Acts 11
11
Peter-m Quliaqtuaġutigai Piruanik Aŋaiyyuliqiruat Jerusalem-mi
1Tavra tiliraunikun iḷitchitqurat, aniqatiillu iluqaani Judea-miittuat, tusaaŋarut Jew-guŋitchuattauq ukpiliġñivḷugich uqaluanik God-im. 2Tavra Peter Jerusalem-muŋman, pisaaŋaŋagaat Jew-guruat isumaqaqtuat Jew-guŋitchuat ukpiqtuat nalunaiñŋutchigaksrauvlugich timimikkun, 3uqaqłutiŋ, Summan tuyuġmiaġuŋavich Jew-guŋitchuat aimaaġvianni niġiqatigivlugiḷḷu? 4Tavra Peter-m quliaqtuaġutiŋagai supayauranik piruanik isuaniñqaŋa.
5Iniqpaŋmi Joppa-mi aŋaiyyuuŋaruŋa, aasii qiñiqtuuraaqłuŋa. Atqaqtuamik ukił̣haaqpaktun niŋitauŋaruq qiḷaŋmiñ sisamatigun kaŋiġalluŋisigun, aasii nutqaqłuni saniqqamnun. 6Takunnaakkiutikapku tautuŋaruŋa niġrutinik niġrułłuŋniglu paamġuqtuaniglu tiŋmianiglu. 7Aasii tusaaŋaruŋa nipimik uqallaktuamik uvamnun, Peter makittin. Tuqutchiḷutin niġġiiñ. 8Tavra kiuŋagiga, Naagga Ataniiq, qanuq suuramikunnii salumaitchuamik niqimik pitqurat niġitquŋisaŋannik uqummirriŋaitchuŋa. 9Tavra nipi uqallatqiŋaruq qiḷaŋmiñ, Suna God-im salummaanikkaŋa, isummatiginagu salumaitchuagulugu. 10Taamna piŋaruq piŋasuiqsuaqłuni, aasii nuqitautqikł̣uni qiḷaŋmun. 11Tavrauvvaa aŋutit piŋasut tikiñŋarut iglumun irvimñun, tilirauruat uvamnun Caesarea-miñ. 12Tavra Ilitqusiġiksuam uqallautiŋagaaŋa aullaqatigitquvlugich taqiŋaŋaiġḷuŋa. Ukua uvva itchaksrat aniqatiit aullaqasiŋagaanŋa Caesarea-mun, aasii iluqata isiqłuta igluanun Cornelius. 13Aasii Cornelius quliaqtuaġutiŋagaatigut tautuŋnivḷuni isaġuliŋmik makitaruamik iglumiñi suli uqallautivlugu, Tilisiḷutin Joppa-mun qaitquuŋ Simon taiguutiqaqtuaq Peter-mik. 14Ilaan quliaqtuaġutiniaġaatin uqaluŋmik annautigiyumiñakkaġnik, iliviḷḷu igluqatitillu. 15Uqaqsaġataaqsimmiuŋalu Ilitqusiġiksuam atqaġvigiŋagai uvaptiktupiaġataq isagutisaami. 16#Ac 1.5.Aasii itqaŋagitka uqaluŋi Atanġum uqallaŋaruaq, John paptaiġutiqaŋaruq imiġmik, aglaan Ilitqusiġiksuaq iḷirauniaqtuq iḷuvsiññun. 17Tavraasii nalupqinaitchuq God-im aitchuŋammigai Jew-guŋitchuat Ilitqusiġiksuamik aitchuunmisun uvaptiŋnun ukpiqtuaġuqapta Ataniġmun Jesus Christ-mun, Suuvik uvaŋa piñaiḷutaġumiñaġlugu God? 18Taamna tusaakamirruŋ pisaaŋaŋaiŋagaat, aasii nanġaqługu God uqaqłutiŋ, Tavraptauq Jew-guŋitchuat God-im isumalitqigviksraqaqtinŋagai iñuutquvlugich isuitchuamun.
Aŋaiyyuliqiruat Antioch-mi
19 #
Ac 8.1-4. Tavra ukpiqtuat siamitauŋarut pisigivlugu nagliksaaqtitauniq isagutiruaq Stephen-qaŋa tuqutaumman. Iḷaŋich aullaŋarut ayuuqtigivlutiŋ Phoenicia-mun Cyprus-mullu Antioch-mullu, quliaqtuaġivlugich tusaayugaaġiksuat Jew-nun kisiiññun. 20Aglaattauq iḷaŋich ukpiqtuat aŋutit Cyprus-miñ Cyrene-miḷḷu Antioch-muŋarut, aasii quliaqtuaġutivlugich Jew-guŋitchuat, alġaqsruutigivlugich tusaayugaaġiksuat Atanikun Jesus-kun. 21Suli Atanġum suaŋŋataata ikayuŋagai, suli iñugiapiaġataqtuat ukpiliŋarut Ataniġmun.
22Tusaayugaat taavrumuuna tusaaŋagaich aŋaiyyuliqiruat Jerusalem-mi, aasii tiliŋagaat Barnabas Antioch-mun. 23Tikiññami iḷitchuġikami God-im quviasaaġniġmagich iñuich, ilaa quyatchaŋaruq, suli qapiŋaisaaŋagai iluqaisa ukpiġnaqtuagutquvlugich iḷumullu illutiŋ Ataniġmun iḷumiŋniñ. 24Qanuq Barnabas iñulluatauŋaruq, aŋalatiłłuni Ilitqusiġiksuamun, ukpiqtuagupiaqłuniḷu. Suli iñugiaktuat iñuich ukpiliqsitauŋarut Ataniġmun.
25Tavraasii Barnabas aullaŋaruq Tarsus-mun ivaġiaqługu Saul. 26Aasii paqitanikamiuŋ, ilaan qaġġisiŋagaa Antioch-mun. Tavra ukiuq naalġataqługu iliŋikta piqatigiŋagaich aŋaiyyuliqiruat, iḷisautivlugiḷḷu iñusalaich. Aasii Antioch-mi ukpiqtuat tairauqqaaŋarut Christ-miunik. 27Tavra tamatkunani uvluni iḷaŋich uqaqtiŋisa God-im ullautiŋarut Jerusalem-miñ Antioch-mun. 28#Ac 21.10.Aasii iḷaŋat atiqaqtuaq Agabus-mik makiłłuni aŋalałługu Ilitqusiġiksuam uqaŋaruq piyumaaqtuamik kamanaqtuaq kaaksiunaq piñiaġnivḷugu nunami iluqaani. Taamna nalaunŋaruq Claudius umialgumman Rome-mi. 29Tavra ukpiqtuat sivunniiŋarut iñupayaaq aitchuiyumiñaqtilaamisun tuyuquvlugu ikayuutiksranik aniqatiinun iñuuruanun Judea-mi. 30Aasii tainna piŋarut, tuyuġivlugich maniich aŋaiyyuliqiruat umialiŋnaŋiññun Barnabas-kullu Saul-kullu.
Currently Selected:
Acts 11: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
