqiŋaitkaa tavraŋŋa, aasiiḷi suġautchiqiri aullaŋaruq iglauyaamigun quviasukpakłuni. 40Tavra Philip iḷitchuġikami Ashdod-mi itilaamiñik, tamaunnaaqami alġaqsruutigiŋagaa tusaayugaaġiksuaq nunaaqqipayaanun tikiḷġataqłuni Caesarea-mun.
Currently Selected:
Acts 8: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
