Acts 10
10
Peter-lu Cornelius-lu
1Caesarea-mi iñuqaŋaruq atiqaqtuamik Cornelius-mik, atanaurauniqsuaq Rome-miut aŋuyaktiŋiññun, taggisiqaqtuanun Italian-nik aŋuyaktauqatigiiñik. 2Taamna Cornelius god-iliqiruaguruaq, suli ilaalu qitunġaniḷu qiksigivlugu God. Ilaa ikayuiŋaruq atqunaq Jew-guruat iḷiappaŋiññik, suli ataramik aŋaiyyuvluni God-mun. 3Piŋasunukpalliġman qiñiqtuuraaŋaruq tautupiaġataqłuni isaġulganik God-im isiqtuamik, aasii ququaqługu, Cornelius. 4Tavra takunnaakkiutiŋagaa isaġulik iqsiḷḷaġmi, aasii uqallakłuni, Suna Ataniiq. Isaġulgum kiuŋagaa, God-im akuqtuŋagai aŋaiyyutitin, savaatillu nagliktuiñikun, suli itqaŋagaatin. 5Aasii paŋmapak tilisiiñ iñuŋnik Joppa-mun, aasii qaġġisipkaġlugu Simon atiqaqtuaq Peter-mik. 6Ilaa amma tukkumaruq Simon-mi qitummairimi ammiñik, igluqaqtuaq taġium siñaani. 7Isaġulik uqaurriñi aullaaniŋman, Cornelius ququaŋagik malġuk kivgami iḷaŋich, god-iliqiruaguruaġlu aŋuyakti akunġanniñ tamatkua savaurriruat inmiñik, 8aasii quliaqtuaġutianikamigich supayaamik, ilaan tiliŋagai Joppa-mun.
9Uvlaakumman qitiqqaqpalliġman, iglaupkaqtillugich qallivḷutiŋ Joppa-mun, Peter mayuŋaruq iglum qaaŋanun aŋaiyyuyaqtuqłuni. 10Tavra Peter kaaliqł̣uni niġisuliŋaruq. Tavra niqłiuġataviksillugich ilaa qiñiqtuuraaŋaruq. 11Aasii tautukługu qiḷak aŋmaqtuaq, sunalu niŋiruaq qiññaqaqłuni ukił̣haaqpaktun, niŋitaŋat sisamatigun kaŋiġalluŋisigun nunamun. 12Iḷuani imaġiniġai qanusipayaat nunam niġrutiŋi paamġuqtuallu tiŋmiallu. 13Tavra nipim nivliutiŋagaa, Peter makittin. Tuqutchiḷutin niġġiiñ. 14Tavra Peter uqallaŋaruq, Naagga Ataniiq. Niġiŋaitchuŋa qaŋaunnii supayaamik God-im salumaiññiraŋanik pitqurani. 15Tavra nipim nivliutitqiŋagaa igḷuani, Sut God-im salummaanikkaŋi, isummatiginagich salumaitchuagulugich. 16Taamna niŋiraġaŋaruq piŋasuiqsuaqłuni, aasii taamna mayuurrauŋaruq tavrauvvaa qiḷaŋmun.
17Tavra Peter isumalġataviksillugu sumik sivuniqaġniaqtilaaŋanik qiñiqtuuraani, taapkuali iñuich tilirautiŋi Cornelius, apiqsruqtuiqqaaqłutiŋ Simon iglua sumiitilaaŋanik, makitaŋarut sivuġaani paaqpaum. 18Quqquaŋarut tatqamuŋa apiqsrivḷutiŋ Simon taggisiqaqtuaq Peter-mik tukkumammagaan tavrani. 19Tavra Peter isumalaaġutiqaqtillugu qiñiqtuuraamik, Ilitqusiġiksuam uqallautiŋagaa, Iñuich qaŋma piŋasut ivaġaatin. 20Makillutin atqaġiñ, tuvaaqasikkich piñatchiasuŋaġnak, qanuq uvaŋa tiliŋagitka. 21Tavra Peter atqaŋaruq, aasii uqallautivlugich, Uvaŋauruŋa ivakkaqsi. Suvlusi qaivisi? 22Iliŋisa kiuŋagaat, Cornelius aŋuyaktit atanauraŋata tiliŋagaatigut. Ilaa iñulluatauruq aŋaiyyusuuvluni God-mun, suli qutchiksuakun isummatigisuuvlugu Jew-guruat. Iḷaŋata God-im isaġuliŋisa uqallautiŋagaa aiyugaaquvlutin igluanun, tusaatquvlugu uqautiŋnik. 23Tavra Peter-m isiquŋagai tuyuġmiaġisukługich. Uvlutqiŋman makinŋaruq, aasii aullaqatigivlugich, suli iḷaŋisa aniqatit Joppa-miñ tuvaaqasiŋagaat.
24Uvlutqiḷgiñman tikiñŋarut Caesarea-mun. Cornelius iglaaksrani niġiugivlugich katitinŋagai atautchimun ilaan nanmiñiq iḷani, avilaitqatimmaġikkaniḷu. 25Tavra Peter isiaqsimman Cornelius-gum paaŋagaa, aasii purvigiŋagaa qiksiqsrautikun. 26Tavrali Peter-m makitinŋagaa uqallakłuni, Makittin. Uvaŋaptauq iñuk iliktun. 27Tavra uqaqatigillaan isiŋaruk, aasii tautuŋagai iñugiaktuat iñuich kasimaruat. 28Tavraasii Peter-m uqallautiŋagai, Ilivsivsauq iḷisimalluataqtusi qanuq nalaunŋaisilaaŋanik pitquratigun Jew-guruaq piqasiqsuutikpan naagga isiqattaaqpan Jew-guŋitchuamun, aglaan uvva God-im iḷisautiŋagaaŋa isummatigitquŋił̣ł̣ugu iñupayaaq salumaiḷḷugu suuvigruaŋiññiḷugulu. 29Tavra qanniġñiqamŋa, qaiŋaruŋa qapiŋŋataił̣ł̣uŋa, aasii apiġigikpiñ paŋmapak, suna pisigivlugu qanniqpiŋa?
30Tavra Cornelius uqallaŋaruq, Piŋasut uvlut pianiktut, ikarraq tainnaiḷivalliġman aŋaiyyuruaŋaa iglumni. Tavrauvvaa iñuk makinŋaruq sivuqqamnun qaummaġiksuanik annuġaalik, 31uqallakłuni, Cornelius, aŋaiyyutin God-im tusaaŋagaa, suli itqaqługich savaatin nagliktuutit. 32Tilisiiñ iñuŋmik Joppa-mun, aasii apiqsriaġilugu Simon taggisiqaqtuaq Peter-mik. Tukkumaruq amma taġium siñaaniittuami igluani Simon qitummairim ammiñik. 33Tavra aipkaŋagikpiñ tavrauvvaa, aasii nagliktauvlutin qairutin. Paŋmapak uvva iluqata uvaniittugut takkuani God-im, naalagukłuta iluqaiññik uqaluksriusiaġnik Ataniġmiñ.
Peter Alġaqsruiruq
34 #
Dt 10.17. Tavra Peter uqarraqsiŋaruq, Paŋmapak puttuqsriruŋa God iḷumutun ativlugich iñupayaat aŋalatkai. 35Nunauruapayaani kiñaliqaa qiksiksrautiqaqtuaq ilaanik, suli nalaunŋarualiqivluni, God-im akuqtullagaa. 36Nalupqisuŋitchuŋa tusaaŋatilaavsiññik tusaayugaaġiksuanik sivuniqaqtuanik Israel-guruanun, ilaan piksraqtaaġivluta alġaqsruutigitquvlugu tutqiutiqaġumiñaqtilaaŋat God-mun Jesus Christ-guruakun, Atanġuruakun iñupayaanun. 37Iḷisimarusi taamna tusaayugaaġiksuaq siaminŋaruq iluqaani Judea-mi, isagutivluni Galilee-miñ John Paptaiqsi alġaqsruiganiŋman. 38Iḷisimammiusi Jesus Nazareth-miukun, God-im suaŋŋasikkaŋagun kuvivḷugu Ilitqusiġiksuani ilaanun. Iḷisimammiusi Jesus kukiḷuŋanivḷugu nakuurualiqivluni, iłuaqsivḷugiḷḷu iluqaisa iłuiḷḷiuqtitaŋi Tuunġaum, God-im itqatigivlugu. 39Aasii uvagut iḷisimavluta quliaqtuaġigivut iluqaisa Jesus savaaŋi nunaŋanni Jew-guruat Jerusalem-miḷu. Ilaisa tuqunŋagaat kikiaktuutivlugu aŋarrauramun. 40Aasii God-im aŋipkaŋagaa tuqqunmiñ piŋayuaŋni uvluk, aasii tautuktiłługu uvaptiŋnun. 41Iñupayaanun tautuktinŋiñmigaa, aglaan uvagut tautuŋagikput God-im piksraqtaaġiŋaraŋatigut quliaqtuaġitquvlugu. Uvagut niġiqatigiŋagikput imiqatigivlugulu God-im aŋipkaaniŋmagu tuqqunmiñ. 42Aasii ilaan piraksriŋagaatigut alġaqsruitquvluta tusaayugaaġiksuanik iñuŋnun, suli uqalugaaġitquvlugu ilaagutilaaŋanik piksraqtaaŋa God-im isivġiquvlugich iñuuruallu tuquŋaruallu. 43Iluqaġmiŋ uqaqtiŋisa God-im uqautigiŋagaat Jesus, uqaqłutiŋ, Iñupayaagguuq ukpiqtuaq ilaanun piḷuutiŋi suliqutigiŋaiqsauniaqtut itqaumayumiñaiġḷugich Jesus pisigilugu.
Jew-guŋitchuat Aitchuusiaġigaat Ilitqusiġiksuaq
44Peter taavrumiŋa uqaqtillugu suli, Ilitqusiġiksuaq atqaŋaruq iluqaiññun naalaġniruanun uqaluŋmik. 45Jew-guruat ukpiqtuat, Peter-m qaiqatiŋi Joppa-miñ, niġiiḷḷaqtauŋarut God-im kuvimmagu aitchuutini Ilitqusiġiksuaq Jew-guŋitchuanununnii. 46Qanuq tusaaŋagaich uqaġmata nalukkamiŋnik allakanik uqautchiñik, nanġaqługu God. 47Tavra Peter uqallaŋaruq, Ukua iñuich aŋalatkai Ilitqusiġiksuam uvaptiktuttauq. Kia iñuum paptaiqsaiḷiraġniaqpagich imiġmik? 48Tavra Peter piraksriiŋaruq paptaiqsautquvlugich atqagun Jesus Christ. Tavrani apiġiŋagaat uvliuqtuallaquvlugu piqatigilutiŋ.
Currently Selected:
Acts 10: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
