Matie 6

Kɔɓo hɛn yii da dɛɛ mąąwɛli nuą pɔ

1«Ka gɛ a nɛlɛɛ, ka hvo ka wɔ kalan non naa, mąą túwɔ́ pələ kulɔ nuą ɲɛ̨i ɓa, ə gɛ, di ka káá. Akɛ ka gɛ tii, ka Nąn Yálái yələkɔlɔn ɉu, hva kɛa ka hvɛla kulɔ. 2Akɛ yá kɛi mąąwɛli mun gɔ́, a hɛn da, hvo ə́ kpɔɔ mɛ̨i lolo too, yɛ bələi tɛ ɲɛ̨i mɛ̨nį kɛ nuą da gɛ la, di wɔ Yálá hvɛli pɛlɛ́ɠaa mu; da pələ leeɠaa mɛ̨i; ə gɛ, nuą di di mąąwiɛ. Gáá moi kaa a tɛ̨ą, daa gbɛa di hvɛla hɔlɔɓo. 3Kɛlaa, yɛ́ ə́ wɛi, yá kɛi mąąwɛli mun gɔ́ a hɛn da, gɛ a loo mɛ̨nį, nu ta hvo gbaɠala kaa. 4Ya ɓə a gɛ, ə́ wɔ kɔ́ɓo hɛn ə lɛɛ a nooɔ. Ə́ Nąn Yálái a loo mɛ̨nį hu kaa, ya ɓə pai ə́ hvɛla kulɔi.»

Yálá hvɛli mɛ̨nį

(Lukə 11.2-4)

5«Ka kɛi Yálá hvɛli, ka hvo gɛ yɛ tɛ ɲɛ̨i mɛ̨nį kɛ nuą; diɛi da kɛ bɔ, diɛ ɓo tɔɔni diɛ Yálá hvɛli di wɔ Yálá hvɛli pɛlɛ́ɠaa mu, da pələ taŋąnnaɠaa; ə gɛ, nuą di di kaa. Gáá moi kaa a tɛ̨ą, daa gbɛa di hvɛla hɔlɔɓo. 6Kɛlaa, yɛ́ ə́ wɛi, yá kɛi Yálá hvɛli, lɔ ə́ yəi bɛlɛ́n, ə́ naa kpulu; ə́ Ną́n Yálái gaa laa ə́ pɔ loo hu, vɛli. Yaa tii a loo mɛ̨nį hu kaai, ya ɓə pai ə́ hvɛla kulɔi.

7«Ka kɛi Yálá hvɛli, ka hvo hvaa tamąą ɓo, yɛ bələi nuąi di hvo Yálá kɔ́lɔn da gɛ la. A kɛ di kwəi da mo tii tamąą, ya ɓə Yálá a di woo mɛ̨n na. 8'Ka hvo gɛ yɛ diɛ. Mąąhɔlɔɓo, yii kpɔ gbaan gaa kaa, ka Ną́n Yálá ə gɔlɔn gɛɛ ka hvo kɛ vɛlii mą. 9Bələi mąąnɛ̨ɛ̨ ka Yálá hvɛli la bələ ka, ka kɛ mą:

«‹Ku Ną́n yɛ́i ə́ kaa yələkɔlɔn ɉu,

Ə́ laa mąą ə həɠə.

10Ə́ wɔ tɔɔlaa ə pa.

Ə́ liiɓa ə kɛ lɔi mɛ̨i yɛ bələi gaa kɛi la yələkɔlɔn ɉu.

11Háákələi kɔ̨nɔ̨n dɛɛ ku pɔ.

12Ku kɛ nɛ̨ŋɛ̨nŋąą mąąhvaalɛɛ,

yɛ bələi yiiɠaai da ɓaɠa ɓo kuɔ kwa di mąąhvaalɛɛ la.

13Hvo ku lɛɛ laa ku hvo too ɲąą hɛn mɛ̨nį hu.

Kɛlaa, ku kulɔ mɛ̨nį ɲɔ̨n ɉu.

Mąąhɔlɔɓo, ə́ pɔɔ ɓa tɔɔlaa, da heeɓolaa da mąąwiɛ,

əlɛɛ la ɉu wɔ. Mįįną.›

14«Yili ɓa, akɛ nuąi da kɛ mɛ̨nį ɲɔ̨n gɛi a kaa, ka kɛ di mąąhvaalɛɛi, bələ lɔ ɓə, ka Nąn yaa kpɛli a ka mąąhvaalɛɛ la. 15Kɛlaa, akɛ nuą da mɛ̨nį ɲɔ̨n gɛi a kaa, ka wala di mąąhvaalɛɛ, ka Ną́n Yálá yaa kpɛli, hva ka kɛ mɛ̨nį ɲɔ̨nŋąą mąąhvaalɛɛ.»

Hin nɔ mɛ̨nį

16«Ka kɛi hin nɔ, ka hvo dɔɔ ka ɲɛ̨i, yɛ bələi tɛ ɲɛ̨i mɛ̨nį kɛ nuą da gɛ la. Da di ɲɛ̨i laai mąąhvalin, ə gɛ, nuą di gaa diɛ di kaa hin ɉu. Gáá moi kaa a tɛ̨ą, di hvɛla lɔ ka tii da ɉɔlɔɓo. 17Kɛlaa, ə́ wɛi, yá kɛi hin nɔ, ə́ ɲɛ̨i həɠeen, ə́ ə́ kwəinɛ̨ɛ̨. 18Ya ɓə a gɛ, nuą kili hva pu ɉu, diɛ ə́ kaa hin ɉu. Kɛlaa ə́ Ną́n a loo mɛ̨nį hu kaa, ya ɓɛ pai ə́ woo ŋąąpənəi.»

Hɛn gɔw kpɔ-kpɔɔ

(Lukə 12.33-34)

19«Ka hvo ka wɔ hɛn gɔw laaikɛ ɲɛnɛ̨ɛ̨ ŋɛ̨i hu, ɓɛi koló a pu laa hɛnŋąą hu, kpɛ̨ɛ̨ yɛ hee daɠaa diɛ, nwuɔ̨ nuą diɛ pɛlɛ laa yali, diɛ nwuɔ̨ kɛ laa. 20Kɛlaa, ka ka wɔ hɛn gɔw laaikɛ yələkɔlɔn ɉu, ɓɛi koló hva pu laa hɛn da hu, kpɛ̨ɛ̨ hva hee la hɛn da ɓa, nwuɔ̨ nuą di hva pɛlɛ laa yali laa, diɛ nwuɔ̨ kɛ. 21Mąąhɔlɔɓo, ɓɛi ə́ wɔ hɛn gɔw kaa laa, nąą ɓə ə́ wɔ kiliŋąhiɛ kaa laa.»

Nu kpinį nwɔ kɛɛpono

(Lukə 11.34-36)

22«Nu ɲɛ̨i kɔ́w kaa a nu kpinį nwɔ kɛɛpono. Ə́ ɲɛ̨i kɔ́w a kɛ a nɛlɛɛ, ə́ kpinį nąą kəlee a kɛ kɛɛpono hu. 23Kɛlaa, ə́ ɲɛ̨i kɔ́w nąą ta a kɛ mą, a kɛ tii, ə́ nąą kəlee toɔ li kpinį hu. Ə́ ɲɛ̨i a wala kɛ kɛɛ mąą kpɛɛi, ə́ wɔ kpinįi hu a kɛnɛ̨. Akɛ ə́ wɔ kɛɛponoi a kɛ a kpinį, ə́ wɔ kpinįi hu a kɛnɛ̨-oo!»

Yálá, da wali

(Lukə 16.13)

24«Nu hva pɛli tíi tɔɔmun veelɛ ɓa a gee. Ya dɔ̨nɔ̨ wɛli la kɛ, dɔ̨nɔ̨ wɛli ə kpɛɛ yɛ́. A wala kɛti, yá lɛɛ dɔ̨nɔ̨ woo mu, ə́ dɔ̨nɔ̨ hviiɓo. Ka hva pɛli kɛi a Yálá nwɔ tí mun, kaa ɓo nwɔ̨nɔ̨, a wali nwɔ tí mun.»

Liihɛlɛn mɛ̨nį

(Lukə 12.22-31)

25Yili ɓə gɛi, gɛ́ kaa: «'Ka hvo ka liihɛlɛn a kɔ̨nɔ̨n mɛ̨nį, da yii mąąnɛ̨ɛ̨ ka gbələ, ə mą kɛ, yii mąąnɛ̨ɛ̨ ə kɛ ka yəi, kaa yɛnɛ̨ɛ̨ kɛ la. Ka hvo kpɛli ka liihɛlɛn a ka mąąhəɠə mɛ̨nį. Nu nɔw hviala hvo ɓo li hvo tɛɛ kɔ̨nɔ̨n ma? Nu kɔ́lɔ hviala hvo ɓo li hvo tɛɛ nu mąąhəɠə ɓa? 26Ka nwɛ̨niɠaa kaa, di hva hihɛn ɉi, di hva hɛn da laaikɛ kələi. Kɛlaa, ka Ną́n gaa yələi a di kɔ̨nɔ̨n gɛ! Gu hvo mun kɛ, kaa, ka hviala hvo ɓo li hvo tɛɛ nwɛ̨niɠaa diɛ? 27Ka nɛlɛ ɓə, a pɛli ɲii hvóló ta pɛlɛi mą, a nwɔ liihɛlɛn?

28«Akɛti, lə mɛ̨nį ɓa, ka ka mąąyili həɠə mɛ̨nį niihɛlɛn ɉee? Ka ka ɲɛ̨i hee, lɔwɛi wuluɠaa diɛ, bələi da powa la, ka bələ kaa. Di hva koló kɛ, di hva həɠə pálá. 29Kɛlaa gáá moi kaa, bələi mąn Salomɔn ə kɛ la nwɔ tɔɔlaai hu, mąąyili hɛnŋąą di hvo kɛ lɛlɛ li hvo həli nwuluɠaai tii dɔ̨nɔ̨ kpɛli pɔ. 30Éé kə! Kaai ka wɔ laa na laa hvo kɛnɛ̨ li! Gáá moi kaa, akɛ, Yálá a lɔwɛi wuluɠaa mąąyili tii, diɛi di hva lamu yɛnɛ̨ɛ̨, diɛ di kələn, kaa mun ka hviɛlaɓoɔ, hva ka mąąyili həɠə kɛ ə tɛɛ nwuluɠaai tii diɛ? 31Yili ɓə gaa mą, ka hvo ka liihɛlɛn, a yii mąąnɛ̨ɛ̨ ka mį́į́, da yii mąąnɛ̨ɛ̨ ka gbələ, a wala kɛti yii mąąnɛ̨ɛ̨ ka gɛ kaa. 32Nuąi di hvo Yálá kɔ́lɔn, diɛ ɓə mąąnɛ̨ɛ̨ di yiliɠaai niihɛlɛn ɉee. Ka Ną́n gaa yələi, ə ka kpaan mɛ̨nį kəlee kɔ́lɔn. 33Kɛlaa, ka gbɛa tɔlɔɔ Yálá nwɔ tɔɔlaai kwɛli, da ɉu tələnmolaa. Yili pulu, Yálá a ɉɛnŋąą tii kəlee pɛlɛ mą, ə dɛɛ ka pɔ. 34Yili ɓa, ka hvo tinąą mɛ̨nį ta niihɛlɛn ɉee. Tinąą a niihɛlɛn a gbɔwɔ mąą mɛ̨nį. Hvóló kəlee mąąkpaan bɛliɛi lɔ gbɔwɔ ɓa.»

Currently Selected:

Matie 6: BKPG

Highlight

Copy