Acts 13
13
Barnabas-lu Saul-lu Piksraqtaaguvlutik Tilirauruk
1Tavra aŋaiyyuliqiruani Antioch-mi, iḷaŋich uqaqtiŋi God-im inŋarut, iḷisaurriḷḷu, Barnabas-lu Simeon-lu taiguutiqaqtuaq Taaqsipaŋmik, Lucius-lu Cyrene-miu, Manaen-lu iñuguqatiqaŋaruaq Herod-mik kavanauruamik, Saul-lu. 2Aŋaiyyupkaqtillugich Ataniġmun niġiḷaił̣ł̣utiŋ, Ilitqusiġiksuam uqallautiŋagai, Ilaaguaqsisiŋa Barnabas-miglu Saul-miglu savaaksramun ququaqtauviaŋnun uvamniñ. 3Tavra niġiḷaitqaaqłutiŋ aŋaiyyuanikamiglu, iḷiŋagaich argatiŋ iliŋiŋnun aasii aullaqtiłługik.
Cyprus-muktuk
4Tavra Barnabas-lu Saul-lu tilimmatik Ilitqusiġiksuam aullaŋaruk Seleucia-mun, aasii tavraŋŋa tiŋilġaqsiqł̣utiŋ qikiqtamun Cyprus-mun. 5Tikiññamik Salamis-mun, alġaqsruutigiŋagaat God-im uqalua aŋaiyyuviŋiññi Jew-guruat. Suli John Mark-mik ikayuqtiqaŋaruk. 6Ikaaŋagaat iluqaan qikiqtaq Paphos-munaglaan. Tavrani kasuŋagaat aŋatkuqatiqaqtuaq Bar-Jesus-mik, Jew-guvluni uqaqtauniruaq God-mun. 7Ilaa avilaitqatauŋaruq kavanauruamun qikiqtami Sergius Paulus-mun, puqiksuaguruamun. Kavanauruaq aiyugaaqłiŋaruq Barnabas-mik Saul-miglu tusaasukłuni uqaluanik God-im. 8Tavra aŋatkum Elymas, Greek-tun taigutaa, akiḷḷiḷiqsuŋagik, ukpiqtaiḷivḷugu kavanauruaq. 9Tavra Saul-gum, taggisiqaġmiruaptauq Paul-mik, Ilitqusiġiksuam aŋalałługu takunnaakkiutiŋagaa aŋatkuq, 10aasii uqallautivlugu, Ilivich iġñiŋa Tuunġaum, uumikłiqsuatiin iluqaanik nakuuruamik, ataramik sagluqivlugich iñuich ilivich pisaasuġmiaġutiŋnik, suli ataramik sagluġuqtinniatakługich Atanġum iḷumun ittuat uqaluŋi. 11Aasii uvva paŋmapak Atanġum tatavsaġniaġaatin, ayauniaqtutin, suli tautulaisaallagniaġiñ qaummaq. Tavraŋŋatchiaq niptaniġluksisiŋagaa, suli taaqsisiŋagaa, aasii saptalaaqsiŋaruq ivaqłiavluni tasiuqtiksramiñik. 12Tavrani kavanauruaq ukpiliŋaruq, tautukamiuŋ taamna piruaq, qanuq kamanniupiaġataŋaruq iḷisaurrutinik Atanikun.
Paul-kut Antioch-mi Pisidia-miittuamiittut
13Tavra Paul piqatiniḷu tiŋinnaaŋarut Paphos-miñ, aasii tikił̣ł̣utiŋ Perga-mun Pamphylia-miittuamun. Tavrani John Mark-gum qimaŋagik aasii utiqłuni Jerusalem-mun. 14Tavra igliġiññaŋarut Perga-miñ, aasii tikił̣ł̣utiŋ Antioch-mun Pisidia-miittuamun. Aasii Jew-guruat Savairvianni, aŋaiyyuliaqamiŋ Jew-guruat aŋaiyyuvianni, aquptaaŋaruk. 15Taiguaganiŋmata aglaaŋiñiñ Moses, uqaqtiŋisalu God-im, umialiŋnaŋi aŋaiyyuvium uqallaurriŋarut, Aniqatiit, uqaluksraqaġuvsi siḷġiqsuutinik iñuŋnun, uqaġitchi.
16Tavra Paul makinŋaruq, aasii urriqavluni argaŋmiñik uqarraqsiŋaruq, Israel-guqatiimaaŋ, iluqasiḷu Jew-guŋitchuasii, uvani qiksiksrautiqaqtuasii God-mun, naalaġnisiŋa. 17#Ex 1.7; Ex 12.51.God-iŋata ukua iñuich Israel-guruat piksraqtaaġiŋagai maŋŋuuvut, aasii kamanaqsipkaqługich iñuummata tuyuġmiaguvlutiŋ Egypt-mi. God-im annisiŋagai Egypt-miñ kamanaqtuakun suaŋŋanmigun. 18#Nu 14.34; Dt 1.31.Aasii malġukipiani ukiuni iglaummata nunagluktuami, ilaan igḷutuŋagai. 19#Dt 7.1; Js 14.1.Tavra ilaan suksraunġianikamigich tallimat malġuk nunauruat Canaan-mi, ilaan aitchuutigiŋagaa nunaŋat iñuŋmiñun. 20#Judg 2.16; 1 S 3.20.Isagutivlugu tavraŋŋa 450-mik ukiivḷutiŋ iñuuniŋanun aglaan Samuel uqaqtaa God-im, God nalunaiqsiraġaŋaruq isivġiqsinik atanniqsimaraġaquvlugich Israel. 21#1 S 8.5; 1 S 10.21.Tavraasii iliŋich apiqsriŋarut umialiqaġukłutiŋ, aasii God-im aitchuŋagai Saul-mik iġñiŋanik Kish, maŋŋuqaqtuamik Benjamin-miñ, umialigitquvlugu malġukipiani ukiuni. 22#1 S 13.14; 1 S 16.12; Ps 89.20.God-im piiganikamiuŋ Saul, David umialliutiŋagaa iliŋiññun. Innauvva God-im uqallausiġiŋagaa ilaa, Iḷitchuġigiga David iġñiŋa Jesse-m iviġaumanaqtuaguvlugu uvamnun, piyumiñaqłuni iluqaiññik pitqutimnik ilaanun. 23Iḷaŋat David kiŋuniŋisa, Jesus, God-im unniqsuqłiisigiŋagaa annaurrigitquvlugu Israel-guruanun. 24#Mk 1.4; Lk 3.3.Qaiŋaiñŋaan Jesus, John alġaqsruiŋaruq iñupayaanun Israel-nun isumalitqiksuksraunivḷugich, aasii paptaiqsaulutiŋ. 25#Jn 1.20; Mt 3.11; Mk 1.7; Lk 3.16; Jn 1.27.Aasii John naatchiyasikami savaamiñik, ilaa uqallaŋaruq iñuŋnun, Kiunasugaluŋa isummatigivisiŋa? Taamnauŋitchuŋa niġiugikkaqsi. Aglaan iñuk imma qairuq aqupkun, aluġutik-unnii isigaŋisa nalliummatiŋitchuŋa siŋiiġumiñaġlugik. 26Aniqatiit, kiŋunġuruasii Abraham-mun, iluqasiḷu Jew-guŋitchuat qiksiksraqtuat God-mik, uvaptiŋnun tilirauŋaruq tusaayugaaġiksuaq annautauyumiñaqtuaq. 27Taipkua iñuuruat Jerusalem-mi umialiŋnaŋisalu, akuqtuŋił̣ł̣ugu annaurrigitilaaŋanik, kaŋiqsiŋił̣ł̣ugiḷḷu uqaluŋich uqaqtiŋisa God-im, taiguaġuukkaŋich Savaiññipayaaŋiññi, nalautinŋagaich God-im uqaqtiŋisa uqaluŋich suksraunġiqł̣ugu Jesus. 28#Mt 27.22, 23; Mk 15.13, 14; Lk 23.21-23; Jn 19.15.Patchisiksraitkaluaŋŋaġmiŋ sumik-unni ilaanun tuqurrutauyumiñaqtuamik, apiġiŋagaat Pilate tuqutitquvlugu. 29#Mt 27.57-61; Mk 15.42-47; Lk 23.50-56; Jn 19.38-42.Tavraasii nalautitanikamisigik iluqaisa Bible uqaluŋich ilaagun, atqaŋagaat aŋarrauramiñ, aasii iḷuviqługu iḷuvviviŋmun. 30Tavra God-im aŋipkaŋagaa tuqqunmiñ. 31#Ac 1.3.Aasii uvluni iñugiaktuani taamna Jesus tautuktitqataŋaruq tamatkunuŋa qaiqatauŋaruanun inmiñun Galilee-miñ Jerusalem-mun. Aasii tamatkua iñuich tautuktuat ilaanik quliaqtuaŋarut Israel-guruanun. 32#Ps 2.7.Aasii tusaayugaaġiksuanik qaġġirrigivsi tamatkua God-im unniqsuqłiisigiŋakkaŋich maŋŋuuptiŋnun piñiaġnivḷugich, 33pianiŋagai uvaptiŋnun kiŋunġuruanun, aŋipkaqługu Jesus. Aglausimaruq second Psalm-mi inna, “Ilivich Iġñiġigikpiñ. Uvlupak Aapagiliutigiŋma.” 34#Is 55.3.Qanuq God unniqsuqłiiŋaruq aŋipkaġniaġnivḷugu tuqutqikkumiñaiġḷugu. Una uqaluuruq Bible-ni inna, “Pisiniaġikpiñ aliuġnaqtuamik unniqsuqłiisigiŋaramnik David-mun.” 35#Ps 16.10.Allamisuli Psalm-mi God-im kaŋiqsiñaqsiḷaavsaaŋagaa uqallakłuni, “God-im aupkaġniaŋitkaa Ilaan Piḷuutaitchuani.” 36Qanuq David tuquŋaruq, savaaġianikamiuŋ piraksriutaa God-im ilaan iñuuqanmiñi, aasii iḷuviqatauvluni maŋŋuumiñun, aasii timaa auvluni. 37Aglaan taamna iñuk Jesus God-im aŋipkaŋaraa tuqqunmiñ, auŋaitchuq timaa. 38Aniqatiit, iluqasi iḷisimaruksraupiaqtusi, taavrumuuna Jesus-kun God-im suliqutigiŋaiġumiñaġai piḷuutisi itqaumayumiñaiġḷugich. 39Aasii kiñaliqaa ukpiqtuaq ilaanun annaktitauruq piḷuutipayauramiñ, aasii nalaunŋarualirauvluni. Tainna iñuk iḷiyumiñaitchuq kamagilugich pitqurat aitchuutauŋaruat Moses-kun. 40Qaunagisitchiasiiñ, iḷaanni uqaluŋich uqaqtiŋisa God-im nalautpiaqtut ilivsiññun, uqaqtut inna,
41 #
Hab 1.5. “Naalaġnisitchi, ilivsi kipakłiqsiich.
Aliuġlusi tuqusitchi.
Qanuq savaaġikkaġa uvluvsiññi,
ilivsi ukpiġisuŋitkiksi,
iñuum unnii sivunniuġutigaluaqpasi uqaluŋnik.”
42Tavra anisaġmaŋnik iñuich apiġiŋagaich Paul-lu Barnabas-lu uqautivsaaquvlutiŋ Savaitqikpata. 43Tavra kasimaniŋat aŋaiyyuviŋmi aġiumman, iñugiaktuat Jew-guruallu, Jew-guŋitchuallu ukpiliŋaruat Jew-guruatun, maliŋagaich Paul-lu Barnabas-lu. Tavra iliŋikta uqautiŋagaich qapiŋaisaaqługich iñuutuiññaquvlugiḷḷu iviġagniaġlugu God.
44Savaitqiŋmata iluqakavsaŋmiŋ iniqpaum iñuŋi qaiŋarut naalagiaqłutiŋ uqaluanik God-im. 45Tavrali Jew-guruat tautukamisigik iñusalaich, killuqsraliŋarut, aasii qapiqtaqługich sut uqautigikkaŋi Paul-gum, suli uqamaqłuutivlugu. 46Tavra Paul-lu Barnabas-lu uqaŋaruk iqsiŋaiqł̣utik, uqaqłutik, God-im uqalua uqautigiraksraupiaqtuq ilivsi sivulliġilusi Jews. Aasii ayyakavsiuŋ, sivunniqsusi ilivsiññik iñuusuŋił̣ł̣usi isuitchuamun. Iḷisimatitchi. Aullaġniaqtuguk Jew-guŋitchuanun. 47#Is 42.6; 49.6.Qanuq Atanġum piraksriŋagaatigut Bible-ni, uqaqłuni,
“Inillaŋagivsi qaummatauruatun
itquvlusi Jew-guŋitchuanun,
alġaqsruutigitquvlugu annaun
iñupayauranun.”
48Tavra Jew-guŋitchuat tusaakamirruŋ taamna quviatchaŋarut, suli nanġaŋagaat Ataniq uqalua pisigivlugu, aasii ukpiliŋarut iñugiaktilaamiktun piksraqtaaguŋaruat iñuggutiqaquvlugich isuitchuamun.
49Tavra uqalua Atanġum siaminŋaruq iluqaiññun nunaaqqiñun tamaaniittuanun. 50Tavrali Jew-guruat maqulluksaiŋarut Jew-guŋitchuanik aġnanik qaukłiuruaniglu aŋutinik iniqpaŋmi ukpiqtuanik God-mun. Ilaisa nagliksaaqtinniarraqsiŋagaich Paul-lu Barnabas-lu, aasii uŋułługik nunaaqqimiŋniñ. 51#Mt 10.14; Mk 6.11; Lk 9.5; 10.11.Tavra piiyaŋagaak nunam avyua isigagmiŋniñ kiliktuutausaqługu ilaiññun ayyaiñiŋatigun, aasii aullaqłutiŋ Iconium-mun. 52Tavra ukpiqtuat Antioch-mi quviasupiaġataŋarut aŋalatiłłutiglu Ilitqusiġiksuamun.
Currently Selected:
Acts 13: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
