Acts 12
12
Ukpiqtuat Nagliksaaqtitauvsaaqtut
1Tavraptauq tainnaiḷivalliġman umialgum Herod nagliksaaqtirraqsiŋagai iḷaŋich aŋaiyyuliqiruat. 2Ilaan tuqutinŋagaa savikpaŋmik James aniqataa John. 3Aasii iḷitchuġikami iviġagniqamigich Jews nagliksaaqtitchivsaaŋaruq, aasii Peter tigutaaqtiłługu. Taamna piŋaruq uvluŋiñi itqautim Qulaurrusiqiviŋmun. 4#Ex 12.1-27.Tiguanikamirruŋ Peter iḷiŋagaat tigutaaġviŋmun, aasii aitchuutigivlugu qaunagitquvlugu akimiaq atautchimun aŋuyaktinun. Herod sivunniŋaruq isivġiġukługu Peter takkuanni Jew-guruat Qulaurrusiqianikpata. 5Tavra Peter tigutaaġviŋmiinŋaruq, aglaattauq aŋaiyyuliqiruat aŋaiyyutiŋammigaat God-mun qapiŋaił̣ł̣utiŋ.
Peter Annirrauruq Tigutaaġviŋmiñ
6Taavrumani unnuami Herod annisiyumaalliġmagu Peter uvluqpan iñuŋnun, Peter siñiŋaruq akunġaŋni malġuk aŋuyaktik, pituqaqłuni malġuiñik kalimñanik, aasii munaqsrich munaqsriŋarut tigutaaġvium paaqpaŋani. 7Tavraŋŋatchiaq isaġulga Atanġum makinŋaruq tavruŋa, suli qaummaq qaummaġiksiŋaruq tigutaaġviŋmi, aasii isaġulgum saqiñŋagaa Peter tuiqqaŋagun, aasii itiqsaqługu, uqallakłuni, Makittin qilamik. Suli tavrauvvaa kalimñat kataŋarut tayaġniŋiñiñ. 8Tavra isaġulgum uqallautiŋagaa, Tavsiaġiksaaġiñ aluġusiġḷutillu. Aasii tainna Peter piŋaruq. Isaġulik uqallavsaaŋaruq, Uligaaġiñ, aasii maligluŋa. 9Tavra Peter-m maliŋagaa tigutaaġviŋmiñ, aglaan iḷisimaŋaitchuq taamna savaaġikkaŋa isaġulgum iḷumun itilaaŋanik, aglaan isumaŋaruq siññaktuġasugaluni. 10Tavra qaaŋianikamisigik sivulliigḷu tugliŋiḷḷu munaqsrich, tikiñŋaruk savił̣hamun upkuaqpaŋmun, anisaġiamun iniqpaŋmun. Taamna upkuaqpak aŋmaŋaruq inmisun, aasii aniŋaruk. Tavraasii pisuaŋaruk apqutitigun, aasii tavraŋŋatchiaq isaġulgum qimaŋagaa Peter. 11Tavra Peter qaurimmaġiksiŋaruq aasii uqallakłuni, Paŋmapak nalupqisuŋaiqsuŋa Atanġum tiliŋagaa isaġulini, aasii annautivluŋa Herod-gum suaŋŋataaniñ, suli iluqaiññiñ Jew-guruat niġiukkutaanniñ uvapkun.
12Isumalaallakkaluaqami aullaŋaruq igluanun Mary-m, aakaŋata John Mark. Tavrani iñugiaktuat kasimaŋarut atautchimi aŋaiyyuvlutiŋ. 13Tavra Peter tigluktuġman siḷataani upkuam, niviaqsiaq atiqaqtuaq Rhoda-mik kiuriyyaŋaruq. 14Iḷisaġikamiuŋ Peter-m nipaa, quviatchakpaił̣ł̣uni upkuiġutigaluaġnagu aqpamik isiŋaruq, aasii uqallautivlugich Peter makitanivḷugu paam siḷataani. 15Ilaisa uqallautiŋagaat, Kinnaġuqtutin. Aasii ilaa qapiŋaiñŋaruq iḷumun innivḷugu. Ilaisa kiulgitkaat, Isaġulik qaŋma qaunaksriŋa piuq. 16Tavra Peter tigluktuqtuiññaŋaruq. Kiisaimmaa upkuiġutivaat, aasii tautukkamirruŋ niġiiḷḷaqtauŋarut. 17Tavra urriqavluni argaŋmiñik nipaiquŋagai, aasii quliaqtuaġutiŋagai qanuq Ataniġmun annisisilaamiñik tigutaaġviŋmiñ. Tavra uqallaŋaruq, Quliaqtuaġiyumagiksi taamna James-mun, aniqatiinullu. Tavraniasii ilaa aullaŋaruq allamun inimun.
18Tavra uvluġmagu piallapiaġataŋarut aŋuyaktit qanuqtilaaŋagun Peter-m. 19Tavra Herod piraksriiŋaruq ivaqłiatquvlugich Peter-mik, aglaan paqilaiñŋagaat. Tavra ilaan apiqsruqtuqtitqaaqługich munaqsrich, piraksriiŋaruq tuqutquvlugich. Taamna pianiŋman Herod aullaŋaruq Judea-miñ, aasii Caesarea-miitkaqsivḷuni.
Herod Tuquruq
20Tavra Herod qinnautipiaġataŋagai iñuich Tyre-miḷu Sidon-miḷu ittuat. Aasii ilaisa ullaŋagaat Herod piqatigiikł̣utiŋ. Iḷaaluksraqtaaġiqqaaqługu Blastus, Umialgum igluqpaŋata qaunaksriŋa, ullaŋagaat Herod apiqsrisukłutiŋ aŋuyautairrunmik, qanuq ilaisa nunaŋat niqiksraqtuġviqaqłuni umialgum nunaŋaniñ. 21Nalunaiqsauŋaruami uvlumi Herod atiŋagai umialguniġmigun annuġaani, aquvinŋaruq umialgum aquppiutaŋiññun, aasii uqaqłuni ilaiññun. 22Tavra iñuich nipaallaŋarut, Nipaa God-im. Iñugruiññaq uqaŋitchuq. 23Tavraŋŋatchiaq isaġulgata Atanġum tuqupkaŋagaa Herod, qanuq kamanaqsiḷiŋaitkaa God. Tavra ilaa qupilġunikłuni iḷumiñi tuquŋaruq. 24Aglaan God-im uqalua nauŋaruq, siamiłłuniḷu. 25Tavra Barnabas-lu Saul-lu naatchikamiŋ piraksraunmiŋnik, utiŋaruk Jerusalem-miñ, piqatigivlugu John Mark.
Currently Selected:
Acts 12: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
