1 Peter 4
4
Iñuusatqiksuat Iñuich
1Tavra Christ nagliksaaqtuksrauŋamman timimiñi nalaunŋarualiqiniq pisigivlugu, ilaatun ilivsi isumaqaqtuksraummiusi, aasii itqanaiḷḷusi nagliksaaġutigiraksraġuqpan nalaunŋarualiqiniq. Kiñaliqaa nagliksaaġumi tainnatun tasamma piḷuusiqiuraaŋaiqsuq, 2aglaan aŋalatitaaliqsuq God-mun iñuuniqtutilaamisun, nunami aŋalatinŋaiqł̣uni piḷuksisuguuruamun iñuutchimiñun. 3Qaŋauvlugu qaaŋianiktuami aptatigianiŋagisi atuqługich ukpiŋaitchuat piḷḷatukkaŋich. Atuġuuŋagaluakkaqsi piviksraqsi qanusipayaakun pitquraiḷaġnikun, allatuqłusi, imiŋasivḷusi, pialapiaġataġniġmi taaŋŋaqłutiŋ aliasuŋitchuani, suli pivḷugich piḷuusiqutiŋich tamatkua aŋaiyyusuuruat iñuuraqpaŋnun. 4Aasii paŋmapak ukpiŋaitchuat allasuktut iḷaliqsuutiŋaiqavsi ilimiŋnun pialapiaġataġniġmi, suurimmaanġiqł̣uniḷu iñuuniaġniġmi, aasii pisaaŋaaqsivḷusi. 5Taamna pisigilugu inmiŋnik uqaġiruksrauniaqtut God-mun isivġiisałhiñaaġuŋaruamun iñuuruanik tuquŋaruaniglu. 6Summan tusaayugaaġiksuaq alġaqsruutauŋava iñuuŋŋaisa paŋmapak tuquŋaruat? Alġaqsruutauŋaruq iñuuyumiñaquvlugich ilitqutchimiŋni God-itun iñuuruatun, isivġiqsauŋagaluaŋŋaġmiŋ iñupayaatuttauq isivġiqsauruatun iñuuŋŋaġmiŋ nunami.
Aŋalatchiḷḷuataqtuat God-im Aitchuutiŋiñik
7Isuksraŋat supayaat qalliruq. Ilivsiññik aŋalalluataġitchi nipuŋaiḷḷusi aŋaiyyuyumiñaġumausi. 8#Pr 10.12.Naumaniqsrauruaq uvva, piviuttaqqutipiaġitchi avanmun qanuq piviuttaqqutiruni avanmun nalunaiqsimałhaiññaġnaitchut iluqaisa naġġunautit avanmun. 9Tukkuliqsuutisitchi avanmun uqaallatigiŋaiġḷugu. 10Iñullaam atuġligich inmigun aitchuusiallaani God-miñ ikayuutigisaġlugich allanun iñuŋnun. Tainna pigumi, aŋalatchiriḷḷuatauniaqtuq allakaaġiiñik God-im aitchuutiŋiñik inmiñun. 11Kiñaliqaa alġaqsruiruaq alġaqsruutiqaqtuksrauruq God-im uqaluanik. Kiñaliqaa savaurriruaq God-mik suaŋŋasiqsuqtiqaqtuksrauruq God-mik iluqaani, God nanġaqtauyumauq Jesus Christ-kun. Christ-tuq kamanaqsipkaqtauli nanġaqtauluniḷu isuitchuamun. Amen.
Nagliksaaġniq Ukpiqtuaguvluni
12Piviuttaġirauruasii, ukpiġurri uuktuaqtaumman nagliksaaqtitauvlusi, tupautiginagu isumavsiññi allayuaġilugu taamna piruaq ilivsiññun. 13Aglaan quviasuksiññaġitchi piqasiutiniḷusi Christ-mun nagliksaaġutiŋigun, taimanigu quviasupiaġataġumausi Christ niptaqpan qaumaniqaġluni. 14Quviasugitchi pisaaŋŋasiaqaġuvsi pisigilugu ukpiqtuaguniqsi Christ-mun, qanuq tainna pikpasi, sivuniqaqtuq God-im Ilitqusiġiksuaŋa qaiŋatilaaŋanik iḷuvsiññun salapqiiḷḷaruaq ilaan qaumanġanik. 15Aglaan nalliqsiunni nagliksaalaqsruġnani iñuaġluni, naagga tigligluni, naagga pitquranik kipuqłaiḷuni, naagga iḷaksiatiluni iñuich allat piraŋiññun. 16Aglaattauq nagliksaaqtitauguvsi pisigilugu Christ-miuguniqsi, kanŋusuutiginagu. Quyyavigigiññaqsiuŋ God iḷisimanaqavsi Christ-mun iñugitilaavsiññik.
17Isivġiqsausaġviksraq tikitchuq, aasii God-im nanmiñiq iñuŋi isivġiqsauqqaaqtuksraurut. Uvagut isivġiqsauqqaaġupta, qanuġlikiaq isuqaġniaqpa isivġiusiaksraŋat iñuich ukpiŋaitchuat God-im tusaayugaaġiksuaŋanik? 18#Pr 11.31.Bible uqaluqaqtut inna,
“Siġġaġnaqpan iñulluatat annaurrauniksraŋat,
qanuġli inniaqpa tamatkunuŋa god-aiḷaqtuanun piḷuktuanullu iñuŋnun?”
19Tavraasii iñuich nagliksaaqtitauruat God-im pisuutaagun, nakuurualiqilich qaunagipkaġlutiŋ iñuġuqtitchiŋaruamun inmiŋnik ataramik taŋŋiisuuruamun unniqsuqłiiñmiñik.
Currently Selected:
1 Peter 4: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
