1 Peter 1
1
1Peter, tiliraŋa Jesus Christ, tuyuqtuq God-im iñuksraqtaaŋiñun iñuuruanun pigruŋavlutiŋ nunaaqqiñun Pontus-mun Galatia-mullu Cappadocia-mullu Asia-mullu Bithynia-mullu. 2God-im Aapauruam piksraqtaaġiŋagaasi taimani miqłiqtuġisukłusi, sivunniŋavluni ilaaguaqtitquvlusi inmiñun Ilitqusiġiksuamun, sivunniŋavluniḷu iñuutquvlusi kamagiugaġlugu Jesus Christ, piḷuutaiŋammasi tuqukami maqipkaqługu auni. Nagliktuusiaqpaqaġitchi tutqiunmiglu.
Niġiugniq Taimuŋa Iñuuyumaaġniġmun
3Nanġaqtauli God Aapaŋa Atanipta Jesus Christ. Qanuq ilaa naglikkutiqpaqaqłuni uvaptiŋnun iñuutchiŋagaatigut nutauruamik aŋipkaqługu Jesus Christ tuqqunmiñ. Taavruma niġiukkiġaatigut iñuuniksramik isuitchuamun, 4suli niġiuktugut kiŋuvaannagniaqtilaaptiŋnik quviasuusiaqpaŋnik God tutquqsimakkaŋiñik pigitquvlugich iñuŋmiñun. Ilaan tutquqsimagai kiŋuvaannaktaaksrautit qiḷaŋmi iñuqaqługich ilivsiññun, aunaitchuami maquliñaitchuami qiññaġiiḷiñaitchuamiḷu. 5Tamatkua annaurrauniġmi quviasuusiaksrautit kiŋuvaannaktaaguyumaaqtuat God-im itqanaiyaŋarani qaiññiaġai piviksraq isukłitpan. Aasii God-im sapiġñaqtuakun suaŋŋanmigun qaunaginiaġaasi aitchuusiaġiyumiñaqsiḷugich pisigilugu ukpiġutiqaġniqsi.
6Taamna pisigilugu quviasugitchi, paŋmapak-unnii sivikitchuami nagliksaaġutiqallakkaluaġuvsi allakaaġiiñik uuktuaġusianik. 7Uuktuaġusiavsi sivuniġigaat iḷumun itilaaqsaqługu ukpiġutiqapiaqtilaaqsi. Manikunnii kaviqsuaq maqullaruaq uuktuaġuugaat ignikun, tainnatuttauq ukpiġurri akisułhaasugruktuaq maniŋmiñ kaviqsuamiñ uuktuaġusiaqaqtuksraummiuq igḷutuutiyumiñaqsiḷugu. Tavraasii nanġausiaqaġniaqtusi kamanaqsipkaqtaulusiḷu isumakkusiaqaġluatapiaġlusiḷu taivrumani uvlumi Jesus Christ qaitqikpan. 8Tautuŋaitkaluaŋŋaan ilaa, ilivsi piviuttaġigiksi. Paŋmapak tautuaġiŋitkaluaŋŋaan ukpiqtusi ilaanun, aasii quviasuutiqpaqaqtusi quviasuutiqpapiaġatamik uqautigianignaġumiñaitchuamik, 9qanuq iḷisimarusi aitchuusiaġiniaqtilaaŋanik annautaa ilitqusivsi, taŋŋiutauruaq ukpiġikkavsiññun.
10Taamna annaun uqaqtiŋisa God-im ivapiaŋagaluaġaat iḷitchuġiniaqługulu, aasii iliŋisa uqautigiŋagaich quviasuusiaksrautit God-im aitchuutiksrautiŋi ilivsiññun. 11Tavra Christ Ilitqusian uqaqtinmatiŋ taavrumiŋa piyumaaqtuamik qakugukpan Christ nagliksaaġniksrautaanik aŋiñiksrautaaniglu, iḷisimayumaŋagaluaqtut qakugupiaq taamna piñiaqtilaaŋanik kisumullu iñuŋmun piñiaqtilaaŋanik. 12God-im taipkua uqaqtini iḷitchuġipkaŋagai tamatkua uqautigikkaŋich piyumaaŋiññivḷugich iliŋisa iñuuniŋanni, aglaan piñiaġnivḷugich aquvatigun ilivsi iñuunivsiññi. Paŋmapak-aasii tusaayugaaġiksuat quliaqtuaguaniŋarut iluqavsiññun. Tilirauruat suaŋŋasiġmatiŋ Ilitqusiġiksuam tilirauruam qiḷaŋmiñ, quliaqtuaġutiŋagaasi tusaayugaaġiksuanik isaġulgich-unnii kaŋiqsiyumaŋagaluakkaŋiññik.
Iñuutqun Piḷuutaitchuakun
13Tamatkua tainnainmata, ataramik isumaqaġitchi God-im isumatqutaatun, illusi iñuktun upaluqsałhiñaaguruatun savaaksranun. Ilivsiññik aŋalalluataġlusi niġiugiugaġlugich quviasuusiaksrat aitchuusiaksrautisi Jesus Christ salapqiqpan. 14Kamakkutiqaġitchi God-mun, uqaqsiġiaqtuatun miqłiqtutun. Iñuusiġiŋaiqsigik qaŋauvlugu piḷuutikun iñuusiġisuukkasi piḷġusiġivlugich naluŋŋavsi tusaayugaaġiksuamik. 15Aglaan iñuusitchi piḷuutaiḷḷusi iluqaisigun piḷġusivsigun, piḷuutaiḷḷusi God-itun piḷuutaitchuatun, ququaġiŋaruatun ilivsiññik ukpiquvlusi. 16#Lv 11.44, 45; 19.2.Qanuq Bible-ni God piraksriiŋaruq inna, “Piḷuutaitchuksraurusi qanuq uvaŋa piḷuutaitchuŋa.” 17Aasii aŋaiyyukavsi taisuugiksi Aapamik. Ilivsi Aapagikavsiuŋ isivġiisuuruaq iñuŋnik allagiiksitasuŋaġnagich savaallaaŋisigun, iñuusiqaġitchi qiksiksrautiqaġlusi ilaanun sivisutilaaŋatun nunami iñuunivsi. 18Qanuq iḷisimarusi suna akiḷiutauŋatilaaŋanik atanġiqsitchaqłusi anniqsuusiqiŋitchuamiñ iñuusiġikkavsiññiñ, iñuutchimiñ pigiitchuamiñ kiŋuvaaġiŋakkavsiññiñ maŋŋuuvsiññiñ. Taavruma akiḷiutauruam akisutilaaŋa akikł̣ipayaaġumiñaitchuq manium qatiqtuam naagga kaviqsuam akikł̣iraġausiatun. 19Atanġiqsitauŋarusi akisupiaġataqtuamik aitchuutauŋaruamik Christ-mik, aitchuutauruaq imnaiyaatun qilluutaitchuatun. 20Ilaa tainna God-im sivunniutiŋagaa nuna savaŋaunnagu, aglaan satqummiqsauvluni aqulliġñi uvluni pisigivlusi. 21Christ-kun ilivsi ukpiqtusi God-mun, aŋipkairuamun ilaanik tuqqunmiñ aasii kamanaqsipkaqługu, ukpiqtuiññaquvlusi annagummatiqaġlusiḷu God-mun.
22Paŋmapak-aasii piḷuutaiqsauganikavsi kamaksrirraqsivḷusi God-im iḷumun ittuamik uqaluanik piviuttaqsriḷḷasirusi iḷumutun ukpiqtuaguqativsiññik. Tavraasii nalupqinaiyapiaqsiuŋ iḷumupiaq piviuttaġitilaaŋannik ukpiqtuaguqatisi iḷuvsiññiñ. 23Qanuq uqaluagun God-im iñuuruakun isukłiḷaitchuakullu anitqiksitauŋarusi, miqłiqtuliutivlusi aŋayuqaamun tuqulaitchuamun tuquyumaaŋitchuamullu. 24#Is 40.6-8.Bible uqaluŋich uqaluqaqtut inna,
“Iñupayaat tuqullarut, iviktun panaqłukługu tuquliruatun.
Iluqaġmi kamanautaat iñuich ittuq nauriam qiñiyunautaatun tuquliruatun aasii katakłuni nunamun.
25Aglaan uqalua Atanġum ittuq isuitchuamun.”
Taamna uqaluk tusaayugaaġiksuaguruq alġaqsruutauŋaruaq ilivsiññun.
Currently Selected:
1 Peter 1: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
