1 Peter 2
2
Iñuuruaq Uyaġak Ilaaguaqtauruaġlu Nation
1Tavra aġiusigik iluqaisa pigiitchuat. Sagluuŋaiġitchi ukpiŋŋuaŋaiġḷusiḷu killuqsraŋaiġḷusiḷu tiġliraqłiŋaiġḷusiḷu. 2Aniqqammiuratun miqłiqtuuratun ataramik immuktuġuktuatun aasii aglivḷutiŋ milugivlugu immuk, tainnatulli kipiġniuġutigisiuŋ iḷitchuġisaiññaġuglugu God-im iḷumun ittuaq uqalua, aasii ukpiqtuagulusi agliḷḷuataŋaruatun, iḷumutun annaurrauŋalusi. 3#Ps 34.8.Qanuq iḷitchuġianiŋagiksi pikałaktautairrutaa Atanġum.
4Ullautisitchi Ataniġmun iñuuruamun, uyaġaktun ittuamun, pigisuŋisaŋannun iñuich, aglaan God-im piksraqtaaġikkaŋa akisuruaġivlugu. 5Qaisitchi Ataniġmun, isummatigilusi ilivsiññik uyaġaktun iḷiḷusi iñuugaluaŋŋavsi, Atanġum atuġumagaasi nappaġumiuŋ qiñiġnaitchuaq aŋaiyyuvikpani. Aasii ilivsi inniaqtusi Atanġum piḷuutaitchuatun aŋaiyyuliqsiqpaŋisun. Aŋaiyyuliqsiqpaich tuqutchisuuruatun niġrutinik aasii aitchuutigivlugich Ataniġmun ikipkaiviŋmi, tainnatulli aitchuiyumiñaġniaqtusi aŋaiyyutivsiññik nanġautivsiññiglu God-mun Jesus Christ-kun, aasii taamna akuqtuġnaġumiñaġniaqtuq ilaanun. 6#Is 28.16.Qanuq Bible uqaluŋich uqaqtut inna,
“Piksraŋaruŋa akisuruamik uyaġaŋmik,
paŋmapak iḷigiga kaŋiġalluŋmun uyaġaliutivlugu Zion-mi,
aasii kiñaliqaa ukpiqtuaq ilaanun nunuuraliġumiñaitchuq.”
7 #
Ps 118.22. Taamnaasii uyaġak akisupiaġataqtuq ilivsiññun ukpiqtuanun, aglaan tamatkunuŋa ukpiŋitchuanun, “Taamna uyaġak igluqpirit pisuŋisaŋat anniqsuutauŋiññivḷugu, iḷiruq naumaniqsraupiaqłuni uyaġak.” 8#Is 8.14, 15.Suli allami Bible uqaluŋich uqallaktut inna,
“Uyaġaum taavruma putukkisinniaġai iñuich,
uyaġak ulġutchiñiaqtuq iliŋiñik.”
Qanuq iliŋich puukaqtut pisigivlugu ukpiŋiññiqtiŋ uqaluŋmik. Tainna God-im pisuutaa inŋaniqsuq ilaisigun.
9 #
Ex 19.5, 6; Is 43.20;
Ex 19.5; Dt 4.20; 7.6; 14.2; Titus 2.14;
Is 43.21;
Is 9.2. Aglaan ilivsi iñuksraqtaaġirauŋarusi, Umialgum aŋaiyyuliqsiqpaŋi, ilaaguaqtauvlutiŋ Nation-guruat, God-im nanmiñiq iñuŋi, piksraqtaaguruat quliaqtuaġitquvlugich aliuġnaqtuat savaaŋi God-im, taavruma ququaġiruam ilivsiññik taaqtuamiñ ilaan aliuġnaqtuamun qaummaġmiñun. 10#Ho 2.23.Qaŋauvlugu God-im iñugiŋitkaluaŋakkaŋasi, aglaan paŋmapak God-im iñugiliutiŋagaasi. Qaŋauvlugu naluŋagaluaqtuasii God-im nagliktuutaanik, aglaan paŋmapak nagliktuusianikłusi.
God-im Kivgaŋi
11Piviuttaġirauruasii, tuyuġmiułhiñaqtusi mattumani nunami, aimaaġvivaalluksi qiḷaŋmiittuq. Tavraasii apiġipiaġivsi aulatinŋaiġitchi piḷuusiqisuguuruanun timivsiññun aŋuyaktuanun ilitqutchivsiññik. 12Nalaunŋaruakun iñuuniaġitchi akunġanni ukpiŋaitchuat, iḷaanni uqautigimaqłukkumisi killuliqiruaġuġlusi tautuksiññaġumagaich iñuulluataġnisi, aasii nanġaġlugu God Christ qaitqikpan.
13Kamakkutiqaġitchi iñupayaanun ataniġnaqutiqaqtuanun Ataniq pisigilugu, Rome-miut umialgannun qaukłiuruamun, 14naagga kavanakkaluanun tiliŋakkaŋiñun ilaata tatavsaitquvlugich tamatkuniŋa killuliqiruanik, aasiisuli nanġaġiaqługich tamatkua iłuaqtualiqiruat. 15Qanuq pisuutigigaa God-im iñuutquvlusi nalaunŋaruakun naluruat iñuich pisaaŋannigniaqtuat ilivsiññik ukpiqtuanik pisaaŋŋatiksraiḷḷiuġumaut. 16Atanniqsimaraitkaluaŋŋavsi pitquranik, atanniqsimaraiññiḷusi piḷuusiqiruksrauŋitchusi. Iñuusiqaġitchi God-im kivgaŋisun savaaġilugu ilaan pisuutaa ataramik. 17Suuŋiḷaġinagich iñupayaat. Piviuttaġisigik ukpiqtuaguqatisi. Qiksigilugu God. Suuŋiḷaġinagu Umialik.
Christ Tuvraaksriutaa Nagliksaaġnikun
18Kivgauruasii, kamakkutiqaġitchi atanivsiññun iḷisimanaqsiḷugu naamaruaq qiksiksraun, nagliktauruanun piaqłuktaŋitchuanullu kisiiññun piŋaiġḷusi, aglaallu igḷutulgunaitkaluaqtuanun atanivsiññun. 19Igḷutuiguvsi nagliksaaġunmik nalaunŋarualiqigaluaġlusi iviġagniaġiksi God, igḷutuutiguvsi nalautchuglugu ilaan pisuutaa. 20Pisigilugu killuliqinġiñ qiñuiġḷutin igḷutuġaluaġupku nagliksaaġun, nanġausiaksraitchutin God-miñ. Aglaan qiñuiġḷutin igḷutuġupku nagliksaaġun iłuaqtualiqigaluaŋŋaqpich God-im iviġaumagirualiñiaġaatin. 21Tainnasiq nagliksaaġun iḷagigaa savaaksriusiavsi God-miñ, aasii Christ nagliksaaŋaruaq pisivlusi tuvragaksraġigiksi, suli piḷusi ilaan pisiatun. 22#Is 53.9.Ilaa piḷuusiqiŋaitchuq sumikunnii. Qaŋaunnii sagluŋaitchuq. 23#Is 53.7.Uqamaqłuurraukami, uqamaqłuunmik kiummatiŋaitchuq. Nagliksaaqami, sivuuġasaaqłiŋaitchuq, aglaan ukpiġiŋagaa God, isivġiiruaq nalaunŋaruakun. 24#Is 53.5, 6.Christ igḷutuŋagai piḷuutivut timimiñi tuquvluni aŋarraurami, uvagut tuquruatun pitquvluta piḷuunmun, aasii iñuuluta nalaunŋarualiqiluta. Tainna pikami, uvagut iłuaqsipkaqtuatun piŋagaatigut kiḷḷiaqtauniġmigun. 25Qanuq tammaŋaruaguŋarusi imnaisun, aglaan paŋmapak utiŋarusi Imnaiḷiqirimun Qaunaksriŋannullu ilitqusivsi.
Currently Selected:
1 Peter 2: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
