Matie 3

Ɉaan-Batistə nwɔ kalan gɛ woo

(Markə 1.1-8; Lukə 3.1-18; Ɉaan 1.19-28)

1Nąąlɔwai ɓə Ɉaan-Batistə ə kɛi kalan gɛ la Ɉude lɔi pun ɉu. 2Yɛ kɛ mą: «Ka kpəla mɛ̨nį ɲɔ̨n gɛɛ ɓa, ka ka túwɔ́ pələ mąąhvalin, Yálá-taa tɔɔlaai mąą aa kpuwɔ!»

3Ɉaan-Batistə tii ɓə, Yálá kwəi mɛ̨nį hukulɔ mun Esai ə kɛi mąą mɛ̨nį ɓo, yɛ kɛ mą:

«Woo ta kaa tɔɔi nɔi pun ɉu, yɛ kɛ diɛ:

‹Ka Ną́mu nwɔ pələi pɛli,

ka bələ pəlɛɛɠaa kəlee haŋą.›»

4Ɉaan mąą həɠə ə kɛ a ɲɔ̨nwɔ̨mɛ̨ɛ̨ ləɠa, ɉəą yiliɛ a huwɔ kɔ́lɔ, gɔ̨nɔ̨n yɛ ɓo a peelə da kwɛin nwulɔ. 5Ɉerusalɛmə nuą, da Ɉude lɔi hu nuą, ə mą kɛ Ɉurdɛn yá kwɛlɛ nuą, di kɛi pa Ɉaan-Batistə pɔ. 6Diɛ hvaa di kɛ nɛ̨ŋɛ̨n ma nu kəlee ɲɛ̨i ɓa, Ɉaan yɛ di mąąwaa Ɉurdɛn yá hu.

7Kɛlaa yii kɛa Ɉaan ə Farisiɛ̨ɠaa da Sadusiɛ̨ɠaa tamąą kaa, diɛ pa bɔ di mąąwaa mɛ̨nį ɓa, ə mo diɛ, yɛ diɛ: «Kaa yiiɠaa ka wɔ mɛ̨nį ɲɔ̨nwɔ̨ɔ̨ ŋɛ̨i, yɛ tumo kwəi lonnii, gbɛɛ ɓə kɛ kaa ka pu, ka həɠə Yálá nwɔ liiɲąnwąną yii gaa pai dɔwɔ? 8Yili ɓa, 'ka túwɔ́, yɛ nui aa ɲii pələ mąąhvalin. 9Ɛlɛɛ, ka hvo ka kiliŋąhiɛ, kaa kɛ mą: ‹Ku kálápɔlɔ ɓaa a Abrahamə.› Gbalaitɔɔ, gáá moi kaa, Yálá a pɛli mą ə gwɛniɠaa ŋɛ̨i mąąpənə a Abrahamə lonnii. 10Yili ɓa, daa ɲowa ŋąą hee nwulu hamu ɓa. Wului hva ɓa lɛlɛɛ ɓo, da gulɔ di bili nwɔ̨n ɉu. 11Nwɛ́i, gáá ka mąąwaai a yá, ə gɛ, di gaa diɛ, kaa ka yii pələ mąąhvalin. Kɛlaa, nu ta kaa búlú yɛ pa, nwɔ huwalawala kɛnɛ̨i dɛɛ mą́ą́. Gaa pai ka mąąwaai a Nįį-Mąąhəɠɛɛ, da nwɔ̨n. Ɲą́ą́ mą́ą́ hvo kpɛli nɛ̨ɛ̨li a nwɔ kɔ́lɔi laa hvoloon mun. 12Nwɔ laɠai kaa ɲəi, yɛ pa nwɔ mɔ̨nun mąąhvɛɛila. Ə mɔ̨nun gɔw pu ɲəi gələi, ə gala kpɔn gee ɓa, nwɔ̨n ɲii hva liin ə doo ɉu.»

Jesus mąąwaa mɛ̨nį

(Markə 1.9-11; Lukə 3.21-22)

13Jesus ə həɠə Galile lɔi hu, yɛ pa Ɉaan pɔ ə gɛ, yili ə mąąwaa Ɉurdɛn hu. 14Ɉaan ə lənə mą, ə mo mą, yɛ mą: «Ɲą́ą́ mun mə mąąnɛ̨ɛ̨ ə́ mą́ą́waa. Kɛlaa, yɛ́ mun, yɛ́ pa bɔ́?»

15Jesus ə nwoo ŋąąpənə, yɛ mą: «'Hváá mą, ə́ mą́ą́waa. Hvó gaai, bələ ɓə mąąnɛ̨ɛ̨ gu Yálá liiɓa mɛ̨nį ɲɛ̨i kulɔ la.»

Ɉaan ə hvaa mą ə mąąwaa. 16Jesus mąąwaa pulu, gɛɛ kulɔi ɲai, nąąlɔwai, yələkɔlɔn naa ə ɓo, Yálá-Nįį ə yɛɛ ə hee mɛ̨i, yɛ tonwələn. 17Woo ta ə kulɔ yələkɔlɔn ɉu, yɛ mą: «Nui ŋɛ̨i kaa a nííɓa Lon, ŋą́ą́ nííɓa mɛ̨nįɠaa kəlee lɛɛ mą.»

Currently Selected:

Matie 3: BKPG

Highlight

Copy