1 Peter 5
5
God-im Imnaiŋi
1Aasii paŋmapak, siḷġiqsuġniaġitka umialiŋnat, uvaŋaptauq umialiŋnauvluŋa, qiñiŋavlugu Christ nagliksaaġman aasii quliaqtuaġivlugu, piqatauyumaaqłuŋa kamanautaanun niptaġumaaqtuamun. 2#Jn 21.15-17.Siḷġiqsuġivsi qaunagitquvlugich God-im iñuŋi munaqsraġikkasi, piḷusi imnaiḷiqiritun qaunaksriḷḷuataqtuatun imnaimiñik. Qaunagisigik taqiŋaŋaiġḷusi piyummatigilugu, God-im pitqutaatun ilivsiññun. Qaunagisigik pisigiłhaaġlugu piyummatiqaġniqsi, akiḷiusiaksranik piqutiqaġniġmiñ. 3Atanniqsimaniatagnagich taluqsralliaġilugich iñuich qaunagiraksriusiasi, aglaan tuvraaksriqsigik iñuuniaġutchimik tuvraġumiñakkaŋannik. 4Atanġum niptaġumi, qaukłiatiktun imnaiḷiqirit ittuam ilivsiññun, ilaan akiḷiġñiaġaasi akimaruaq niaquġunmik akiññaktuatun, piqatauyumiñaqsiḷusi isuitchuami qaumaniġmiñi.
5 #
Pr 3.34. Tainnatuttauq siḷġiqsuġlavsi ilivsi nukatpiat. Kamakkutiqaġitchi utuqqanaanun. Iluqasi kamasaaŋaiġḷusi ikayuutisitchi avanmun, qanuq Bible uqaluqaqtut inna, “God-im akiḷḷiḷiqsuġai kamasaaqtuaguruat, aglaan ikayuqsimaaġai iñuich kamasaaŋitchuat.” 6#Mt 23.12; Lk 14.11; 18.14.Kamanaiġitchi ilivsiññi God-mun aŋalatchumiñaqsiḷugich iñuutchisi ilaan suaŋŋanmigun, aasii ilaan kamanaqsipkaġniaġaasi nalautitpan piviksraq. 7Uqauttusiuŋ God uŋiarrisigikkavsiññik aasii tutqiksiḷusi, qanuq ilaan qaunaksraġigaasi.
8Aŋalalluataġitchi ilivsiññik. Nipuŋaitchitchi. Qanuq akiḷḷiqsi Tuunġaq ataramik ukpiġutaiqsitchiñiaqtuq ilivsiññik, iqsiñaqtuatun ugiallavluni lion-tun kukiḷuktuatun sumulliqaa niqiksraqsiuqłuni. 9Akiḷḷiḷiqsuqsiuŋ ukpiġutiqaqtuiññaġlusi suaŋaruamik, qanuq iḷisimarusi ukpiqtuaguqatisi nunami iluqaani nagliksaaġmiuttauq ilivsisun. 10Aasii nagliksaaqtuallaanikkuvsi sivikitchuamik, God-im nagliktauqpaktuam qaitquriŋaruavlu ilivsiññik piqatautquvlusi ilaan isuitchuamun kamanaunmiñun atausiŋŋuqatigiŋakavsiuŋ Christ, naamasiñiaġaa ukpiġurri, nalupqisuutiqaġumiñaiġḷusi, maliksuyyataiġḷusiḷu. 11God isuitchuamun iluqaanik suaŋŋatiqaqtuaguruq. Amen.
Paġlasuiqsaaġutit
12 #
Ac 15.22, 40. Tuyuġivsi ukuniŋa naitchuanik tuyuutinik ikayuqtiqaqłuŋa Silvanus-mik, ukpiġnaqtuaġikkamnik aniqanmik. Qapiŋaisaaġukkivsi uqallautilusiḷu tamanna tusaayugaaġiksuaq God-im iḷumutun nagliktuiñiqpautigigaa iñuŋnik. Ukpiġikavsiuŋ tuniqsimavigisiuŋ. 13#Ac 12.12, 25; 13.13; 15.37-39; Col 4.10; Phm 1.24.Aŋaiyyuliqiruaguqativsi Babylon-mi God-im iñuksraqtaaŋisaptauq paġlammigaasi, iġñiġimmatullu itaġma Mark-gum. 14Ukpiqtuat paġlatikaaŋannik paġlatiraġutitchi Christ-miuguruat piviuttaqqutaannik. Tutqiutiqaġitchi iluqasi atausiŋŋuqatauŋaruasii Christ-mun.
Currently Selected:
1 Peter 5: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
