Matie 4
4
Jesus ŋąąhɛŋi mɛ̨nį
(Markə 1.12-13; Lukə 4.1-13)
1Jesus mąąwaa pulu, Yálá-Nįį ə ɉəɠə, ə li la nɔi pun ɉu, ə gɛ, nąnį ə ŋąąhɛn. 2Jesus ə hvóló pow-nąąn da kpinį pow-nąąn gɛ, hvo hɛn da mį́į́. Pulu ə ɉon. 3Nąąlɔwai, ŋąąhɛn kɛ mun ə lɛɠɛ mą, yɛ mą: «A kɛ Yálá Lon mąą yɛ́, mo gwɛnii ŋɛ̨i ta ɓa ə mąąpənə a kɔ̨nɔ̨n, ə mį́į́.»
4Jesus ə nwoo ŋąąpənə yɛ mą: «Bɛ̨ɛ̨i Yálá laawoo hɛɓɛ́ hu, diɛ mą: ‹Nu hva yɛnɛ̨ɛ̨ kɛ lɔ a laa mį́į́ hɛn yaa tɔ̨nɔ̨, kɛlaa hvo kɛi woo yii a kulɔ Yálá la.›»
5Yili pulu nąnį ə ɉəɠə, ə li la Ɉerusalɛmə, daa mąąɠəɠɛɛ hu, ə dɛ, ə dɔɔ Yálá hee pɛlɛ́ kɛnɛ̨i tona, 6yɛ mą: «A kɛ Yálá Lon mąą a yɛ́, 'teen ə hvilɛn nɔi ɓa. Hvó gaai, bɛ̨ɛ̨i Yálá laawoo hɛɓɛ́ hu, diɛ mą:
«‹Yálá a mo nwɔ malakaɠaa diɛ,
di di yee hee ə́ mu,
ə gɛ, ə́ kɔ́wɔ hvo pa tuwɔ kwɛni ɓa.›»
7Jesus ə mo mą, yɛ mą: «Bɛ̨ɛ̨i nwɔ̨nɔ̨ Yálá laawoo hɛɓɛ́ hu, diɛ mą: ‹Hvo ə́ Ną́mu ə́ wɔ Yálái hu kɔ́ɔn.›»
8Nąnį ə ɉəɠə laa ə li la nwɔ̨nɔ̨ yee kɛnɛ̨ ta tona; ə yɛnɛ̨ɛ̨ tɔɔlaaɠaa kəlee da ɉu mąąwiɛ lɛ mą. 9Yɛ mą: «Akɛ ya kwɛli hvilɛn mą́ą́, ŋą ɉɛnŋąą ŋɛ̨i kəlee tɛɛ ə́ pɔ.»
10Jesus ə nwoo ɲąąpənə yɛ mą: «Ɓilihi həɠə búlú! Mąąhɔlɔɓo, bɛ̨ɛ̨i Yálá laawoo hɛɓɛ́ hu, diɛ mą: ‹Kwɛli hvilɛn ə́ Ną́mu Yálá yaa kɔ́w tɔ̨nɔ̨ gbən ɓa, ə́ mąąwiɛ tɛɛ bɔ.›»
11Yili pulu, nąnį ə Jesus lɛɛ laa. Malakaɠaa di pa di tí mą.
Jesus ə nwɔ kolói kɔ́wɔ tɔɔ Galile lɔi hu
(Markə 1.14-15; Lukə 4.14-15)
12Ɓɛlɔwai Jesus ə Ɉaan nwɔ gahvo mɛ̨nį bələ mɛ̨n na, ə li Galile lɔi hu. 13Hvo lɛɛ Nazarɛtə daai; kɛlaa, ə li ə hee Kafarnaumə daai, taa yii kɛ Galile bówa kwɛlɛ. Ɓɛi kɛ a Zabulɔn nu huwu da Nɛftali huwuhu nuą di wɔ lɔi. 14Yili ə kɛ tii, ə gɛ, mɛ̨nį Ną́mu kwəi mɛ̨nį hukulɔ mun Esai ə mo, bɔ mɛ̨nį ə kɛ, 15yai ə kɛ mą:
«Zabulɔn lɔi da Nɛftali lɔi,
diɛi di kaa gboloyá tənən ma, Ɉurdɛn ya pulu.
Galile nwɔ lɔi yii hį́i takpɛliɠaa kaa ɉu.
16Nu huwuɠaai tii di kaa hiɛi kpinį hu,
daa kɛɛpono kɛnɛ̨ɛ̨ kaa.
Diɛi tii di kaa haa nįnįn mu,
kɛɛpono kɛnɛ̨ɛ̨ aa kulɔ di mɛ̨i.»
17Ə həɠə kɛa nąąlɔwai ɓa, Jesus ə kɛi nuą kalan yɛ kɛ diɛ: «'Ka kpəla mɛ̨nį ɲɔ̨n gɛɛ ɓa, ka ka túwɔ́ pələ mąąhvalin; Yálá-taa tɔɔlaa mąą a kpuwɔ!»
Jesus pɔ kalan nɛa tɔlɔɔɠaa təli mɛ̨nį
(Markə 1.16-20; Lukə 5.1-11)
18Yii kɛa Jesus ə kɛi tɛɛ Galile Bówa kwɛlɛ, ə diŋɛ̨n bili nuą hveelɛ kaa, diɛ ɓo a nąn non dɔ̨nɔ̨. Dɔ̨nɔ̨ laa ɓa kɛ a Simɔn, naa mɛ̨i hee ɓa a Piɛrə, da nəɠə Andre. Di kɛ a hɔ̨nwɔ̨lee kpɛ nuą. 19Jesus ə mo diɛ yɛ diɛ: «'Ka hvilɛn búlú, gáá pai ka kɛi a nu kwɛli nuą.»
20Ɲąąɓa di di wɔ diŋɛ̨nŋąąi lɛɛ laa ɲa, kwɛlɛ di hvilɛn Jesus pulu.
21Ə mąą tɛ nwɔ̨nɔ̨, ə Zebede lon ɉinąą hveelɛ kaa, Ɉakə da nəɠə Ɉaan, diɛ ɓo heeni di nąn gwɛlɛ gələn ɉu, diɛ di wɔ diŋɛ̨nŋąąi nwolo ɓa hɔlɔɔn. Jesus ə di təli. 22Ɲąąɓa di di nąn nɛɛ heeni gələn ɉu, di hvilɛn Jesus pulu.
23Jesus ə li Galile lɔi hu nąą kəlee, yɛ nuą kalan, di wɔ Yálá hvɛli pɛlɛ́ɠaa mu. Yɛ Yálá-taa tɔɔlaa mąą wɛlɛɛ lɛlɛɛ laa həli, yɛ ɲɔ̨n ɉuwu kəlee kɛ nuą kɔ́lɔi pono, ə mą kɛ yiiɠaai kpɛɠi ə kɛ diɛ, nuą lɔwai. 24Mąą tin ə too Siri lɔi hu nąą kəlee, diɛ pa bɔ a ɲɔ̨n ɉuwu lɔpee gəlee kɛ nuą, yɛ di kɔ́lɔi pono. Yiiɠaai ɲį́nɛ̨n ə kɛ di pulu, ə mą kɛ, hvɛli-hvɛli ɲɔ̨n gɛ nuą, da kpɛɠi ɲɔ̨n gɛ nuą, ə mą kɛ, kpɛlɛɠɛlɛn ɲɔ̨n gɛ nuą. 25Nu kpulu tamąą di hvilɛn Jesus pulu, daɠaa diɛ həɠə Galile lɔi hu, ə mą kɛ, Dekapolə nuą, da Ɉerusalɛmə nuą, əlɛɛ, da Ɉude lɔi hu nuą, ə mą kɛ, Ɉurdɛn ya pulu nuą.
Currently Selected:
Matie 4: BKPG
Highlight
Share
Copy
Want to have your highlights saved across all your devices? Sign up or sign in
